بيىلعى كوكتەمدە ەلوردادا كورنەكتى مەملەكەت جانە قوعام قايراتكەرى, بەلگىلى اقىن كاكىمبەك سالىقوۆتىڭ تۇرعان ۇيىنە ەسكەرتكىش-تاقتا ورناتىلادى. ە.راحماديەۆ اتىنداعى مەملەكەتتىك اكادەميالىق فيلارمونياسى مەن جازۋشىلار وداعىنىڭ ەلوردالىق فيليالى ەسكە الۋ كەشىن وتكىزەدى. ۇلتتىق اكادەميالىق كىتاپحانادا وتكەن «جىر الەمىنىڭ جەزكيىگى» اتتى دوڭگەلەك ۇستەل ءماجىلىسى بارىسىندا مۇنى جيىن تىزگىنىن ۇستاعان قازاقستان جازۋشىلار وداعىنىڭ حاتشىسى, اتالمىش ۇيىمنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپۇلى سۇيىنشىلەدى. القالى ءماجىلىس تۇعىرلى تۇلعانىڭ تۋعانىنا 90 جىل تولۋىنا ارنالدى.
قايراتكەر اقىن باس قالادا عانا ەمەس, وڭىرلەردە دە ۇلىقتالادى. الماتى قالاسىندا ونىڭ اتىنا كوشە بەرۋ, جەزقازعاندا ەسكەرتكىش ورناتۋ جوسپارلانىپ وتىر. تۇلعانىڭ تۋعان جەرى سولتۇستىك قازاقستان وبلىسى مەن اقمولا وبلىسىندا دا ءتيىستى شارالار وتەدى. مۇنى كاكىمبەك سالىقوۆپەن «ق.ساتباەۆ اتىنداعى حالىقارالىق قورى» قوعامدىق قورىندا بىرگە جۇمىس ىستەگەن كورنەكتى اقىن, حالىقارالىق «الاش» ادەبي سىيلىعىنىڭ يەگەرى عالىم جايلىباي حابارلاپ, ادامي قاسيەتتەرىنە توقتالدى. اقىندىق ەرەكشەلىكتەرى جايلى اڭگىمەلەدى. سونىڭ ىشىندە كاكىمبەك سالىقوۆ قاراقالپاقستان وبلىستىق پارتيا كوميتەتىنىڭ ءبىرىنشى حاتشىسى كەزىندە تاعدىرلى اقىن سۆەت ورازاەۆقا كورسەتكەن قامقورلىعى, ەلگە جاساعان باسقا دا جاقسىلىقتارى تۋرالى ايتتى.
– كاكىمبەك سالىقوۆتى بۇرىن كەڭەس وداعى قۇرامىندا بولعان مەملەكەتتەردىڭ حالقى جاقسى بىلەدى. بۇل كىسى ەكى فورماتسيادا ءومىر ءسۇردى. كەشەگى چەرنەنكو, برەجنەۆتەرمەن قولتىقتاسىپ جۇمىس ىستەدى. ءبىر ۇلكەن بيىككە شىققان قازاقتىڭ بالاسى بولدى. 1992 جىلى 60 جاسىندا قازاقستانعا قايتىپ كەلگەنىندە قازاق جەزكيىك قايتىپ ورالعانداي اسەرلەندى. بىرگە قاتار جۇرگەنىمىزدە مەن كاكىمبەك اعانىڭ بىرەۋدىڭ شىققان جەرىن, رۋىن سۇراعانىن كورگەن ەمەسپىن. كاكەڭ دالانىڭ وزەندەرى سياقتى ماڭايىنا ەل جينايتىن. تۇلعالىق قاسيەتى بيىك ەدى, – دەدى عالىم جايلىباي.
جازۋشى, دراماتۋرگ, اۋدارماشى وتەن احمەت كاكىمبەك سالىقوۆپەن تانىسىپ, ارالاسقان كەزدەردى ەسكە الدى. سونىڭ ىشىندە جەزقازعان كەزەڭى جايلى اڭگىمەلەدى. كەزىندە قالامگەرگە بەلگىلى تۇلعانىڭ شاپاعاتى تيگەن ەكەن. ول سول تۋرالى ايتىپ, كاكىمبەك اقىننىڭ ولەڭدەرىنىڭ تارماقتارى قاناتتى سوزدەرگە اينالىپ كەتكەنىن تىلگە تيەك ەتتى.
وسىعان ءۇن قوسقان داۋلەتكەرەي كاپۇلى ەلورداداعى «قالامگەرلەر» اللەياسىندا ساكەن سەيفۋللين, ءىلياس جانسۇگىروۆ, بەيىمبەت مايلين ەسكەرتكىشى بوي كوتەرگەندە تاقتاعا جازۋشىلار وداعىنىڭ ۇسىنىسىمەن «قازاقتىڭ ىرىلەرى, ابايدىڭ ىنىلەرى – ساكەن, ءىلياس, بەيىمبەت» اتتى انگە اينالعان ولەڭ تارماقتارى جازىلعانىن جەتكىزدى.
اقىن, دراماتۋرگ, جازۋشى, جىرشى, قازاقستاننىڭ ەڭبەك سىڭىرگەن قايراتكەرى بايانعالي ءالىمجانوۆ, تاريح عىلىمدارىنىڭ دوكتورى مارات ابسەمەتوۆ, داۋلەسكەر كۇيشى, ۇستاز, قازاق ۇلتتىق ونەر ۋنيۆەرسيتەتىنىڭ پروفەسسورى, قازاقستاننىڭ ەڭبەك سىڭىرگەن قايراتكەرى جانعالي ءجۇزباي, تەحنيكا عىلىمدارىنىڭ دوكتورى تىنىس سۇلەيمەنوۆ, «قازاقتانۋ» زەرتتەۋ ينستيتۋتىنىڭ ديرەكتورى, جۋرناليست, اۋدارماشى باقتىباي ءجۇمادىلدين, اقىن, اۋدارماشى, فيلولوگيا عىلىمدارىنىڭ كانديداتى مارجان ەرشۋ, ۇلتتىق اكادەميالىق كىتاپحانانىڭ عالىم-حاتشىسى, قوعام قايراتكەرى سادىبەك تۇگەل كاكىمبەك سالىقوۆتىڭ جارقىن بەينەسىن ەسكە الدى.
كاكىمبەك سالىقوۆتىڭ ولەڭدەرىنە كوپتەگەن كومپوزيتورلار ءان جازدى. اقىننىڭ جانىنان شىققان دا ءبىراز ءان بار. جيىندا قازاقستاننىڭ ەڭبەك سىڭىرگەن ءارتىسى, ونەر زەرتتەۋشى سەرىك وسپانوۆ جاقسىگەلدى سەيىلوۆتىڭ «جەزكيىك» تۋىندىسىن, كاكىمبەك سالىقوۆتىڭ ەل ەستىمەگەن اقان سەرى جايىنداعى ءانىن اۋەلەتتى. قازاق ۇلتتىق ونەر ۋنيۆەرسيتەتىنىڭ وقىتۋشىسى سىرىم مۇحامەدجانوۆ «اققۋ جەتكەن» ءانىن سالدى.
