جازۋشى مەن اقىن دۇنيەدەن وتسە دە, ارتىندا ءسوزى قالادى. اقمولا وبلىسىنىڭ قورعالجىن اۋدانىنان تۇلەپ ۇشقان سماعۇل راحىمبەك ءومىرى دە ونەگەمەن ورنەكتەلگەن ەدى.
استانا تورىندەگى ۇلتتىق اكادەميالىق كىتاپحانادا وتكەن جازدا مەزگىلسىز دۇنيەدەن وزعان, بۇكىل سانالى عۇمىرىن ءباسپاسوز سالاسىنا ارناعان جۋرناليست, اقىن, جازۋشى جانە اۋدارماشى سماعۇل راحىمبەكتىڭ «جىرلارىم مەنىڭ سويلەسىن» اتتى كىتابىنىڭ تۇساۋكەسەرى ءوتتى. بۇل جيناققا اقىننىڭ ءار جىلداردا جازعان تاڭداۋلى ولەڭدەرى ەنگىزىلگەن. سونىمەن قاتار ەپيلوگ رەتىندە قالامگەر اعامىزدىڭ جارى ءاليا راحىمبەكوۆانىڭ «مەنىڭ ماقساتىم – سماعۇلدىڭ ارمانىن جۇزەگە اسىرۋ» دەپ باستاعان ەستەلىگى بەرىلگەن. وندا ومىرلىك سەرىگىنىڭ ەلىن, ۇلتىن, تۋعان جەرىن قالاي سۇيگەنى, شىعارماشىلىق جۇمىسى, قالامگەر ارىپتەستەرىمەن قارىم-قاتىناسى جايىندا باياندالىپتى.
قازاق ادەبيەتى مەن پوەزياسىنا, ۇلتتىق جۋرناليستيكا سالاسىنا وزىندىك ۇلەس قوسقان تالانتتى ازاماتتىڭ ەسىمىن ەسكە تۇسىرۋگە, جاڭا جيناعىنىڭ تۇساۋكەسەرىندە الدان سمايىل, ايباتىر سەيتاق, ەرلان بەكقوجين, ماحات سادىق, امانگەلدى جۇمابەك, ءبادۋان يماشۇلى, كۇلاش مولداحمەتوۆا, مۇراتبەك توقتاعازين سىندى بىرگە قىزمەت ىستەگەن قالامگەرلەر زامانداستارى ەستەلىكتەرىن ايتىپ, جىرلارىن وقىپ, يگى پەيىلدەرىن ءبىلدىردى. سونداي-اق قورعالجىندىق تىلەۋقور اعايىندارى دا اقجارما تىلەكتەرىن جەتكىزدى.
ءيا, ەندىگى جەردە ومىرگە, جىرعا عاشىق بولىپ وتكەن اقىننىڭ ءوزى بولماسا دا, ونىڭ كوزىندەي بولىپ قالعان اقجولتاي, ءورشىل ولەڭدەرى سويلەي بەرەتىنىنە, كوسەمسوزدەرى مەن اڭگىمەلەرى وسكەلەڭ ۇرپاققا ونەگە بولاتىنىنا بەك سەنىمدىمىز.
