بايقوڭىر عارىش ايلاعىنداعى «سويۋز», «پروتون», «زەنيت» زىمىران تاسىعىشتارى مەن «بوران» وربيتاارالىق كەمەسىنىڭ ماكەتتەرىنەن قۇرالعان زىمىران-عارىش تەحنيكاسى مۋزەيى الىستان مەنمۇندالاپ تۇر.
بۇل نىسان – وسىدان ءبىر عاسىرداي بۇرىن قازاق ەلىنىڭ استاناسى بولعان قىزىلوردا وبلىسىنىڭ ەلوردانىڭ 20 جىلدىعىنا تارتۋى. اشىق اسپان استىنداعى مۋزەي تۇران داڭعىلى بويىنداعى «قازعارىشساپارى» اق ۇلت-تىق عارىش ورتالىعى اۋماعىنداعى 1,4 گەكتار جەر ۋچاسكەسىندە ورنالاسقان. مۋزەي ماڭىنداعى اۋماق تولىقتاي اباتتاندىرىلعان. سىر ءوڭىرى سىيعا تارتقان ەكسپوزيتسيا قۇنى 1,5 ملرد تەڭگەنى قۇرايدى.
سونداي-اق كەشەن اۋماعىندا زىمىرانداردىڭ تەحنيكالىق سيپاتتاماسى مەن جاسالۋى جانە پايدالانۋ تاريحى تۋرالى بارلىق مالىمەتتەر كورسەتىلگەن ارنايى اقپاراتتىق ستەندتەر قويىلعان.
ماكەتتەر تۋرالى ايتار بولساق, «سويۋز» زىمىران-تاسىعىشى «بايقوڭىر» عارىش ايلاعى پايدا بولۋىنىڭ نەگىزگى سەبەبى – «كورولەۆتىڭ جەتىلىگى» دەپ اتالىپ كەتكەن ر-7 جيناقتاماسىنىڭ ەڭ تانىمال زىمىرانى. ال «پروتون» – اۆتوماتتى عارىش اپپاراتتارىن جەر شارىنىڭ وربيتاسى مەن ءارى قاراي عارىش كەڭىستىگىنە شىعارۋعا ارنالعان اۋىر ساناتتى بىرجولعى زىمىران-تاسىعىش.
