مەملەكەت باسشىسى پرەزيدەنت اكىمشىلىگىنىڭ باسشىلىق قۇرامىمەن كەزدەستى.
ەلباسى كەزدەسۋ بارىسىندا ءادىلبەك جاقسىبەكوۆكە پرەزيدەنت اكىمشىلىگىنىڭ باسشىسى لاۋازىمىندا جانە باسقا دا مەملەكەتتىك قىزمەتتەردە اتقارعان جۇمىسى ءۇشىن العىس ايتىپ, ونىڭ قازاقستان رەسپۋبليكاسى مەملەكەتتىلىگىن قالىپتاستىرۋ جانە دامىتۋ ىسىنە زور ۇلەس قوسقانىن ەرەكشە اتاپ ءوتتى.
نۇرسۇلتان نازارباەۆ جيىنعا قاتىسۋشىلارعا پرەزيدەنت اكىمشىلىگىنىڭ جاڭا باسشىسى اسەت يسەكەشەۆتى تانىستىردى.
– اسەت ورەنتايۇلى مەنىڭ كومەكشىم بولدى, مينيستر, پرەمەر-ءمينيستردىڭ ورىنباسارى قىزمەتتەرىن اتقاردى. باس قالامىزدا جۇمىس ىستەگەن سوڭعى ەكى جارىم جىل ىشىندە ەلوردالىقتاردان جوعارى باعا الدى. ول بەلسەندى ءارى كرەاتيۆتى ۇستانىممەن ەرەكشەلەنەدى. قازىر بىزگە ءدال وسىنداي ادام كەرەك. يسەكەشەۆ ەلورداعا اكىم بولعان ۋاقىتتا ءبىز «ەكسپو-2017» كورمەسىن جانە استانانىڭ 20 جىلدىعىن ابىرويمەن وتكىزدىك. اسەت ورەنتايۇلى بۇل مىندەتتى دە لايىقتى ورىنداي الاتىنىنا سەنىمدىمىن, – دەدى مەملەكەت باسشىسى.
ەلباسى جيىن سوڭىندا ەلىمىزدىڭ ەكونوميكالىق ءوسىمىن جانە حالىقتىڭ ءال-اۋقاتىن ودان ءارى ارتتىرۋ ىسىندە پرەزيدەنت اكىمشىلىگىنىڭ باستى ءرول اتقاراتىنىن اتاپ ءوتىپ, ونىڭ الداعى كەزەڭگە ارنالعان جۇمىستارىنىڭ نەگىزگى باسىمدىقتارىن بەلگىلەپ بەردى.
– اپپارات الدىندا بۇعان دەيىن قابىلدانعان مەملەكەتتىك باعدارلامالاردىڭ جۇزەگە اسىرىلۋىن جانە ورىندالۋىن قامتاماسىز ەتۋ جونىندەگى ماڭىزدى مىندەت تۇر. بۇگىندە جۇمىس اۋقىمى وڭىرلىك دەڭگەيگە اۋىسقانىن ەرەكشە اتاپ وتكىم كەلەدى جانە بارلىق دەڭگەيدەگى اكىمدەردىڭ قىزمەتىن ءتيىمدى ۇيلەستىرىپ, ولاردىڭ ءوزارا ىنتىماقتاسا ەڭبەك ەتۋىنە كومەكتەسۋ قاجەت, – دەدى نۇرسۇلتان نازارباەۆ.
