دانا حالقىمىز «ەڭبەك ەرلىككە جەتكىزەر, ەرلىك ەلدىككە جەتكىزەر» دەپ وسيەت قالدىرعان. بۇل ماقالدىڭ ماعىناسىنا تەرەڭ ۇڭىلسەك, ەل ءۇشىن ايانباي تەر توككەن جاننىڭ حالىقتىڭ ىقىلاسىنا بولەنەتىنىن ۇعىنامىز. بۇگىنگى ءبىزدىڭ كەيىپكەر – وسى ماقالعا لايىق, حالقىنىڭ ءوسىپ-وركەندەۋىنە ەلەۋلى ۇلەس قوسقان ازامات.
ۇزاقباي ءازىلحانۇلى ءامىروۆ وتىز جىلدان استام ۋاقىتىن ءوزىنىڭ سۇيىكتى ءىسى – سالىق سالاسىنا ارنادى. ءار سالانىڭ كاسىبي مامانى بولۋ ءۇشىن ءىس جۇرگىزۋدىڭ ۇڭعىل-شۇڭعىلىن ءبىلۋ جەتكىلىكسىز. ءبىلىمدى ءاردايىم جەتىلدىرىپ, ىزدەنىستە بولۋ قاجەت. ارىپتەس اعامىز – ۇزاقباي ءامىروۆ مۇنى جەتىك ۇعىنعان جان. سوندىقتان شىعار, ءومىر بويى بىلىمگە, ۇيرەنۋگە قۇشتار بولاتىن.
ول 1970 جىلى الماتى حالىق شارۋاشىلىق ينستيتۋتىندا «ەڭبەك ەكونوميكاسى» ماماندىعى بويىنشا ءبىلىم الىپ, وقۋدى اياقتاعاننان كەيىن قىزىلورداعا ورالدى. تۋعان جەردىڭ توپىراعىندا مول تاجىريبە جيناپ, تىرلىكتىڭ كوزىن تابۋدىڭ تاسىلدەرىن جەتىك مەڭگەرگەن-ءدى. كەيىنىرەك قازاق كسر قارجى مينيسترلىگىنىڭ مەملەكەتتىك كىرىستەر باسقارماسىندا اعا ينسپەكتور بولىپ قىزمەتكە ورنالاسىپ, وسى سالادا 30 جىلدان استام ۋاقىت تەر توگىپتى. جاڭاشىلدىققا, ۇيرەنۋگە قۇمار ازامات وسى مەرزىم ارالىعىندا سالىق ينسپەكتورىنان باستاپ قارجى مينيسترلىگى سالىق كوميتەتىندە ءتۇرلى لاۋازىمدى قىزمەتتەردى اتقاردى.
ۇزاقباي ءامىروۆتىڭ توككەن تەرى تەككە كەتكەن جوق. ونىمەن بىرگە قىزمەت اتقارعانداردىڭ ءبارى ۇزەكەڭنىڭ سالىق سالاسىنداعى ۇزدىك مامانداردىڭ ءبىرى بولعانىن ايتادى. بەينەتتىڭ زەينەتىن كورگەن جاقسى. بۇل تۇرعىدا ۇزاقباي ءازىلحانۇلىنىڭ اۋىز تولتىرىپ ايتار جەتىستىگى جەتەرلىك. ول بىرنەشە رەت قارجى مينيسترلىگىنىڭ ناگرادالارىمەن ماراپاتتالدى. سونداي-اق «سالىق سالاسىنىڭ ۇزدىگى», «قارجى قىزمەتىنىڭ ۇزدىگى» اتاعىن يەلەنىپ, قارجى ءمينيسترىنىڭ سىيلىعى بۇيىردى. ۇزەكەڭ تالاي مارتە مەرەيتويلىق مەدالدار دا الدى.
سالىق سالاسىندا تەر توككەن ايبوز ازامات ۇزاقباي ءازىلحانۇلى ءۇش جىل بۇرىن اقتىق ساپارعا اتتاندى. 10 قىركۇيەك – اياۋلى اعانىڭ تۋعان كۇنى. ەگەر ۇزەكەڭ ءتىرى بولعاندا 70 جاسقا تولاتىن ەدى. جاقسىنىڭ اتى ولمەيدى. قارجى سالاسىندا ولشەۋسىز ەڭبەك ەتكەن ازامات جۇرتشىلىق ەسىندە.
ولجاس وتار,
مەملەكەتتىك كىرىستەر
كوميتەتىنىڭ باس ساراپشىسى
