«АСТАНА АРУЫ-2016»
Бұрнағы күні шаһарымызда қала əкімдігінің қолдауымен «Астана аруы-2016» сəн байқауы өтті. Оған білімі мен білігі, ақылы мен көркі бойында тұнған арулар байқауына еліміздің жоғары оқу орнында білім алып жатқан 20 ару қатысты. Ал аталмыш іс-шараның ұйымдастырушысы болуға «Prima Vera» модельдік агенттігі ықылас танытты.
Байқауды ұйымдастырғандағы мақсат та сол, қыз балалар арасында отбасылық құндылықтарды дәріптеу және олардың қоғам өміріне белсене араласуына айрықша мән беру. Әрине, салауатты ұрпақтың дүниеге келуі алдымен қыз балаға байланысты. Сондықтан елімізде осындай сұлулық байқауларының көптеп ұйымдастырылып жатқаны – көңілге демеу. Себебі бүгінгі қыз бала – ертеңгі ел анасы, бір-бір әулеттің ұйытқысы.
Байқау ережесі бойынша қыздар 4 кезеңнен де сүрінбей өтіп, бар өнерлерін ортаға салудан аянып қалмауы шарт. Бірінші кезең «Визиттік карта» деген атаумен басталып кетті. Бұл бөлімде барлық үміткердің сайысқа қатысудағы мақсаты, өмірлік ұстанымы, өнері көрерменге кеңінен таныстырылды.
Ал «Менің Қазақстаным» атты екінші кезеңде қатысушылар ұлттық киімдерден дефиле көрсетті. Түрлі-түсті жауһар тастармен көмкерілген ұлттық киімдер расымен де көздің жауын алып, керемет үйлесім тапқандай. Әсіресе, жоғары жақтан сахнаға түскен шамның жарығынан сахна төрі сұлулығы мен сымбаты жарасқан арулармен одан әрі жарқырай түсті. Бұл бөлім аяқталысымен LED экран арқылы «Астана аруы-2016» сайысының арнайы видеокүнделігі көрсетілді. Іріктеу кезеңінен финалға дейінгі талай сатыларды бағындырған арулардың байқау барысындағы өмірі, пікірлері мен сайыс аясында атқарған іс-шаралар видеосюжеттен көрініс тапты. Ал «Шерше ля фам» атты үшінші кезеңде барлық арулардың қатысуымен сахналық қойылым көрсетілген болса, соңғы кезең «Сұлулық. Кербездік. Әсемдік» деген атаумен өтті.
Сондай-ақ, Әли Оқапов, Карина Каренина сияқты эстрада жұлдыздары ән шырқап, думанды кештің көрігін қыздыра түссе, сайыс ортасында қызылды-жасылды түске боялған робот кейпіндегі лазерлік шоу қалың көрерменді тәнті етті.
– Сұлулық бәйгесіне 17-23 жас аралығындағы арулар қатысып жатыр. Бəрі де марапатқа лайық деп айтқым келеді. Іріктеу кезеңі 8 қазан күні басталған болатын. Уақыттың тығыздығына қарамастан, олар бар өнерлерін ортаға салып, мүмкіншілігі мен қабілеттерін көрсете білді. Бір айта кетерлігі, жыл сайын сайысқа қатысушылар қатары көбеймесе, азаймақ емес. Бұл – қуантарлық жағдай. Мұндай байқауға қатысқан қыздар өз қатарластарынан біртабан алда болып, өмірге азық болар тəжірибе жинай түседі, рухани тұрғыдан да өсу байқалады.
Ал байқау қорытындысы жөнінде айтар болсақ, бүгінгі кеште топ жарып, суырылып алға шыққан 3 аруымыз «Қазақстан аруы» ұлттық байқауына жолдама алып, əрі қарай өнер көрсетпек, – деді конкурс директоры Ольга Радеш.
Ел Тәуелсіздігінің 25 жылдығымен тұспа-тұс келген биылғы «Астана аруы-2016» сұлулар сайысын қорытындылай келе, аталмыш байқауда бірқатар ару қыздарымыз жеңіс тұғырынан көрінді.
Осылайша, 3-вице-ару аталымында Бибінұр Есімова жеңіске жетсе, 2-вице-ару Екатерина Подгородецкая атанды. Ал 1-вице-ару номинациясында тұғырдан көріну Бегайым Жолабековаға бұйырды. Биылғы жылы «Астана аруы-2016» байқауында бас жүлдегер 18 жасар астаналық Елназ Нұрсейітова атанды. Жеңімпазды бас жүлде – 1 000 000 теңге көлеміндегі сертификатпен ҚР Парламенті Мәжілісінің депутаты Зағипа Балиева марапаттай отырып, барлық қатысушыларға алғыс айтып, табыс тіледі.
Әлемдік ақын-жазушылар шығармаларының өзегіне айналған махаббат тақырыбы – адамзат атаулының жырлап өтер құдіреті. Ал махаббатқа арқау болар – сұлулық. Ендеше, әлемді құтқаратын бұл, әрине, сұлулық деген теңеуге келіспеске болмайтын сыңайлы?! Талайды тамсандырған бұл байқау бас қалада осылайша өз мəресіне жетті.
Əмір ДОСҚОЖА