«Аялаған Астана-2017» V республикалық телевизиялық балалар байқауының финалистері анықталды. Байқаудың бас продюсері Лина Арифулина бастаған музыкалық редакторлар тобы жүзден жүйрік, мыңнан тұлпар деп тапқан балғын әншілер сайысқа қатысатын болды.
Бір жарым ай ішінде еліміздің әр аймағынан ұйымдастыру комитетіне 300-ден астам өтініш келіп түскенін айта кетейік. Қазылар алқасы жіберілген бейнежазбаларды саралап, қорытындысында 12 үміткерді таңдады. Олардың арасындағы Каринэ Болат пен Томирис Маратқызы Астана қаласының намысын қорғайды.
Талабы таудай өзге жеткіншектердің қатарында Әлібек Азамат (Алматы), Бейбарыс Айтмұхамбетов (Ақмола облысы), Мәди Аманбаев (Жезқазған), Арайлым Берік (Қызылорда), Айдана Жалелова (Семей), Әмина Жапар (Солтүстік Қазақстан облысы), Илья Кошиков (Қарағанды), Алан Мерғали (Орал), Аялан Мұқанов (Қостанай) және Луиза Нұрқуатова (Ақтау) бар.
Осылардың ішінде соңғы аталған қатысушыға аз-кем тоқталайық. Осыдан екі жыл бұрын «Славян базары» фестивалінде қазақтың қос ұлы мен қызы айды аспанға бір-ақ шығарды. Қазір әлемді аузына қаратып жүрген Димаш Құдайберген онда ересектердің арасында гран-приді иеленсе, Луиза Нұрқуатова фестиваль аясындағы «Витебск-2015» балалар байқауында бас жүлдені жеңіп алды.
Луиза «Аялаған Астана» байқауына да бірінші рет қатысып отырған жоқ. Бұған дейін осы сайыстан екінші орынды иеленді. Енді бас жүлдеге де үмітті.
Көктемгі демалыс күндері конкурсқа қатысушылар Астанаға келіп, бір апта бойы конкурстың соңғы кезеңіне дайындалады. Ал бас жүлдегер 2 сәуір күні «Қазақстан» ұлттық телеарнасының тікелей эфирі арқылы көрсетілетін шоуда анықталады.
«Аялаған Астана-2017» байқауының жеңімпазы «Детская Новая волна» халықаралық байқауында еліміздің намысын қорғау мүмкіндігіне ие болады. Үміткерлердің өнерін танымал отандық және шетелдік әншілерден құралған қазылар алқасы бағалайды. Сонымен қатар, халықаралық музыкалық байқаулардың шарттарына сәйкес көрермендер де байқаудың жеңімпазын таңдауға қатыса алады. СМС дауыс берудің қорытындысы қазылар алқасының шешімдерімен қосылып саналады.
Бұл байқау бесінші жыл қатарынан өткелі отыр. Қазақстанның түкпір-түкпіріндегі талантты балалардың дарынын ашуға бағытталған конкурсқа 7 және 13 жас аралығындағы жеткіншектер қатыса алады.
