Ресей павильонында Челябі облысының «Қолжетімді энергия: инфрақұрылымдағы инновация» атты тақырыптық апталығы басталды. Челябі облысының губернаторы Борис Дубровский Астанаға «Бизнес энергиясы – даму энергиясы» бизнес-форумына қатысу мақсатында арнайы келіп, қала әкімі Әсет Исекешевпен кездесті.
– Бүгінде Астана ресейлік аймақтармен сауда, туризм, тіпті, барлық бағытта әріптестігін дамытқысы келеді. Сол себепті ЭКСПО көрмесінде Челябі облысының апталығы, көптеген конференциялар, дөңгелек үстелдер, бизнес өкілдерімен кездесулер өтуде. Біз сәтті келіссөздер жүргізіп, бірлескен жобаларымыз туралы сөйлестік, – деді шаһар басшысы Ә.Исекешев.
Кездесу барысында екі аймақ арасындағы қарым-қатынастың басым бағыттары талқыланды. ШЫҰ мен БРҮҚО саммиттеріне дайындалу мен бірге қалалық инфрақұрылым нысандарына қатысты мәселе кеңінен сөз болды. Өңір басшылары Қазақстан мен Ресейдің ірі аймақтарында ақылды қала жүйесін енгізу жайын да талқылады. Машина құрылысы саласында ынтымақтастық орнату да сөз болды. Бұға қоса, аймақтар арасындағы логистикалық мүмкіндікті ұлғайту жайы айтылды. Астана-Челябі әуе рейсін ашу және «Екатеринбург – Челябі» Урал жылдам магистраль құрылысын мүмкіндігінше Астананы қамту арқылы жүргізу ұсынылды.
– Біз Астана мен Челябінің арасында міндетті түрде жаңа рейс ашамыз. Басында аптасына 2-3 рейс болады. Бұл идеямыз бизнестің, туристік қарым-қатынастың артуына жаңа серпін береді, – деді Борис Дубровский.
Екі ел ынтымағын арттыратын бірнеше жоспарлы кездесуден кейін Астана қаласы әкімінің орынбасары Андрей Лукин ресейлік делегацияны елордада қаланың барлық салаларында тәртіп қалай орнайтынын көрсетіп, түсіндіру мақсатында қалалық Жағдаяттар орталығына бастап барды. Челябі облысы губернаторының орынбасары Руслан Гаттаровпен және Экономикалық даму басқармасының басшысы Антон Бахаев Жағдаяттар орталығының толық жұмысымен танысты.
– Мұндағы бейнебақылау залына 3000-ға жуық бейнекамера қосылған. Қала тіршілігін жіті бақылайтын мұндай камералардың санын жыл соңына дейін 13 мыңға дейін жеткіземіз деп отырмыз, – деді Астана қаласы әкімінің орынбасары.Мұнда 100-ге жуық қызметкер еңбек етеді. Бұл орталықта елордалық басқармалар мен департаменттердің өкілдері есебінен құрылған арнайы аналитикалық топ түрлі жағдайларға жедел әрекет ету жұмыстарын жүргізеді.
Ресейден келген қонақтар, сондай-ақ, «109» қалалық қызметінің жұмысымен де танысты. Қалалық ұйымдар бойынша мекен-жай, телефон нөмірлері, байланыс құралдары сынды анықтамалық ақпарат беріп отыратын жедел қызмет көрсету қызметіне оң бағасын берді. Бұл жерге соңғы 6 айдың ішінде 39 мыңнан астам азаматтың өтініш-сұрауы тіркеліпті. Кез-келген қазақстандық көмек қажет болған жағдайда «109» қысқа нөмір бойынша қоңырау шала алады. Ал шетелдіктер 8 800 300 3535 телефон нөмірі бойынша хабарласады.
Бұл – елорданың шетелдік қонақтары үшін call-орталық. Бұл жерде қызметкерлер қазақ, орыс, түрік, ағылшын, француз және қытай тілдерінде қызмет көрсетеді.Кез-келген уақытта қаланың барлық саласы бойынша төтенше жағдайларға тез арада әрекет ету мақсатында ашылған мәселелер орталығы Астанада ЭКСПО-2017 Халықаралық мамандандырылған көрмесін өткізуге байланысты құрылған. Көрме аяқталған соң да орталық өз жұмысын жалғастыра беретін болады.
Гүлжан Рахман
