ДЕПУТАТТЫҚ МАНДАТТАР БӨЛІНДІ
Қазақстан Республикасының Орталық сайлау комиссиясы 7 пайыздық межеден көп дауыс жинаған үш партия арасында Парламент Мәжілісіндегі депутаттық мандаттарды бөлу туралы қаулы қабылдады. Қаулы мәліметін Орталық сайлау комиссиясының төрағасы Қуандық Тұрғанқұлов жария етті.
Барлық облыстардағы, Астана және Алматы қалаларындағы аумақтық сайлау комиссияларының мәліметтері бойынша сайлауда тізімге енген 9 миллион 810 мың сайлаушының 7 миллион 966 мыңы дауыс беруге қатысқан. Соның ішінде, «Нұр Отан» партиясы үшін 6 миллион 183 мың 757 адам (82,20 пайыз), Қазақстанның «Ақ жол» демократиялық партиясы үшін 540406 (7,18 пайыз) адам, Қазақстан коммунистік халық партиясына 537123 дауыс (7,14 пайыз) адам дауыс берген. Ал «Ауыл» партиясы үшін 151285 адамның (2,01 пайыз), Жалпыұлттық социал-демократиялық партиясына 88813 адамның (1,18 пайыз), «Бірлік» саяси партиясына 21484 адамның (0,29 пайыз) дауысы берілген.
Дауыс беруге қатысқан сайлаушылардың 7 және одан көп пайыз дауысын жинаған үш партия – «Нұр Отан», «Ақ жол» және Қазақстан коммунистік халық партиясы болып анықталды. Заңға сәйкес, осы үш партия Парламент Мәжілісіне өз кандидаттарын ұсынады. Ал бұл саяси партиялар арасында депутаттық мандаттар келесідей мөлшерде бөлінді: «Нұр Отан» партиясына – 84 мандат; «Ақ Жол» партиясына – 7 мандат; Қазақстан коммунистік халық партиясына – 7 мандат.
astana-akshamy.kz