«Еурохаттаманың» артықшылығы қандай?
Өткен жылы жол-көлік оқиғаларын «жеңілдетілген тіркеуді» жүзеге асыру аясында жүргізушілерге ыңғайлы болу үшін «Еурохаттама» мобильді қосымшасы енгізілді. Осыған сәйкес елордада 142 жол-көлік оқиғасы тіркеліпті.
Енді екі көлік қана жол апатына ұшырап, оларға 369 мың теңгеден (100 АЕК-тен) аспайтын материалдық шығын келсе, жол-көлік оқиғасын тіркеу үшін полиция шақырудың қажеті жоқ.
Мобильді қосымшаны пайдалана отырып, жүргізушілер зақымдалған бөлшектерді суретке түсіріп, хаттама толтырып, сақтандыру компанияларына тікелей залал туралы талап-арыз жібере алады.
«Мұның артықшылығы неде?» дейтін сауалға түсінікті болу үшін айта кетейік. Өткен жылы елордада жол-көлік оқиғасы салдарынан сот 29 мыңға жуық жүргізушіге айыппұл салып немесе көлік жүргізу құқығынан айырған. Бұл бастама соның алдын алуға себепші болуы керек.
Бұған дейін жол-көлік оқиғасына байланысты сақтандыру төлемін алу 60 күнге дейін созылуы мүмкін болса, қазір тіркеуден бастап төлемдерді алғанға дейін шамамен 5 күн қажет болады. Осыған орай кейінгі кезде жол-көлік оқиғаларына қызмет көрсететін полиция жасақтарының саны қысқартылуда. Ал қысқарған күштер мен жасақ құралдары заңдылық пен қоғамдық қауіпсіздікті қамтамасыз етуге бағытталатын болады.
Еурохаттаманы енгізу полиция мен тұрғындар арасындағы өзара іс-қимылды үйлестірудің тағы бір оң қадамы ретінде бағаланып отыр.
Эльмира ШАУЛЕНОВА,
Астана қаласы
Полиция департаменті ішкі және сыртқы
коммуникация бөлімінің аға инспекторы