«Financial Times» 125-ке толды
Ағымдағы 2013 жылы Батыстың кітап дүкендеріне сиясы әлі кебе қоймаған, ағылшын тілінде жарық көрген “ФТ-мен түскі ас. 52 классикалық сұхбат” (“Lunch with the FT. 52 Classic Interviews”) атты керемет туынды сатылымға шыға бастады. (Мұндағы “ФТ” нмесе “FT” – “Файнэншиэл Таймс”, яғни “Financial Times” деген әйгілі газет атауының екі тілдегі акронимдері.)
Бүгінгі таңда негізі қаланғанына 125 жыл толып отырған әлемнің ең салиқалы ақпарат құралдарының бірі, бірі ғана емес, бірегей көшбасшысы әрі сапалы журналистика дәстүрінің туын жықпай, нық ұстап келе жатқан британдық «Financial Times» газеті халықаралық бизнес, экономика, қаржы және әлемдік саясатқа қатысты қызықты ақпараттар мен татымды жаңалықтарды өзін үзбей оқитын миллиондаған тұрақты оқырмандарына күн сайын бір сәт те кешіктірмей жеткізіп беріп отыр. Әрине, мұндай үлкен тираж – кез-келген газеттің маңдайына жазылмаған бақ екені айтпаса да түсінікті.
«Financial Times» неміс тілінде де 100.000 данамен шығып тұрады. Басылымның Германиядағы оқырмандарының саны бұл күнде 40 миллионға жуықтады. Мұның сыртында, газеттің электрондық нұсқасымен планета жұртшылығы сағат сайын жүздесетінін ескерсек, бүгінгі таңда бұл абыройлы газеттің әлемдегі ең тартымды ақпарат құралы екні айқын сезіледі.
«Financial Times» газетінің жоғарыдағы айдармен жарық көрген мерейтойлық жинағына жүзден жүйрік, мыңнан тұлпар шығатын ең таңдаулы журналистердің 1994 жылдан бері әр апта соңында үзбей жарияланып келе жатқан классикалық сұхбаттарының редакциялық сыннан сүрінбей өткен елу екі нұсқасы енгізіліпті. Сосын газетте жарық көрген әлгіндей сұхбаттардың ұзын саны бұл күнде 800-ден асып жығылады екен. Сұхбат қонағы ретінде арнайы шақырылған әйгілі кейіпкерлердің ортасында әлем елдерінің беделі биік президенттері де, іскер топтардың көшбасшылары да, данышпан ойшылдар да, әйгілі драматург-жазушылар мен ақындар да, қылқалам иелері де, саясаткерлер де, ғұлама ғалымдар да, олигархтар да, кино өнерінің жұлдыздары да, архитекторлар да, монахтар да, атақты спорт шеберлері де, тіпті, аңшылық кәсіптің иегерлері мен браконьерлер де жетіп артылады.
Дәстүрлі сұхбат айдарының түскі аспен байланысты болуының да өзіндік сыры бар. Өйткені, газет оқырмандарының биік талғамынан шығу үшін, ең үздік журналистер өздері қызмет атқарып жүрген әлемнің әр түкпіріндегі қалалардың айтулы ресторандарының біріне, әдетте өткір қалам иелерінің уысына түсе бермейтін, бірақ әлем назарында жүрген атақтары асқақ, дарабоз тұлғаларды түскі дәмге ресми түрде бір-бірлеп шақырып, дастархан басында еркін сұхбаттасып, біріншіден, олардың ой түкпірінде жатқан сырбаз сырлары мен адами ерекшеліктерін дөп басып, таразылап беру болса, екіншіден, ел назарында жүрген әлемнің көкейкесті мәселелеріне қатысты әлгі тұлғалардың жеке көзқарасы мен тұшымды пікірлерін үлкен шеберлікпен суыртпақтай суырып, қылын қисайтпай, оқырманға жеткізу үшін бар өнерін салады.
Үшіншіден, газет оқырмандарына керегінің өзі де – осы. Апта сайын бұрын сырттай атын естігенімен, түсін түстеп көрмеген заманауи кейіпкерлермен газет айнасы арқылы тікелей танысу кез келген оқырманды қызықтырмаса, жалықтырмайтыны күмән тудырмайды.
Әдетте, әлемге етене танымал газеттің ауыздарын айға білеген, білікті де әмбебап журналистерінің түскі асты бөлісуге жіберген өтініш-шақыруларын тұғыры биік тұлғалардың басым көпшілігі шынайы ықыласпен әрі қуана-қуана қабылдайтыны шүбә келтірмесе керек. Себебі, ел аузында жүрген жұлдыздар планета бетіндегі ең айбарлы ақпарат құралының назарына ілігіп, оның бетіне де шығып жатса, мерейлері мен абырой-атақтарының бұрынғыдан да бетер өсе түсетініне, сөйтіп, әлем қауымдастығына шексіз танымал болатынына титтей де күмән келтірмейтіні айдан анық.
Бұлай деуге негіз мол. Өйткені 1994 жылдан бермен қарай “Financial Times” тек Ұлыбританияның өзінде ғана емес, қос Америка континентерінде де,
Еуразия кеңістігінде де, тіпті, БРИК экономикалық одағына кіретін Бразилия, Ресей, Үндістан және Қытай сынды мемлекеттерде де өз бөлімшелерін ашып үлгерген. Демек, бұл ақпарат құралының қағаз немесе электрондық нұсқасымен сусындамайтын планета бетінде бірде-бір ел жоқ десек, мүлде артық айтқандық емес. Тіпті, бұл газеттің даналары халықаралық бағыттағы ұшақ жолаушыларына да ұсынылады.
Атақты газеттің дәстүрлі сұхбатқа байланысты бұлжымайтын тазалық қағидасы да көңіл аударуға тұрарлық дүние екен. Мәселен, түскі сұхбаттан кейін ресторандармен есеп айырысу тек қана газет есебінен жүргізілетіні мақтауға тұрарлық дүние демеске болмайды. Бұлжымайтын бұл ережені сұхбат берген адамның бірде-бірі (мейлі миллиардер болсын, мейлі іскер олигарх болсын) бұза алмайтыны ресми тәртіп ретінде бекітілген. Мұның бұлтартпас дәлелі ретінде біз тілге тиек етіп отырған осы жинақтың кіріспе сөзін жазған, бүгінгі “Financial Times” газетінің редакторы Лионел Барбердің қазіргі Нью-Иорк қаласының мэрі миллиардер Майкл Блюмбергтің түскі ас кезінде газетке берген сұхбатынан соң, 96 долларға түскен әлгі астың құнын өз қалтасынан төлемекші болып қанша тырысса да, журналист оған ешбір мүмкіндік бермей қойғанын тілге тиек етеді. Сөйтсе, ренішін білдірмеуге тырысқан миллиардер қонақ сыпайылап: “Файнэншиэл Таймс” газетінің соншалықты қымбат екенін мен енді ғана түсіндім” десе керек.
Аталмыш жинақ: Өнер, Бизнес, Мода және Стиль, Ішім-Жем, Браконьерлер мен Аңқорғаушылар, Саясат, Спорт, Ғұламалар атты айдармен топтастырылған көлемді-көлемді сегіз тараудан тұрады. Туындының соңына ғажайып сұхбаттарды жүргізген “Financial Times” газетіне еңбектері сіңген, яғни сапалы журналистиканың майын ішкен, майталман қаламгерлердің кәсіби жолдары туралы оймақтай ғана синопсистер қоса тіркеліпті.
Сұхбат берген жұлдызды кейіпкерлердің ішінен АҚШ-тың отыз тоғызыншы президенті Джимми Картерді, Германияның саяси қайраткері және Федеральдық канцлері Ангела Меркельді, атақты америкалық қаржыгер Джордж Соросты, Чехияның жазушы-драматургы Вацлав Гавелді, макроэкономист әрі Нобель сыйлығының лауреаты Пол Кругманды, Сумо күресінің хас шебері Акэбано Тароны, Ливия инженері, саяси қайраткер және философ әрі Муаммар Каддафидің екінші ұлы дипломат Саиф Каддафиді, кино өнерінде атағы жер жарған Анджелина Джолиді, бизнес әлемінің өкілі Олег Дерипасканы, Ресейдегі жекешелендіру процесін басынан бастап, аяғына дейін жеткізген Анатолий Чубайсті және көптеген басқа тұлғаларды да кездестіруге болады.
Бірақ бұл жерде біздің айтпақ болып отырғанымыз – әлгіндей тұлғаларды моншаққа тізіп шығу емес, керісінше, кәсіби журналистерге ауадай қажет және олардың кәсіби шеберліктерін ұштай түсетін, аталмыш кітаптан көкейге түйгендерімді шым-шымдап жеткізу мақсатымен ой бөлісу.
Біріншіден, аталмыш кітапқа енген бояуы қанық сұхбаттар журналистермен өткізілетін кез келген дөңгелек үстелге таптырмайтын азық болуға сұранып тұр.
Екіншіден, әмбебап журналистерді даярлайтын оқу орындары бұл туындыны оқулық ретінде пайдалану лазым.
Үшіншіден, сапалы журналистика деген ұғымды ту етіп ұстау үшін осы шығарманы талдауға арналған ғылыми-практикалық конференция ұйымдастырылса, артық болмас еді.
Төртіншіден, бұл туындыдан білікті журналистерге “классикалық сұхбаттарды” қалай жүргізудің тәсілдері мен тетіктерін қотарып алатын мүмкіндіктердің мол екенін еске салғым келеді.
Бесіншіден, шетелдік журналистиканың озық үлгілерін жылдам қабылдау үшін дүниедегі ең жеңіл тіл әрі бизнес, ғылым-білім тілі болып саналатын ағылшын тілімен қарулануды жоғары сатыға көтеру қажет дер едім.
Алтыншыдан, үстіміздегі жылдың ақпан айында еліміздің Мемлекеттік хатшысы Марат Тажиннің ақпарат активімен кездесу барысында көтерген Астанадағы журналистер көп шоғырланған Медиа Орталығының ғимараты шаңырағының астынан журналистердің кәсіби шеберлігін ұштайтын тұрақты жүйе құру керек деген тапсырмасын басшылыққа ала отырып, аймақтарға да, орталықтарға да, яғни бүкіл елге қызмет көрсететін Журналистер Академиясы ашылса, құба-құб болар еді.
Жетіншіден, “Financial Times” газетінің 125 жылдық мерейтойына бағышталған әрі өзіміз дәл қазір тілге тиек етіп отырған жинақта көрсетілген сегіз бағыт бойынша да, өмірдің басқа салаларын қамти алатын өзге бағыттар бойынша да аталмыш академияның қасынан, әсіресе, ағылшын тілінде жарық көрген ең құнды саналатын туындыларды қазақ тіліне тікелей әрі тез аударатын орталық ашу лазым. Сонымен қатар бұл орталықтың ұлттық тарихи сананы қалыптастыруға да тікелей себі тиетіні және шет мемлекеттердегі еліміздің төл тарихына қатысты архивтерді түпнұсқасынан оқып, оларды іске жарата алатын тәржімашылар тобын жасақтауға да негіз болатыны күмән тудырмаса керек. Оның үстіне қазір бірнеше шет тілін ғана емес, ақпарат технологияларын да жете игерген жас мамандар жеткілікті. Солардың арасынан, сұраныстарын қанағаттандыра отырып, мықтыларын таңдап алуға мүмкіндік мол.
Сөз соңында ақпарат технологиялары тоқтаусыз дамып отырған мына заманда жоғарыдағы міндеттерді тез игеру мақсатымен шетелдерге аттандыратын десанттың құрамын жіті іріктеп, оларды қазірден бастап ақпарат технологиялары мен шет тілдерін тереңдете игеруге бағыттау абзал.
Әділ АХМЕТОВ,
сенатор,
Қазақстанның еңбек сіңірген қайраткері
«Айқын» газеті, №138, 01.08.2013
http://aikyn.kz/articles/view/27220