Öner salasynda 40 jylǧa juyq uaqyt qyzmet etıp kele jatqan men elımızge tanymal talai tūlǧamen, öner adamymen dämdes-tūzdas, ärıptes boldym. Meilıŋ qanşa jerden zäu biıkte, jetıstıktıŋ ūşpaǧynda bolsaŋ da adamgerşılık qūndylyǧynan biık emespız. Ömırdı süre bılgen emes, önerdı süie bılgen adam ǧana adamgerşılıktıŋ qadırın erekşe baǧalai bıledı der edım. Jylǧadan aqqan sudai jyldam jyldar belesınde öz basym bolmys-bıtımıne täntı bolyp jüretın eltūtqa azamat bar. Ol şäkırtke jaryǧan ūlaǧatty ūstaz, önerdı süie bılgen mädeniet qairatkerı Äuesbai Baqbergenūly. Älgınde aitqan adamgerşılıktıŋ qadırın bır kısıdei bıletın parasat iesı de sol desem şyndyqtan qiys ketpespın.
Käsıbi ūiymdastyruşy, talapşyl ūstaz retınde aǧanyŋ esımıne būrynnan syrttai qanyq edım. Ol kısımen naqty tanysqan jerım – Nūrǧisa Tılendiev atyndaǧy Jambyl oblystyq öner mektep-internatynyŋ aşylu saltanaty qarsaŋynda edı. 1998 jyl bolatyn. Äuesbai aǧa sol tūstaǧy Jambyl oblysy äkımı Sarybai Qalmyrzaevtyŋ ıs-şarany ūiymdastyru turaly arnaiy ötınışımen kelgenın aitty. Tiısınşe, artylyp otyrǧan jauapkerşılık jügı de zor ekenın bärımızge bırden ūqtyrdy. Älı esımde, respublikaǧa tanymal qanşama öner jūldyzy, belgılı tūlǧalar qatysatyn ıs-şaranyŋ ssenariı men baǧdarlamasy talai tüzelıp-özgerdı. Ūiymdastyruǧa qatysty köptegen qiyndyq tuyndasa da saltanatty räsım joǧary deŋgeide öttı. Bärı bıtken soŋ arqamyzdan auyr jük tüskendei damyldap otyrǧanymda Äuesbai aǧa qasyma keldı. Täjıribelı mamannyŋ oiyn bıleiın degen oimen:
– Aǧa, qalai öttı? Qalai baǧalaisyz?, – dep sūradym.
– Sailau bauyrym, oilaǧannan da keremet. Mıne, «köre-köre kösem bolasyŋ» degen osy bolady», – dep ärı qanattandyryp, ärı jūbatqandai boldy. Odan keiın de oblystyq filarmoniiada, kino salasynda qyzmet ete jürıp, respublikalyq, halyqaralyq deŋgeidegı ıs-şara, baiqaudyŋ bırtalaiyn aǧaimen bırlese ūiymdastyryp, jürgızgen kezımız köp boldy. Aralas-qūralas bola jürıp Äuesbai aǧanyŋ kışıpeiıldılıgı, ärbır ıske mūqiiat tiianaqtylyǧy siiaqty qasietınen bölek, käsıbi ūiymdastyruşy, kım-kımmen de bolsyn tıl tabysa bıletın diplomatiialyq qyryn da san märte baiqadym.
Şyn berılıp etken eŋbek, riiasyz qyzmet eleusız qalmauy tiıs. Eskerusız qalatyn kezderdı ökınışke qarai, bılemız-au. Äuesbai Baqbergenūlynyŋ muzykalyq bılım beru salasyna qosqan ülesı qala, oblys, respublika auqymynda talai qūrmetteldı. Öner maitalmany, ūlaǧatty ūstaz QR Bılım jäne ǧylym ministrlıgınıŋ Qūrmet gramotasymen, «Ybyrai Altynsarin», «Bılım beru ısınıŋ qūrmettı qyzmetkerı», QR Mädeniet jäne sport ministrlıgınıŋ «Mädeniet salasynyŋ üzdıgı», QR Oqu-aǧartu ministrlıgınıŋ «Eŋbek ardagerı» tösbelgılerımen marapattaldy. Şäkırt oqytu ısı jolyndaǧy ūzaq jylǧy alǧausyz adal eŋbegıne orai Qazaqstannyŋ pedagogikalyq ǧylymdar Akademiiasy Äues aǧamyzdy öz müşelıgıne qabyldady.
«Baqytyŋdy ūzaqtan emes, ūrpaǧyŋnan ızde» demei me?! Äues aǧa elımızge tanymal ūl-qyz tärbielegen baqytty jan, bügınde parasat biıgınen körıngen saliqaly aqsaqal. Tanysqan uaqytymyzdan berı arada 25 jyl ötse de, qatynasymyz älı künge üzılmei habarlasyp, ötken-ketken jaŋalyǧymyzdy bölısıp, aǧa-ını retınde syilasyp kelemız. Ol men üşın ülgı tūtar asqar bel azamat. Özgege ülgı bolu da bıle bılgenge bır baqyt eken. «Sary tentek» atanǧan aqyn Quanyş Maqsūtov aitqandai, «qanşa qūisaŋ da tolmaityn, tolsa da tasymaityn» azamattyŋ bekzaty Äuesbai aǧa der em. Aǧama tıleitınım, Qūdai qosqan jeŋgemızben baqytty ǧūmyr keşıp, ösırıp otyrǧan ürım-būtaq, nemerelerınıŋ qyzyǧyn bırge körudı jazsyn.
Sailaubek LESBAEV,
QR Mädeniet salasynyŋ üzdıgı»,
Jambyl oblysyna eŋbegı sıŋgen qairatker
