Elordadaǧy «Analar üiı» qoǧamdyq qory on jyldyq mereitoiyn atap öttı. Saltanatty ıs-şaraǧa QR Mäjılısınıŋ deputaty Qaraqat Äbden, Astana qalasy äkımdıgınıŋ janyndaǧy äielder ısterı jäne otbasylyq-demografiialyq saiasat jönındegı komissiianyŋ hatşysy Qarlyǧaş Särkenova jäne t.b. qatysyp, qūttyqtau söz söiledı.
Türlı jaǧdailardyŋ äserınen jetım qalǧan balalarǧa qamqorlyq ǧana emes, tūrmystyŋ tauqymetın tartqan otbasylardy qoldau maqsatynda qūrylǧan «Ana üiı» on jyldan berı balasynan bas tartpaq bolǧan analarǧa psihologiialyq kömek körsetumen ainalysyp keledı. Qaiyrymdylyq qorynyŋ negızın qalauşy Anar Rahymbaeva qazırgı uaqytta elımız boiynşa barlyǧy 21, onyŋ ışınde Almatyda 3 jäne Astanada 2 «Ana üiı» jūmys ısteitının atap öttı.
– Perzenthanada jūmys ıstep jürgende men ata-analary tastap ketken balalardy jiı köretınmın. Olardyŋ köpşılıgı ünemı yŋyrsyp jylap otyratyn. Sony körgennen keiın älemde eşbır bala jylamauy üşın men ne ıstei alamyn degen oiǧa keldım. Būl menıŋ jüregımde tereŋ ız qaldyrdy. Sodan keiın men bas tartqan säbilerge ana bolǧym keldı. Bıraq özıme mülde beitanys balalardy jaqsy köre alamyn ba degen sūraq tuyndady. Köp oilanyp, qiyn ömırlık jaǧdaiǧa tap bolǧan qyzdarǧa jaǧdai jasau turaly şeşım qabyldadym. Osylaişa, 2013 jyldyŋ mamyrynda Astana qalasynda alǧaşqy «Analar üiı» esıgın aiqara aşty. Sol kezde bız perzenthanalarmen tyǧyz qarym-qatynas ornatyp, balasynan bas tartqysy keletın boijetkendermen jūmys ıstedık. Keiın bızge jüktılıktıŋ soŋǧy aptalarynda jürgen jüktı äielder kele bızge jügıne bastady. Mūnda olarmen mamandar arnaiy keŋester jürgızedı. Jüktı analardyŋ bosanyp, balalary şiraǧanşa qaluyna mümkındık qarastyrylǧan. Bızdıŋ Qor jūmys ıstegen uaqytta «Analar üiınıŋ» qabyrǧasynda barlyǧy 5 myŋǧa juyq bala düniege keldı, – dedı Anar Rahymbaeva.
Mereke qonaqtarynyŋ bırı elorda äkımdıgınıŋ janyndaǧy äielder ısterı jäne otbasylyq-demografiialyq saiasat jönındegı komissiianyŋ hatşysy Qarlyǧaş Särkenova boldy.
– Bügın bız astanalyq «Ana üiı» ūjymyn mereitoiymen qūttyqtauǧa keldık. Osy on jyl ışınde Qor ömırlık qiyn jaǧdaiǧa tap bolǧan 1000-nan astam äielge qoldau körsettı. Adamdardyŋ köptegen taǧdyrlary qūtqaryldy jäne balalar otbasylarda qaldy. Osy jyldar ışınde Qor jūmysynyŋ arqasynda 8 myŋnan astam bala ata-ana tapqanyn atap ötkım keledı. «Ana üiınde» joǧary bılıktı mamandar jūmys ısteidı. Būl äleumettık qyzmetkerler de, psihologiialyq jäne qūqyqtyq qoldau körsetetın psihologtar da balalardy qalai tärbieleu kerektıgın bıledı, analardyŋ balalarymen bırge tūruyna jaǧdai jasaidy. Qorǧa örkendeu, balalarǧa baqytty balalyq şaq tıleimın. Synǧan taǧdyrlar men tastandy balalar az bolsa eken dep tıleimın, – deidı Qarlyǧaş Sarkenova.
Is-şara barysynda osydan on jyl būryn ortalyqqa qiyn jaǧdaida tüsken Nūrasyl atty bala «Ana üiınıŋ» qyzmetkerlerıne alǧysyn aitsa, anasy Zäureş ännen şaşu şaşty.
«Ana üiınde» jürgen jas kelınşekterdıŋ bırın äŋgımege tarttym. Aty-jönın aitudan üzıldı-kesıldı bas tartty. Bıraq pıkır bıldıruge quana kelıstı.
«Mūnda, negızınen, ömırlık qiyn jaǧdailarǧa tap bolǧan äielder keledı. Men de solardyŋ bırımın. Jüktılıgımnıŋ soŋǧy ailarynda jıgıtımmen ūrysyp qaldyq. Nekege tūrmadyq. Tanystarymnan osyndai ortalyqtyŋ baryn estıp, osynda keldım. Qazır jaǧdaiymyz jaqsy, böpem ösıp jatyr. «Ana üiı» ūjymynyŋ arqasynda qiyndyqtar artta qaldy. Ömırde eşteŋeden qoryqpau kerek eken. Sıŋlılerıme aitarym, qandai jaǧdai bolsa da balalaryŋdy tastamaŋdar» dedı közıne jas alǧan kelınşek.
Is-şara soŋynda osy ortalyqta ösıp jatqan bır büldırşın qyrqynan şyǧarylyp, täi-täi basyp jürgen kelesı qoşaqannyŋ tūsauy kesıldı.
