Ejelden qazaq ūlty qyran men jüirıktı baptaǧan adamdy erekşe qūrmet tūtty. Öitkenı būl ekı öner eldıŋ aibynyn körsetıp, abyroiyn asyrdy. Bügınde halyqaralyq bairaqty bäsekelerde el mereiın asyryp jürgen sportşylar desek, olardy baptaityn bapkerlerge de qūrmet joǧary. Sondai bılıktı bapkerdıŋ bırı – Asqar Erkebaev.
Sportşynyŋ fizikalyq küş-quatyn arttyryp, taktikalyq jäne tehnikalyq qabıletın şyŋdap, psihologiiasyn damytu oŋai şarua emes. Fizikalyq jüktemeden keiın sportşynyŋ qaita qalpyna keluın eseptep, jarysqa daiyndau tıptı qiyn. Sondyqtan alǧaşqy sūraqty osy baǧytta qoidyq.
– AQŞ-tyŋ jelaiaqtary, Qytaidyŋ auyr atletterı jyl ötken saiyn jaŋa rekordty baǧyndyryp, taŋǧaldyruda. Mūndai joǧary jetıstıktıŋ syry nede? Ärine, ǧylymda. Sport salasy ǧylymsyz, innovasiiasyz damymaidy. Astanada sportşylarǧa arnalǧan medisinalyq ortalyq aşyldy. Būl – qūptarlyq ärı quanarlyq jaǧdai. Endı ärbır sportşynyŋ fizikalyq jaǧdaiyn baqylau maŋyzdy. Qaşan, qalai, qandai jükteme beru kerek, babyna kelgennen keiın ne ısteu kerek? Mūnyŋ bärı ǧylymi tūrǧyda süiemeldenıp, oqu-ädıstemelık qūral retınde jas bapkerlerge ūsynylǧany dūrys. Mıne, osynyŋ bärı ǧylym men sporttyŋ üilesımdı jūmysynyŋ arqasynda ıske asady. Sonda ǧana AQŞ pen Qytai syndy sporty damyǧan alpauyt elge ainalamyz. Jarysqa babynda barǧan sportşynyŋ közınde ot oinap, jıgerı tasyp, şarşy alaŋda özınıŋ şeberlıgın körsete alady, – dedı bapker.
Asqardyŋ kındıgı Jambyl oblysy Şu audanynda kesıldı. 13 jasynan Qūrmanǧali Qarşyǧabekovtıŋ qolastynda jattyǧyp, bokstyŋ qyr-syryn meŋgerdı. Köp ūzamai audandyq, oblystyq deŋgeidegı turnirlerde top jaryp, respublikalyq, halyqaralyq deŋgeidegı jarystarda jasyndai jarqyrady. Söitıp, sport şeberı atandy.
2006 jyly Şu audanynda bapkerlık jūmysty bastady. 2009 jyly elordaǧa qonys audaryp, süiıktı jūmysyn jalǧastyrdy. Şäkırtterın tärtıpke baulyp, jauapkerşılıktı sezınuge üiretetın bapkerdıŋ eŋbegı eş ketpedı. El namysyn qorǧaityn Aibek pen Nūrbek Oralbai syndy myqty boksşylardy tärbieledı.
– Şäkırtterımnıŋ ışınde aǧaiyndy Oralbaidyŋ mereiı üstem. Aibek – Aziia chempiony, Nūrbek – älem chempiony. Ekeuınıŋ armany – Olimpiada oiyndarynda bırge top jaru. Olar osy jolda ter tegude.
23 qyrküiekten 8 qazanǧa deiın Qytaida HIH Aziia oiyndary ötedı. Soǧan qatysamyz. Qazır Almatyda ūlttyq qūramanyŋ oqu-jattyǧu jiynynda daiyndaludamyz, – dep şäkırtterınıŋ mūratyn jetkızdı ol.
Şyny kerek, boks töŋıregınde sūraq köp. Sonyŋ bırı – Tokioda ötken Olimpiada oiynyndaǧy sätsızdık. Ekınşısı – qazaq-özbek boksynyŋ bäsekesı.
– Kez kelgen sport bäseke bolǧan jerde damidy. Elışılık jarystarda är salmaq därejesınde bırneşe boksşy şeberlıgımen közge tüsedı. Al älem jäne Aziia deŋgeiındegı bäsekelı turnirlerde qazaq-özbek bäsekesı qyzady. Būl qazaq boksşylaryn fizikalyq, tehnikalyq, psihologiialyq tūrǧyda daiyndauyna erekşe serpın beredı. Al Tokioda ötken törtjyldyqtyŋ basty bäsekesı turaly eşnärse aita almaimyn. Öitkenı būl turnirdıŋ basy-qasynda bolǧan joqpyn. Bızdıŋ maqsat – Parij Olimpiadasynda biıkten körınu. Osy jolda ızdenıp, boksşylardyŋ şeberlıgın şyŋdau üstındemız, – deidı Qazaqstanǧa eŋbegın sıŋırgen jattyqtyruşy.
