Olimpiadaǧa 100 kün qaldy
Elordada biyl jazda Parijde ötetın jazǧy Olimpiada oiyndarynyŋ bastaluyna 100 kün qaluyna orai būqaralyq jügıru ıs-şarasy öttı. Astana qalasynyŋ Dene şynyqtyru jäne sport basqarmasynyŋ «Būqaralyq-sporttyq ıs-şaralardy ötkızu jönındegı direksiiasy ūiymdastyrǧan olimpiadalyq jügıruge qatysuşylar 5 şaqyrymdy eŋserdı.
Jügıruge jas şamasy şektelmei, balalar men eresek adamdar qatar jügırdı. Būl ıs-şara sporttyq jarys emes, olimpiadaşylarǧa körsetılgen qoldau retınde ötkızıldı.
Dene şynyqtyru jäne sport basqarmasynyŋ būqaralyq sportty josparlau bölımınıŋ menedjerı Tomiris Smailova olimpiadalyq jügıru ıs-şarasy Parij olimpiadasyna 100 kün qaluyna orai ūiymdastyrylǧanyn aitty.
«Jügıruge qatysqan qala tūrǧyndary 5 şaqyrym qaşyqtyqty köŋıldı küimen jügırıp öttı. Qatysuşylar tek qana jügırıp qoimai, demeuşılerdıŋ kömegımen ūiymdastyrylǧan lotereia oiynynda da baqtaryn synady. Sondai-aq qol küresı jäne arqan tartu sekıldı saiystardy tamaşalady. Bız osy ıs-şara arqyly Parijde el namysyn qorǧaityn sportşylarymyzǧa qoldauymyzdy bıldırmek boldyq» dedı sport basqarmasy ökılı.
Şyn mänınde, Olimpiadaǧa arnalǧan būqaralyq jügıru elordalyqtardyŋ köŋıl-küiın kötergen ıs-şara boldy.