Astanada jylytu kezeŋınıŋ bastaluy qarsaŋynda jäne tūrǧyn üi sektorynda örttıŋ aldyn alu maqsatynda aǧymdaǧy jyldyŋ 15 tamyzynan bastap «Ört qauıpsızdıgı ailyǧy» jürıp jatyr.
Qalalyq Tötenşe jaǧdailar departamentı ūiymdastyrǧan būl ıs-şara Bögenbai batyr daŋǧyly, 4 mekenjaiynda ornalasqan №5 mamandandyrylǧan ört söndıru bölımınde jeke qūramnyŋ sap tüzeuımen bastaldy. Astana qalasy Tötenşe jaǧdailar departamentı Saryarqa audandyq Tötenşe jaǧdailar basqarmasynyŋ bas mamany Aidana Madievanyŋ aituynşa, aǧymdaǧy jyl basynan berı Astana qalasy boiynşa 406 ört oqiǧasy tırkelgen. Tūrǧyn üi sektorlaryndaǧy örttıŋ negızgı sebepterı peşpen jylytu, elektr jabdyqtaryn qoldanu kezınde ört qauıpsızdıgı talaptarynyŋ saqtalmauy bolyp jatady.
– Jyl saiyn kün suyta bastaǧanda jäne jylytu mausymy jaqyndaǧanda, adamdardyŋ örtten qaitys boluy men jaraqattanudyŋ aldyn alu maqsatynda departament jeke tūrǧyn üi sektoryn aralau arqyly aldyn alu ıs-şaralaryn jürgızedı. Ol üş kezeŋge bölıngen. 1-kezeŋ – 15 tamyzdan 15 qyrküiekke deiın; 2-kezeŋ – 15 qyrküiekten 15 qazanǧa deiın jäne 3-kezeŋ 15 qazannan bastap jylytu kezeŋınıŋ soŋyna deiın jalǧasady. Is-şara şeŋberınde departament qyzmetkerlerı aulalardy aralau arqyly reid jürgızedı, ügıt-nasihat jūmysy küşeitıledı, – dedı Aidana Madieva.
Odan ärı erıktıler Tötenşe jaǧdailar basqarmasynyŋ ökılderımen bırge halyqtyŋ äleumettık osal toptarynyŋ tūrǧyn üilerıne reidke şyqty. Biyl äleumettık osal topqa jatatyn 200 otbasydan ötınış tüsken. Äkımdıkten kömek sūraǧandardyŋ bırı – köpbalaly ärı mügedek balany asyrauşy ana Ümıt Ǧazizqyzy. Reid barysynda inspektorlar aldymen Qyrqynşy stansasyndaǧy Töreqūlūly, 19 mekenjaiynda tūratyn ananyŋ üiıne kelıp, äleumettık osal toptaǧy tūrǧynnyŋ jylytu mausymyna daiyndyq barysymen tanysty. Aralau barysynda peşter men mūrjalardy, elektr jylytqyşynyŋ dūrys ornatyluyna basty nazar audaryldy. Mamandar jylytu qūralynyŋ ainalasyndaǧy jaryqty bıteu kerek ekenın, onyŋ aldyna mındettı türde metall qaŋyltyr qoiyp, qūbyrdy üş aida bır ret tazalap tūrudyŋ qajettıgın eskerttı. Sodan soŋ ört qauıpsızdıgı ailyǧynyŋ bırınşı kezeŋın ötkızu aiasynda TJD basqarmasynyŋ Almaty audany boiynşa injenerı Saǧyntai Qadyrbekov elordalyq tūrǧynnyŋ üiıne jylytu mausymy kezınde iıs tiıp qalmas üşın uly gazdy anyqtaityn dabyl qondyrǧysyn tegın ornatyp berdı.
– Ötken peş jaǧu mausymynda jeke tūrǧan 110 üiden ört şyqqan. Degenmen būl körsetkış byltyrǧymen salystyrǧanda 23 paiyzǧa kem. Astana qalasy boiynşa barlyǧy 935 tūrǧyn üi esepte tūr jäne de jataqhana men kommersiialyq qyzmet retınde qaita jasalǧan 1162 tūrǧyn üi-jai bar. 2022-2023 jylytu mausymynda qala boiynşa tūrǧyn üilerge 308 datchik ornatyldy. Sonyŋ nätijesınde byltyr qalada bolǧan örttıŋ bırınde dybystyq qūrylǧynyŋ kömegımen bütındei bır otbasy aman qaldy, – dedı S.Qadyrbekov.
Halyqtyŋ äleumettık osal toptarynyŋ tūrǧyn üilerın aralau arqyly tılsız jaudyŋ aldyn alu ıs-şaralary 15 qyrküiekke deiın jalǧasady.
