Elımızde 10 jyldan berı qyrküiektıŋ ekınşı jeksenbısı Otbasy künı retınde atalyp kele jatyr. «Mereilı otbasy» ūlttyq baiqauynyŋ biylǧy mereitoi saltanaty Memleket basşysy Qasym-Jomart Toqaevtyŋ baiqau jeŋımpazdaryna arnaǧan qūttyqtauymen aşyldy. Biylǧy baiqauda 3344 otbasy baq synasa, onyŋ ışınde elordadan 210 otbasy qatysty.
Biyl «Mereilı otbasy» ūlttyq baiqauynyŋ Astana qalalyq kezeŋınde köpbalaly Säduaqasovtar äuletı jeŋımpaz atandy. 2013 jyldan berı ötkızıletın atalǧan baiqauǧa biyl qatysqan 210 otbasynyŋ ışınen üzdık şyqqan olar nesımen erekşelendı?
Äulettıŋ abzal anasy, 12 balany düniege äkelgen Tişjan Säduaqasovanyŋ aituynşa, olar bala sanynyŋ ǧana emes, jetıstıkterınıŋ köptıgımen de jeŋıske jetken. 2011 jyly elordaǧa Qarqaraly qalasynan köşıp kelgen jeŋımpaz otbasy elımızdegı kez kelgen merekede jan-jaqtan äulet bolyp elordada bas qosyp, barlyq merekenı bırge atap ötedı eken. Joldasy Töken Säduaqasov dünieden ötkenge deiın 60 jyl bırge tūryp, balalaryn jetıldırıp, jetkızıp, myqty tärbie bergen 80 jastaǧy 2 dürkın «Altyn alqa» alqa iegerı – 6 ūl jäne 6 qyzdyŋ anasy, olardan taraǧan 37 jien, nemere men 19 şöberenıŋ asyl äjesı. Olardyŋ köbı bılım beru, qūqyq qorǧau salalarynda jūmys ıstep, jetıstıkterge jetken. Sol siiaqty sporttaǧy, qoǧamdyq jäne şyǧarmaşylyq jūmystardaǧy, baiqaulardaǧy belsendılıgı üşın marapattarǧa ie bolǧan. Tişjan äje osyndai ülken äulet qalyptastyryp, olardyŋ auyzbırlıgın saqtaudaǧy qūpiiasymen bölıstı.
– 17 jasymda otbasyn qūryp, 25 jasta tūŋǧyşymdy düniege äkep, ana atandym. Sosyn arasyna 2 jyl salyp qalǧan balalarymdy düniege äkeldım. Joldasym salmaqty, sabyry mol jan edı. On aǧaiyndy äulettıŋ ülkenı. Enemmen 30 jyl bırge tūryp, balalarymdy bır jasqa jetpei eneme qaldyryp, jūmysqa şyǧyp ketetınmın. Söitıp bala da tuyp, 30 jyl memleketke de qyzmet etıp ülgerdık. Qyzdardy ūzatyp, ūldardy üilendırdık. Qandai qiyn kezeŋderdı ötkersek te, erlı-zaiypty retınde bır-bırımızdı tyŋdap, äi-şäi despei ǧūmyr keştık. Anasyn syilap tūrǧan soŋ joldasyŋ da senı tyŋdap, töbesıne köteredı. Qazır mıne alty kelınım men küieu balalarym da solai menı qūrmetteidı. Kelınderıme jekıp, bötensınıp körgen emespın. Äulettıŋ şaruasyn qartaiǧaly solarǧa bergenmın, eşteŋege aralaspaimyn. Özderı şeşıp, özderı qoiady. Men tek osy balalarymnyŋ ortasynda qydyryp, sanatoriilerde demalyp jürgen jaiym bar. Endı qazırgı zamanǧa kelsek, barlyq jaǧdaiy jasalyp tūrsa da, 1-2 balasy bolsa da, bır-bırın tüsınıspei, ajyrasyp ketıp jatqan jastar köp. Otbasyn saqtaudyŋ basty syry – bırıŋdı bırıŋ tyŋdai bılude jäne kelın bolǧannan keiıngı rölıŋdı jastaiyŋnan boiyŋa sıŋıre aluyŋda. Bıreuge bırdeŋe dep aqyl aitu qiyn, degenmen bızde mūndai jaqsy jaǧdai bolmasa da osynşa ūrpaq ösırıp, olardy tolyq otbasynda jetıldırdık. Bärı de adamnyŋ nietı men tılegıne jäne ärine tärbiesıne, anasynan, özınıŋ otbasynan alǧan önegesıne bailanysty ǧoi, – deidı altyn qūrsaqty ana.
Bügınde önegelı otbasy respublikalyq baiqauǧa daiyndyq üstınde. Osyndai otbasylyq qūndylyqtardy dūrys qalyptastyru, balalardy patriotizm men jalpyadamzattyq qūndylyqtar ruhynda tärbieleu – ärbır äulettıŋ basty mındetı. Ol adamgerşılık qasietterdı jandandyruǧa jäne otbasy märtebesın köteruge septık etedı. Būl öz kezegınde memleket ırgesınıŋ myqty boluyna, qoǧamda gumanizm qaǧidattarynyŋ jappai beleŋ aluyna äkeledı.
