Elordada alǧaş ret olimpiadalyq rezervtegı bırınşı mamandandyrylǧan balalar men jasöspırımder sport mektebınıŋ jas jattyqtyruşylary tegın tūratyn jataqhana aşyldy. Astanadaǧy köpqabatty tūrǧyn üilerdıŋ bırınıŋ bırınşı qabatynda ornalasqan jataqhana Memlekettık mülık basqarmasy arqyly sport mektebınıŋ balansyna berıldı. Būl jaŋalyqty Astana qalasy mäslihatynyŋ töraǧasy Erlan Kanalimov jariia ettı.
«Jattyqtyruşylar üşın tūrǧyn üi mäselesı ärqaşan özektı bolyp keledı. Elordaǧa Almatydan kelgen 4 jäne Öskemennen 2 jattyqtyruşy osy mekenjaiǧa ornalasty. Mūnda adamnyŋ kündelıktı tūrmysyna qajettı barlyq jaǧdai bar, jeke bölmelerge jihazdar qoiylǧan. Sport jäne dene şynyqtyru basqarmasynyŋ osy täjıribesın aldaǧy uaqytta da qoldaimyz» dep jazdy E.Kanalimov äleumettık jelıdegı paraqşasynda.
Sonymen qatar mäslihat töraǧasy Astana qalasy äkımdıgınıŋ «№7 balalar men jasöspırımderge arnalǧan sport mektebınıŋ» jūmysymen tanysty. Qazırgı taŋda sport zaly tolyǧymen daiyn jäne sporttyŋ 8 türınen (qazaq küresı, djiu-djitsu, greppling, taekvondo, karate-do, muaitai, kiokuşinkai kan karate, sambo) oqu-jattyǧu prosesı ötıp jatyr. Osy zalda 200-ge juyq sportşy daiyndaluda.
