Keşe elordadaǧy Ūlttyq akademiialyq kıtaphanada Äbdırahman Jälelūlynyŋ «Ömır jolymdaǧy soŋǧy köş» atty ömırbaiandyq kıtabynyŋ tūsauy kesıldı.
«Otandastar qory» KEAQ, QR Ūlttyq akademiialyq kıtaphanasy, «Zuqa batyr Säbitūly» qoǧamdyq qory bırlesıp ötkızgen būl şaraǧa tarihşy ǧalymdar, qoǧam qairatkerlerı men būqaralyq aqparat qūraldarynyŋ ökılderı qatysty.
Şarany basqaryp, jürgızgen «Otandastar» qorynyŋ prezidentı Abzal Saparbekūly HH ǧasyrdyŋ basynda jäne ortasynda qazaq halqynyŋ basyna tüsken auyr näubet, zūlmat jyldar turaly toqtalyp, «jūmyr jerdıŋ jotasy» atanǧan Tibet qyraty – Gimalai tauynan asqan qazaq köşınıŋ adamzat tarihyna öşpeitın ız qaldyrǧanyn airyqşa atap öttı. «Bız bügın şeteldegı qazaqtardyŋ arasyndaǧy tanymal tarihi tūlǧanyŋ bırı, Altaidan bastalyp, Barköl, Tibet jotasy arqyly Gimalaidy asqan, Ündıstan men Päkıstan arqyly Türkiiaǧa jetken aituly köştıŋ közı tırı kuägerı, qoǧam qairatkerı – Äbdırahman Jälelūlynyŋ «Ömır jolymdaǧy soŋǧy köş» atty ömırbaiandyq kıtabynyŋ tūsaukeserıne jinalyp otyrmyz. Būl kıtap qazaq tarihynyŋ maŋyzdy qūramdas bölıgı sanalatyn Altaidan Anadolyǧa deiın auǧan qazaq köşınıŋ bastan keşken keşırmelerımen qūndy dep oilaimyn. 2022 jyly qazaq köşınıŋ tübı bır Türık elıne qonys audarǧanyna 70 jyl toldy. Osy bır tarihi sätke orai, «Otandastar qory» KEAQ Qazaqstan ūlttyq telearnasymen bırlesıp, Altaidan Anadolyǧa deiın auǧan köş jaily derektı film tüsırıldı. Jaqynda elımızde jäne Türkiiada osy filmnıŋ tūsaukeserı ötedı. Maqsat – köştıŋ kuägerlerınen naqty derek alyp, osy köşke tarihi tūrǧydan baǧa beru» dedı ol.
Äbdırahman Jälelūly – Qytai qazaqtarynan şyqqan Ūlt-azattyq köterılısterınıŋ köş basşylarynyŋ bırı äigılı Zuqa batyrdyŋ nemeresı. 1938 jyly Barkölde düniege kelıp, on neşe jasynda köşpen bırge Gimalai asyp, Türkiiaǧa jetken. Qazır Germaniianyŋ Kioln qalasynda tūrady. Europa qazaqtary qauymdastyǧynyŋ negızın qalauşy jäne qūrmettı töraǧasy. Düniejüzı qazaqtary qauymdastyǧynyŋ ekı märte töralqa müşesı bolǧan körnektı qoǧam qairatkerı.
