Abdulmahmud Poşataev – Astana qalasynyŋ tūrǧyny. 1976 jyly 29 qazan künı Oŋtüstık Qazaqstan oblysy Tölebi audany Keŋesaryq eldı mekenınde düniege kelgen. Almaty qalasyndaǧy qazaq tılı men ädebietın tereŋdetıp oqytatyn arnaiy mekteptı bıtırgennen keiın Türkıstandaǧy H.A.Iаsaui atyndaǧy halyqaralyq qazaq – türık universitetınıŋ zaŋ fakultetıne tüsıp, 1997 jyly zaŋger mamandyǧyn alyp şyǧady. 1999 jyldan bastap qūqyq qorǧau organdarynda (prokuratura), aqparat salasynda qyzmet atqaryp keledı.
«Jastyq şaq jyrlary» atty öleŋder jinaǧynyŋ avtory.
Äbeke Qanat degen atpen äleumettık jelılerde köptegen jazbalaryn jariialaidy. Bız bügın zaŋger aqynnyŋ toptama öleŋın oqyrman nazaryna ūsynyp otyrmyz.
KÜZDEGI MUZA
Qandai mūŋdy, qandai näzık küz degen.
Bır tūŋǧiyq mūŋǧa batam küzde men.
Nenı serık etedı eken adamdar
Şyn baqytyn ömır boiy ızdegen.
Jalǧastyryp kündı tünım, tündı mūŋ.
Öleŋ ǧana dem beredı,
Şyndyǧym.
Jūldyzdardy sanap jürgen bala edım,
Kiız üidıŋ syryp tastap tündıgın.
Süienetın jandy tappai,
Tıregın.
Aŋsap kımdı auyrady jüregım?!
E qūdaiym,
Keşıre gör pendeŋdı,
Ömır synaq,
Synap jürsıŋ bılemın.
Syrlas tappai aşyluǧa jüregım.
Iştei tynyp, mūŋǧa batyp jüremın.
Köŋılımdı jabyrqatty jalǧyzdyq,
Taba almadym, bır emın.
AUYL. SAǦYNYŞ
Köz jügırtıp qarasam ötkenıme,
Men tuǧan üi Alatau bökterınde.
Tünerıp tūr kök aspan, kürsınedı,
Qol üzıp ketkenıme ökpelı me?!
Ömırdıŋ tötep berıp ötkelıne.
Qaiyrylyp bır qaradym ötkenıme.
Ol menıŋ jastyq şaǧym qaita oralmas,
Ol menıŋ saǧym bolǧan köktemım be?!
Qimas sezım äurelep keterımde.
Qalyŋ oidyŋ jüremın jetegınde.
Özıŋe ömır boiy qaryzdarmyn,
Paryzyŋdy men bügın ötedım be?!
Adam pende,
Synasa ūnamaisyŋ.
Alladan tek amandyq sūraǧaisyŋ.
Özıŋe, älı talai bererım köp,
Bılemın,
Sen eşteŋe sūramaisyŋ.
Kökpar tartqan elım bar, baptap atyn.
Ömır mynau bap emes, baq şabatyn.
Qasietıŋnen ainaldym, tuǧan ölke
Men senıŋ ūlyŋ bolam maqtanatyn.
MAMYRDA JAUǦAN QAR
Mamyr aiy,
Qys pa, küz be bılmedım.
Künım salqyn,
Qara suyq tünderım.
Mamyrajai maida jauǧan aq qardai,
Süreŋsız bop ötıp jatyr künderım.
Būl tabiǧat nege sonşa qūbyldy,
Ei adamzat joǧalttyŋ ba qūnyŋdy?!
Qūdaiymnyŋ jazasy ma dep qalam,
Mamyrdaǧy qardy körıp bügıngı.
Jatyr ma älde orazada qarasyp,
Qoiu būlttar kök aspanǧa talasyp.
Pendelerım şöldemesın dedı me,
Ystyq künde qatalar dep, jany aşyp.
Qarǧanbaiyq,
Būl da «Jaza» demeşı.
Bır Alla ǧoi barşa älemnıŋ egesı.
Sol Allanyŋ ämırımen barşany,
Saqtap qalǧan Nūq paiǧambar kemesı.
Körseŋ daǧy ömırıŋde mūŋ-qaiǧy.
Medet sūra Täŋır ūlyq, tyŋdaidy.
Bıle bılseŋ, būl jalǧanda şöp basy,
Bır Allanyŋ ämırınsız synbaidy.
Aua raiyn türttı eken ne «Tülen»?!
O tabiǧat, būlqynbaşy ötınem.
Barlyq närse bolsa eken tılegım,
Alla özı jasaǧandai, retımen!
ELIK ǦŪMYR
Jastyq şaq,
Arman quyp elıktırdıŋ.
Bozbala, boijetken bop serık qūrdym.
Qyryqtyŋ qamalyna tūsap qoiyp,
Zymyrap bara jatyr elık ǧūmyr.
Ūşyramai jauyzdyŋ kezdıgıne.
Elıktıŋ köz ılespes lezdıgıne.
Zymyraǧan zamannyŋ lebı dersıŋ,
Minut saiyn jyljyǧan kezdı, mıne.
Bosaǧam
Anam barda berık tūǧyn.
Äkem de baiterek qoi,
Berık tūǧyr!
Sekırıp, sekeŋdep bır bara jatyr,
Köz aldymda ǧaiyp bop, elık ǧūmyr.
Tūz şainaǧam,
Baldy da jalap tūryp.
Ömır tylsym,
Köz ılgem taŋ attyryp.
Uaqyttyŋ maǧynasyn ūǧynasyŋ
Ürke qaşqan elıkke qarap tūryp.
Künge ūsynyp,
Kūşaǧyn qaraŋ atqan.
Allanyŋ är künı haq aman atqan.
Elıktıŋ erkelıgı qandai sūlu,
Uaqytymdy menşıktep bara jatqan.
TABİǦAT TYLSYMY!
Baiau atty aq taŋym, erınşektei
Tüste būlt torlady, kelımsektei.
Aua raiy özgerdı, külıp-jylap,
San qūbyldy,
Köŋılşek kelınşektei.
Tylsym dünie,
Kım qalai ūǧynady?!
Aua raiy nelıkten qūbylady?
Aqşa būlttar köz jasyn syǧyp alyp,
Künnıŋ nūry jauyp tūr şūǧylaly.
Keş batty,
Mūŋdanyp tūr keşı nege?
Taŋǧy şuaq kelmei qap, esıme de,
Arudyŋ köz jasyndai seuıp ötken,
Aq jauyndy baladym, nesıbege!
MIN
Bauyrlarym, menı aiyp etpeŋder!
Oralmaidy kelmes jerge ketkender.
Aduyndy mınezıme şydamai,
Bölekşe oilap,
Terıs qarap ketpeŋder.
Oǧan kuä,
Jaratqan da kök pen jer.
Ösıŋderşı, önıŋderşı, kökteŋder.
Arjaǧymda qara niet joq menıŋ,
Mınez osy…
Sol üşın de sökpeŋder.
Qanaǧaty bar adammyn toiymǧa.
Qatelıgıŋ bolsa eger moiynda.
Qaiǧyŋdy da jüregımen tüsıner,
Öleŋ oqyr,
Janmyn men bır toiyŋda!
Qarapaiym tırşılıgım kündegı.
Maǧan taŋsyq emes taqtyŋ mınberı.
Qanşa asyl bolsaŋ-daǧy, jıgıtsıŋ,
Tabylatyn boiyndaǧy mınderı!
