Kongress-holl körermenge lyq toly. Bärı de bır qyzyqtyŋ bolaryn kütıp otyr. Sahnanyŋ ar jaǧynan dauys estıldı: «Qūrmettı körermender, ūialy telefondaryŋyzdy dybyssyz rejimge qoiudy sūraimyz. Bız konsertımızdı bastaimyz. Bastaimyz… Bastaimyz… Qazır, bastaimyz. Mıne, bastaimyz. Bastaiyq pa?». «İä, bastaiyq» dep körermender äldeqaidan şyqqan dauyspen söilesıp te qoiady, jüzderı jaidary, alaqandaryn aiamai soǧyp, şapalaqtap jatyr. Osylaişa zor qoşemetpen sahnaǧa halyqtyŋ süiıktısı Tūrsynbek Qabatov şyǧyp, Astana qalasy köŋıldı tapqyrlar teatrynyŋ «Äzıl älemı» atty şou konsertı bastaldy.
«Biletterıŋızde «estrada jūldyzdarynyŋ qatysuymen» dep jazylǧan. Uäde etkenımızdei, estrada jūldyzdary öner körsetedı, bıraq būl keştıŋ basty jaŋalyǧy – teatrymyzdyŋ akterlerı käsıbi bişılermen jūptasyp bileidı, al bidıŋ jeŋımpazyn sızder anyqtaisyzdar» dep, Tūrsynbek jinalǧan köpşılıktı «şapalaq metr» ölşeu qūralymen tanystyrdy. Ekranda beinelengen ol ölşeuış körermen şapalaǧyn 50 men 100 ūpai arasynda tırkeidı eken. Teatr ärtısterı – Qairat Ädılgereiūly, Qanat Äljapparov, Baqytjan Qasymov, Erbolat Tölegenov, Amanǧali Sypabekov «Naz» memlekettık bi teatry men Kabare şou «Viva» bişılerımen sahnaǧa şyǧyp, bige degen ikemderın de baiqatty. Alaida, Qanat Äljapparovty biletu oŋaiǧa soqpapty. Onyŋ daiyndyǧyn arnaiy tüsırılgen videorolikten körgen jūrt ışın tartyp küldı, dese de, biıne äbden riza bolǧan olar qazylyq eterde şapalaqtaryn aiamady. Aitqandai-aq, estrada jūldyzdary da sahnanyŋ sänın keltırıp, äuelete än şyrqady. 
Bauyrjan İsaev änın oryndap bolǧan soŋ, Tūrsynbek «senı myqty vokalist deidı ǧoi, bärımızdı taŋǧaldyryp, än oryndaşy» dep qolqa saldy. «Köptegen änşıler fonogrammamen aitady» degen oi äbden sanamyzǧa sıŋıp ketkenı jasyryn emes. Bauyrjannyŋ eş muzykanyŋ süiemeldeuınsız şyǧatyn dauysyn estuge qūmar boldyq. Ol ekı oilanbastan, ataqty «O sole Mio» änın keŋ dauyspen oryndaǧan kezde talantyna tamsana otyryp, ändı ūiyp tyŋdadyq. Sondai-aq, Tamara Asar, Meirambek Besbaev, «Kaspii» toby, Asylbek Eŋsepov önerlerımen halyqty täntı etıp, barşany aldaǧy Täuelsızdık meiramymen qūttyqtap, aq tılekterın aitty. Auditoriiamen bailanys ta qalys qalmady. Äje beinesındegı Erbolat Tölegenov zaldan üş jıgıttı şyǧaryp, «Pensiia kımge būiyrady?» degen baǧdarlama jürgızdı. Barlyq sūraqqa jauap bergen kenje bala äjenıŋ qolynan 4000 teŋge alyp, bır baiyp qalǧan jaiy bar.
«Şapalaq metr» körsetken nätije boiynşa üşınşı orynnan Baqytjan Qasymov pen Qanat Äljapparov, al ekınşı oryn tūǧyrynan Erbolat Tölegenov körındı. Bärınen oza şauyp, Amanǧali Sypabekov 98 ūpaimen alǧa şyqty. Endı olar nauryzǧa josparlanǧan «Äzıl älemınıŋ» kezektı konsertınde finalda bırınşı oryn üşın baq synasatyn bolady. Tūrsynbek jeŋımpazdy arnaiy syilyq kütetındıgın aityp, ülken qyzyqtyŋ şetın şyǧaryp, halyqty elıktırıp qoidy.
«Äzıl älemınıŋ» äzılderı ädettegıdei öte ötımdı, qyzyq, külkılı boldy. Eŋ bastysy, astarynda ülken maǧyna sairap jatyr. Är qaljyŋnyŋ aitar oiy, arqalar jügı äjeptäuır. Abai aitqan «ösek, ötırık, maqtanşaq, erınşek, beker mal şaşpaq» taqyryby, qoǧamdaǧy türlı jaittar, ömırdegı nebır qyzyqtar keŋınen qozǧaldy. Teatrdyŋ tılı tättı, maǧynasy uytty satirasy halyqqa türlı oi salmauy mümkın emes. Ädeiı baqyladym. Sahnada mysal etıp körsetılgen är obrazǧa bıreulerı külse, bıreulerı «iä, ras qoi, solai ǧoi» dep maqūldap, endı bıreulerı ündemei ǧana oiǧa şomyp otyrdy. Iаǧni, būl arsyz külkı emes, küluın külıp alyp, artynan oilandyryp tastaityn maǧynaly külkı bolsa kerek. Tıptı, «Bazar joq» degen atau «Äzıl älemı» bolyp özgerse de, būl teatr öz körermenderın köbeitpese, joǧaltpaǧany anyq.
Mädina JAQYP
