Keşe astanalyq jastardy jūmyspen qamtuǧa septesetın Studenttık qūrylys jäne «Jasyl el» jastar eŋbek jasaqtarynyŋ kezektı mausymy saltanatty jaǧdaida aşyldy. Nauryz aiynda-aq jūmystaryn bastap ketken jastardyŋ eŋbekke yntalary zor. Jiyn soŋynda ştab töraǧasy Ädılbek Bektaşevty äŋgımege tartyp tıldesken edık.
– Jastardyŋ jūmysqa degen yntasy qalai?
– Äzırge jasaq qūramynda üş jüzden asa student bar. Onyŋ ekı jüzdeiın jūmyspen qamtyp ülgerdık. Qabyldau älı de jalǧasuda. Söz oraiynda, on segız ben jiyrma toǧyz jas aralyǧyndaǧy zamandastarymdy bızdıŋ jasaqtyŋ qūramyna şaqyramyn.
2005 jyldan bastap ştab arqyly 7000 myŋǧa juyq student pen jūmyssyz jastardyŋ qolyn şaruaǧa jalǧaǧan edık. Ötken jyldyŋ özınde ekı myŋdai zamandasymyz «ekı qolǧa bır kürek» tapqan-dy. Būl mejenı biyl üş myŋǧa jetkızemız degen josparymyz bar. Būl – bügıngı buynnyŋ jalqaulyqtan ada ekenın körsetedı dep bılemın.
– Qatarlastaryŋyzdy qai salalar boiynşa jūmysqa jıberıp jatyrsyzdar?
– Köpşılıgı elordanyŋ talai ǧimaratyn tūrǧyzǧan «Bazis-A» qūrylys kompaniiasynda jūmys ısteude. Osy tūsta aita keterlıgı, jylda kompaniiaǧa barǧan studentter ärtürlı jeŋıl-jelpı şarualarmen ainalysatyn jäne jalaqylary da mardymsyz bolatyn. Al biyl olar känıgı mamandardyŋ qasynda jürıp üirenıp, tälımın alyp, özı de ortaŋqol maman retınde solarmen bırdei jalaqy alady. Mäselen, elektr dänekerleuşı, sylaqşy, kırpış qalauşy… «Fasad-EKSPO» mekemesı de bırşama jastarymyzdy qabyldady. «Astana ormany» şaruaşylyǧyna tartylǧan müşelerımız de bar. Barlyǧynda da ailyq jalaqy jetpıs myŋ teŋgeden kem emes.
– Jastardy qabyldauǧa ynta tanytyp otyrǧan mekemeler qatary osymen şekteledı me?
– Ärine, joq. Jasaq müşelerın qoǧamdyq tamaqtanu salasyna ornalastyru üşın käsıporyndarmen kelısımder jasaluda. Qyz balalarymyzdy «Arka» meiramhanalar jelısıne jıbermekpız. Būdan basqa, aula aumaqtaryn tazartu boiynşa bırqatar aksiialar ötkızbekpız.
Ashat RAIQŪL