Reseidıŋ Mäskeu qalasynda qoian-qoltyq ūrystan Älem kubogy ötıp, oǧan älemnıŋ 27 elınıŋ sportşylary qatysty. Bairaqty bäsekede Qazaqstan qūramasy sapynda Qaruly küşterı Arnaiy operasiialar küşterınıŋ äskeri qyzmetşısı Arnat Nämetov pen Jandos Madihiianov öner körsetıp, jeŋıstıŋ biık tūǧyrynan körındı. Bız chempiondardy №22750 äskeri bölımınde qarsy alyp, qūttyqtadyq.
Äsker – ömır mektebı. Azamattardyŋ ömırge degen közqarasyn şyŋdap, tärtıpke üiretedı. Otbasyǧa degen süiıspenşılıgın küşeitıp, Otan aldyndaǧy jauapkerşılıgın arttyrady. Sarbazdar taŋerteŋnen kün batqanşa tapsyrma oryndap, fizikalyq küş-quatyn, psihologiialyq mınez-qūlqyn şyŋdaidy.
Äskeri bölımnıŋ tabaldyryǧyn attaǧan sätten-aq osyndai aurany sezındık. Taŋǧy saǧat 07.40-ta sarbazdar sapta tūrdy. Sapta tūryp, ondaǧy jattyǧulardy oryndau – äskeri ädeptılık pen tärtıpke bauludyŋ bırden-bır qūraly. Sarbazdardyŋ saptaǧy komandamen üilesımdı qozǧalysy sergektık pen sezımtaldyqty talap etedı, bärınen būryn, jyldam ärı batyl qimyldauy maŋyzdy. Osyndai körınıstı syrttai baqylap tūrǧanda, chempiondar mıngen avtokölık kelıp toqtady.
Namysty azamattar Nūrdäulet Erjıgıtov, Arnat Nämetov jäne Jandos Madihiianovtı sarbazdar erekşe ıltipatpen qarsy aldy. Äskeri bölımnıŋ komandirı, podpolkovnik Jasūlan Jūmabaev:
– Bızde tarihi sät! Älem kubogynyŋ chempiondaryn qarsy alyp, abyroiymyz artyp, mereiımız tasyp tūr. Būl – tökken ter men üzdıksız eŋbektıŋ nätijesı. Būǧan deiın bızdıŋ sarbazdar Qazaqstan chempionatynda, sosyn TMD elderınıŋ turnirınde bırınşı oryn alyp, özderınıŋ jeŋıske degen erık-jıgerın tanytty. Jeŋıs qūtty bolsyn! Ruhty jauyngerler köbeie bersın! – dep qūttyqtady.
Ras, äskeri adam üşın sport käsıbi daiyndyq tūrǧysynan maŋyzdy, al jekpe-jek arnaiy küşterdıŋ jauyngerın batyldyqqa, tabandylyqqa jäne tözımdılıkke tärbieleidı.
Älem kubogy aiasynda qatysuşylar «özın-özı qorǧau» tehnikasyn körsetıp, sonyŋ ışınde pyşaq pen tapanşadan qorǧanu ädısterın qoldandy. №22750 äskeri bölımınıŋ äskeri qyzmetşısı maior Nūrdäulet Erjıgıtov 90 kelı salmaqta öner körsetıp, qola jüldeger atandy. Ol qoian-qoltyq ūrystarǧa şäkırt baptap, jattyqtyruşylyq qyzmet atqaryp jür.
– Bız maqsatymyzǧa jettık. №22750 äskeri bölımınıŋ äskeri qyzmetşısı, serjant Jandos Madehiianov 57 kelı salmaqta, aǧa serjant Arnat Nämetov 62 kelıde qarsylastarynyŋ osal tūsyn tauyp, Mäskeu törınde jaqsy öner körsettı. Jattyǧu kezınde daiyndaǧan ädısterın sauatty oryndady. Basy ǧana, alda talai bairaqty bäsekeler kütıp tūr, – dedı bapker Nūrdäulet.
1979 jyly Litvanyŋ Kaunas qalasynda ornalasqan 7-gvardiialyq desanttyq diviziiaǧa bekıtılgen sport bazasynda äue-desanttyq äskerlerdıŋ qatysuymen qoian-qoltyq ūrystan bırınşı jarys ötken-dı. 1994 jylǧa deiın qoian-qoltyq ūrys önerı äskeri qoldanbaly sport türınıŋ bırı sanaldy. 1995 jyly Reseide Armiia qoian-qoltyq ūrysynyŋ federasiiasy (FABR) tırkelıp, būqaralyq sipat aldy. 2011 jyly Mäskeude alǧaş ret jekpe-jektıŋ osy türınen älem chempionaty ötıp, sodan berı sport türı retınde damyp keledı.
Arnaiy operasiialyq küşterınıŋ maqtanyştaryn sözge tarttyq. Älem kubogynyŋ iesı Jandos Madehiianov şyǧys jekpe-jek türlerınen jetıstıgı köp, kung-fudan da respublikalyq, halyqaralyq jarystarda jülde alǧan.
– Mäskeude ötken älemdık doda joǧary deŋgeide öttı. Qarsylastarym osal bolmady. Memlekettık Gimndı şyrqatyp qaitqanyma quanyştymyn, – dedı chempion.
Äsker qatarynda da talai chempiondar jür. Olardyŋ sporttyq babynda boluyn ruhani qoldasa, talai jarysta eldıŋ namysyn abyroimen qorǧauǧa daiyn. Bız barǧan äskeri bölımde sarbazdardyŋ sportpen şūǧyldanuyna jan-jaqty jaǧdai jasalǧan eken. Tek yqylas-niet pen erık-jıger bolsa, jetıstıkke jetudıŋ jolyn tabuǧa bolady. Jandos pen Arnattyŋ ülgısı osyǧan dälel…
