Memleket basşysy Qasym-Jomart Toqaev Premer-Ministr Asqar Mamindı qabyldady. Ükımet basşysy Prezidentke biylǧy 9 ai ışındegı elımızdıŋ äleumettık-ekonomikalyq damu qorytyndylary jönınde esep berdı. Qasym-Jomart Toqaevqa bırqatar salada damudyŋ oŋ qarqyny baiqalatyny baiandaldy. Atap aitqanda, öŋdeu önerkäsıbınıŋ ösımı 3,3 %-ǧa jetken, qūrylys kölemı 10,5%-ǧa, tūrǧyn üilerdıŋ paidalanuǧa berıluı 9%-ǧa nemese şamamen 9,6 million şarşy metrge artqan. Auyl şaruaşylyǧyndaǧy ösım körsetkışı 5%-dy qūrady. 1 qazandaǧy mälımet boiynşa, Qazaqstannyŋ altyn-valiuta qory men Ūlttyq qor aktivterı 91,1 milliard dollarǧa jettı.
Ükımet basşysy qyrküiekte qyzmet körsetu salasyndaǧy belsendılıktı qaita qalpyna keltıru jūmystary bastalǧanyn aitty. Osy rette tamyz aiymen salystyrǧanda sauda-sattyq 2,7%-ǧa, bailanys 1,3%-ǧa, kölık jäne qoima 1,2 %-ǧa artqan. Qyzmet körsetu sektoryndaǧy ösım şaǧyn jäne orta biznestıŋ jandanǧanyn bıldıredı. Būl jaŋa jūmys oryndarynyŋ aşyluyna jäne azamattardyŋ äl-auqatynyŋ jaqsaruyna yqpal etedı.
Premer-Ministr 11-12 qazan künderı Abu-Dabi qalasyna jasaǧan jūmys saparynyŋ qorytyndylary turaly esep berdı. Atalǧan sapar barysynda Memleket basşysy Qasym-Jomart Toqaevtyŋ biylǧy qaŋtarda Bırıkken Arab Ämırlıkterıne jasaǧan resmi sapary kezınde qol jetkızgen uaǧdalastyqtardyŋ naqty jüzege asyrylyp jatqanyna köz jetkızıldı. Sonymen qatar ekı el ükımetterı İnvestisiialyq yntymaqtastyq turaly memorandumǧa qol qoidy. Onda qūny 6,1 milliard dollar bolatyn 21 jobany jüzege asyru közdelgen. Atalǧan qūjat joǧary qosymşa qūny bar jäne paidasy mol, sondai-aq ışkı naryqta da, syrtqy naryqta da ülken sūranysqa ie bolatyn öndırıs oryndaryn aşuǧa baǧyttalǧan.
Memleket basşysy ekonomikany damytudyŋ oŋ qarqynyn qamtamasyz etu jönındegı Ükımettıŋ atqarǧan ıs-qimyldaryn atap ötıp, azamattarymyzdyŋ densaulyǧyna, şaǧyn jäne orta biznestıŋ jūmysyna, sondai-aq jalpy ekonomikanyŋ damuyna şetelde keŋ taraǧan koronavirus ındetınıŋ kerı äserın boldyrmau üşın Premer-Ministrge elımızdegı epidemiologiialyq ahualdy qataŋ baqylauǧa aludy tapsyrdy.
