Halqymyzda äiel ūǧymy ärdaiym ardaqty. Oşaqtyŋ jyluy, otbasynyŋ ūiytqysy, ūrpaqty tärbieleuşı sanalǧan. Qyzdy qonaq dep qūrmettep, öz üiıne ūzatqanǧa deiın törge şyǧarǧan. Boi jetkende sänımen, saltanatymen teŋıne qosyp, barǧan jerıŋde baǧyŋ aşylsyn dep batasyn bergen. Tıptı qyzdyŋ balasy dep jienın şekesınen şertpegen. Onyŋ qalaǧan närsesın berıp, erkeletken.
Qazaqtyŋ tarihynda qanşama äielderdıŋ aty altyn ärıptermen ädıptelgen. Olar qoǧamdaǧy öz ornyn bıle otyryp, baiyppen el ısıne aralasqan. Qajet jerınde erlermen tıze qosyp, qolyna qaru alǧan. Balasyna besık jyryn aityp, äldiımen bala jüregın mahabbatqa toltyrǧan.
Bızdıŋ bır erekşelıgımız aǧa buyndy, onyŋ aldyŋǧy ata-babalardy «äjeler instituty» tärbielegen. Onyŋ aiqyn körınısı zaŋǧar jazuşy M.Äuezovtıŋ «Abai jolynda» anyq jazylǧan. Abai Qūnanbaiūlynyŋ tūlǧalyq damuyna anasy Ūljan, äjesı Zerenıŋ ülken ülesı bar.
Jahandanu, jaŋa zaman desek te ılgerıden ırge ajyratuǧa bolmaidy der edım. Öitkenı qazır ertegı aita almaityn äjeler, balasyn äldilemeitın analar, ädepten bezgen qyzdar köbeiıp keledı. Äsırese, elordada. Onyŋ tübınde ana tıldı bılmeu mäselesı jatyr.
Äiel, ana retınde osy jailarǧa jüregım auyrady. Sondyqtan osy ättegen-aiǧa azda bolsa amal jasap, bırşama ısterdı atqaryp jürmız. Nūr-Sūltan qalasy Qazaqstan Halqy Assambleiasynyŋ analar keŋesı ūmytylyp bara jatqan dästürlerdı jaŋǧyrtyp, nasihattauda. «Nomad WOMAN» äielderdıŋ atqa mınu kluby da, «ANA TIME» jäne «Altyn bala» sekıldı äleumettık jobalar otbasy institutyn damytuǧa, osy saladaǧy köptegen mäselelerdıŋ tüiının tarqatuǧa öz septıgın tigızıp keledı.
Köktemnıŋ lebımen kelgen mereke qarsaŋynda aq jaulyqty analarymdy, qatar-qūrbylarymdy, äpke-sıŋlılerımdı qūttyqtaǧym keledı. El ömırındegı orny erekşe jandarǧa jıger, paiym-parasat pen äiel baqytyn tıleimın. Ärqaşan densaulyqtary myqty bolyp, ösırgen ūl-qyzynan qūrmet pen qoşemet köre bersın demekpın.
Altynai TÄŊIRBERGENOVA, Nūr-Sūltan
qalasy Qazaqstan halqy Assambleiasynyŋ analar keŋesınıŋ töraiymy
