Qūrban ait – yrys pen yntymaqtyŋ, qūt pen berekenıŋ meiramy. Osy meiramǧa tän dästürımızdıŋ bırı – aittau. Ökınıştısı sol, aittau degendı bügıngı balalarǧa ülkender dūrys tüsındırmei jür. Özım kuä bolǧan oqiǧany baiandaiyn.
Aittyŋ ekınşı künı daladan üige kırıp kele jatsam, qazaqtyŋ ekı balasy qabattaǧy üilerdıŋ esıkterın qaǧyp, «aittyq» sūrap jür. Ne ıster eken dep, qylyqtaryn baqylap tūrdym. Bır körşı äjei olarǧa bır uys kämpit ūsyndy. Älgıler almai: «Apai, onyŋ ornyna aqşa berseŋızşı!» dep ötınış jasady. Ekınşı bır üidıŋ iesı tiyn berıp jatyr edı, älgıler: «Aqşaŋyz joq pa? Qaǧaz aqşany aityp tūrmyn!» dep özeuredı. Üi iesı sasqanynan üiıne aqşaǧa jügırdı. Bır kezde kezek menıŋ päterıme de keldı. Üiımnıŋ qoŋyrauyn toqtamai basyp, «şyŋǧyrtyp» jatqanynda: «Kımnıŋ balasysyŋdar? Qai jaqtan keldıŋder?» dep sūradym. «Aǧai, ony qaitesız? Odan da bızge aittyqqa aqşa berıŋız!» dep taŋdaiyn taqyldatty säl eresekteuı. Üige şaqyrsam, kırmeitını aidan anyq. Oi, Alla-ai! Sary saitan (ülkender bala künımde aqşany osylai ataityn) bilegen zamannyŋ balasynyŋ bar sūraityny: «Aqşa! Aqşa!».
Ädepsız, teksız qylyq körsetken balalardy jedelsatyǧa deiın şyǧaryp saldym. Qaltamda aqşam bolsa da, bermedım. Bala künımızde ülkenderge erıp, bız de aittaitynbyz. Aittyq sūrau degen dästür bızde bolǧan joq. Eşkımnen aqşa sūramauşy edık. Är aittap barǧan üiden ekı qolymyzǧa toltyryp kämpit ūsynatyn-dy. Soǧan mäz bolyp, qaltamyzdyŋ bärıne toltyramyz. Syimaǧandaryn bır dorbaǧa jinaimyz. Üige kelgen soŋ, basqa bauyrlarymyzǧa ülestırıp beremız. Ülkender bızge eŋ bastysy: «Ait qabyl bolsyn!» degen sözdı aitqyzatyn. Aqsaqaldarǧa sälem berıp, aq batasyn aluǧa üiretuşı edı. Oraza aity men Qūrban aittyŋ qasterlı meiram ekenın sezınetınbız. Al bügıngınıŋ balasynyŋ sanasyna osyny nege sıŋırmeimız? Är üidıŋ esıgın qaǧyp, aqşa sūraǧan (qaiyr-sadaqa sūraǧanmen bırdei) balanyŋ qylyǧyn kım qūptaidy? Sonda qazırgı balalar aittau degendı qaiyr tıleu dep tüsıne me? Janyŋa batatyny, «aittap» jürıp, aqşa sūraityn – özge ūlttyŋ emes, qazaqtyŋ balasy. Būǧan ne deisızder, aǧaiyn?
