ALAIаQTYǦY ANYQTALDY
Elımızde, äsırese, bas qalada baspanaǧa zärulık jyldan-jylǧa artyp otyrǧany belgılı. Osy tūrǧyda jymysqy müddesın közdep, qylmystyq jolmen paida tapqysy keletınder de tabylyp qaluda. Mäselen, jaqynda elordadaǧy «Al Barakat Kompani» JŞS men «Tölendı» tūrǧyn üi qūrylys kompaniiasyna qatysty alaiaqtyq faktılerı boiynşa qalalyq Işkı ıster departamentı qylmystyq ıs qozǧady.
Rasy kerek, osyndai keleŋsız jaǧdailarǧa köbıne adamdar mūqtajdyqtan ūrynady. Sonyŋ ışınde, alaiaqtardyŋ toryna jeke baspanaǧa ie boluǧa ūmtylǧan jas otbasylardyŋ jiı tüsetındıgı de baiqalady. Sondyqtan, ärkım baspana satyp alarda äuelı saqtyq tanytyp, barlyǧyn saralap, sodan keiın ǧana şeşım qabyldaǧany jön. Eŋ bırınşı, baspana satyp aluşylar köp qabatty tūrǧyn üi saluşylardyŋ mynadai qūjattary: jer telımın taŋdau jäne kelısu aktısı, jobalauǧa rūqsat etetın qaulysy, säulet-josparlau tapsyrmasy, Astana qalasynyŋ bas arhitektory bekıtken syzba jobasy, injenerlık jelılerı bar jūmys jobasynyŋ memlekettık saraptamasy jäne qūrylys jürgızu jönındegı qaulysy bar-joqtyǧyn tekserıp alǧandary jön.
Sonymen qatar, qūrylysy aiaqtalmaǧan nysandardan tūrǧyn alaŋdaryn satu üşın qūrylysşy mekemenıŋ joǧaryda körsetılgen qūjattardan basqa üleskerler qarjysyn tartuǧa rūqsaty boluy kerek.
Astana qalasy äkımı apparaty baspasöz qyzmetınıŋ mälımetınşe, apta saiynǧy BAQ saralauy Astanada qūrylysy aiaqtalmaǧan nysandarda şarşy metrlerdı satatyn kompaniialardyŋ bar ekendıgın körsettı (tūrǧyn üidı satu boiynşa BAQ-ta kompaniialardyŋ jarnama ornalastyru jönındegı rūqsat qaǧazynyŋ boluy turaly aqparatty resmi betten qaraŋyz). Būl «QR Tūrǧyn üi qūrylysyna ülestık qatysu turaly» zaŋyna qaişy keledı.
Joǧaryda aitylǧandai, zaŋsyz äreketterdıŋ aldyn alu maqsatynda tūrǧyn üi qūrylysyna ülestık qatysu jönındegı vedomstvoaralyq komissiianyŋ qorytyndylary apta saiyn BAQ-ta jariialanatyn bolady.
Jyljymaityn mülık satatyn saluşylardyŋ rūqsat qūjattarynyŋ boluy turaly aqparat
Saǧi ORAL