Elımızde densaulyǧyna bailanysty jūmysqa tūruǧa mümkındıgı joq adamdardyŋ äl-auqatyn jaqsartuǧa arnalǧan äleumettık jobalar jüzege asyryluda. Keşe QR Premer-ministrınıŋ orynbasary Eraly Toǧjanov elordada sondai jobalar boiynşa nysandardy aralap, qoǧamda öz eŋbegımen ornyn tabuǧa ūmtylyp jürgen erekşe jandardyŋ jūmysymen tanysty.
Vise-ministrdıŋ jūmys kezdesuıne memlekettık organdar ökılderımen qatar Nūr-Sūltan qalasy äkımınıŋ orynbasary Erlan Bekmūrzaev qatysty.
Vise-premer aldymen «Meiırım» köpsalaly medisinalyq ortalyǧyna bardy. Ortalyq el öŋırlerın beinekonferensiia arqyly bırıktıretın telemedisina kabinetınıŋ qyzmetımen erekşelenedı. Sonyŋ arqasynda şalǧai auyldar tūrǧyndary sapaly medisinalyq kömekke qol jetkızse, öŋırlerdegı därıgerler täjıribe almasuǧa mümkındık alady. E.Toǧjanov bastapqy medisinalyq sanitarlyq kömek körsetu boiynşa jūmys ısteitın medisinalyq ortalyqtar qyzmetınıŋ maŋyzyn joǧary baǧalady.
Ärı qarai ol «DOS täuelsız ömır» käsıpkerlık ortalyǧyn aralady. Būl ortalyqta mümkındıgı şekteulı jandardyŋ qalypty ömırge oraluyna jäne azamattyq qoǧamǧa kırıguıne barlyq jaǧdai jasalady. Nysanda eŋbek etetın 28 adamnyŋ 17-sı – mümkındıgı şekteulı jandar. Ortalyq ökılderı oŋaltu tehnikalaryn satu, tehnika men jabdyqtar jöndeitın «İnva-STO» servis ortalyǧy boiynşa şou-rum körsettı. Osyndai jaǧdaiǧa tüsken azamattardyŋ özderı mügedekter arbalaryn daiyndau, olarǧa tapsyrys beru, būzylǧanyn jöndeu üşın jaŋa jobalar jüzege asyryp, ortalyq jūmysyn jetıldırıp otyr. Endı olar özge oblystardaǧy özderı siiaqty jandardy da üiınen alysqa barmai, zum arqyly bärın üirenıp, onlain tapsyrystar beru mäselesın de rettep jatyr. Mıne, olarǧa memleket tarapynan mındettı türde qoldau körsetu kerek. Premer-ministrdıŋ orynbasary ortalyqtyŋ jūmysynda kezdesetın qiyndyqtar men kedergıler turaly sūrap, olardy memlekettık organdarmen bırge qysqa merzımde şeşudı qala äkımdıgı ökılderıne tapsyrdy.
– Ötken jyly äleumettık käsıpkerlık turaly zaŋ qabyldandy. Bügıngı taŋda Memleket basşysynyŋ tapsyrmasymen Ükımette halyq tabysyn arttyru baǧdarlamasy jüzege asyrylyp jatyr. Baǧdarlamanyŋ negızgı maqsaty – ekonomikany industriialandyru jäne ärtaraptandyru, käsıpkerlıktı damytumen ūştastyra otyryp halyqtyŋ tabysyn arttyru jäne nätijelı jūmyspen qamtamasyz etu. Atalǧan baǧdarlamada biudjet qarjysyn halyqtyŋ äleumettık osal toptary men jalaqysy tömen azamattarǧa ädıl bölu jäne olardyŋ aldaǧy uaqytta ekonomikaǧa kırıguın yntalandyruǧa baǧyttalǧan şaralar qarastyrylǧan. Sondyqtan būl baǧdarlama eŋ aldymen, kömekke mūqtaj jandarǧa jaŋa mümkındıkter beredı. Tek qarjy bölıp qana qoimai, kömek aluşylardyŋ äleumettık märtebesın özgertu, jūmyspen qamtudyŋ türlı salalaryna tartu arqyly materialdyq jaǧdaiyn jaqsartu – baǧdarlamanyŋ aldyna qoiǧan mındetı. Sondai baǧyttardyŋ bırı – äleumettık käsıpkerlık, – dedı E.Toǧjanov.
Kelesı barǧan nysan äleumettık osal toptarǧa jatatyn adamdardy oqytyp, jūmysqa ornalastyruǧa baǧyttalǧan «Green TAL» äleumettık käsıporny boldy. Jobaǧa 62 adam tartylǧan bolsa, sonyŋ 53-ı äleumettık osal topqa jatady. E.Toǧjanov Ükımet tarapynan mūndai käsıporyndarǧa jan-jaqty qoldau körsetılıp otyrǧanyn jäne olar tabysy mol tolyqqandy bizneske ainaluy kerek ekenın jetkızdı. Sonymen qatar ol tiıstı memlekettık organdarǧa bölek otyrysta äleumettık käsıpkerlıktı damytumen bailanysty mäselelerdı köterıp, qarastyrudy tapsyrdy.
