Alǧa adymdai beru kerek!
1 qyrküiekte memleket basşysy Nūrsūltan Nazarbaev Qazaqstan Respublikasy Parlamentınıŋ 6-şy şaqyrylymynyŋ törtınşı sessiiasynyŋ aşyluyna qatysty. Elbasy deputattar aldynda söilegen sözınde halyq qalaulylaryn Parlamenttıŋ jaŋa sessiiasynyŋ aşyluymen qūttyqtap, altynşy şaqyrylymnyŋ deputattyq korpusy joǧary käsıbilık körsetıp, Ükımetpen özara üilesımdı yqpaldastyq tanytqanyn atap öttı.
– Parlamenttıŋ üşınşı sessiiasynyŋ qorytyndysy boiynşa 87 zaŋ qabyldandy, sonyŋ ışınde men jariialaǧan «Bes äleumettık bastamanyŋ» tiıstı normativtık qūqyqtyq negızı qalyptasty. Būl alty millionnan astam qazaqstandyqtyŋ äl-auqatyn arttyryp, ösıp-örkendeuımızdıŋ basty şarty sanalatyn halqymyzdyŋ bırlıgın nyǧaituǧa mümkındık beredı, – dedı Nūrsūltan Nazarbaev.
Memleket basşysy elımızdıŋ ekonomikalyq jetıstıkterıne arnaiy toqtaldy.
– Qazaqstandaǧy ışkı jalpy önım 4 paiyzǧa artty, infliasiia 5,9 paiyzǧa tömendedı, investisiia kölemı 24 paiyzǧa östı. Ekonomika men qoǧamnyŋ tiımdı jaŋǧyruyna qajettı jaǧdailar jasaluda. Bız byltyrdan bastap ekonomikanyŋ älemdegı ortaşa damu qarqynynan oza bastadyq. Öŋdeu önerkäsıbı, kölık jäne qyzmet körsetu salalary siiaqty şikızattyq emes sektorlar ekonomikalyq ösımnıŋ qozǧauşy küşıne ainaldy, – dedı Qazaqstan Prezidentı.
Elbasy ärı qarai däiektı äleumettık-ekonomikalyq damu üşın sapaly zaŋ şyǧaru jūmysyn jalǧastyru qajet ekenın aitty.
– Özın-özı jūmyspen qamtyǧandardy medisinalyq jäne äleumettık saqtandyru, sondai-aq zeinetaqymen qamtu jüiesıne tartu – maŋyzdy mäselelerdıŋ bırı. Tiıstı özgerısterdı osy jyldyŋ soŋyna deiın qabyldau qajet. Būl, äsırese, mındettı äleumettık medisinalyq saqtandyru jüiesıne köşu, medisinalyq kömektıŋ kepıldık berılgen kölemınıŋ jaŋa modelın engızu, qoǧamdyq densaulyq saqtau mäselelerın jäne medisinalyq mekemelerde korporativtık basqaru jüiesın jetıldıru jūmystaryna bailanysty bolǧandyqtan asa özektı sanalyp otyr, – dedı Nūrsūltan Nazarbaev.
Memleket basşysy qūrylystyŋ qarqyndy damuyna bailanysty tūrǧyn üi-kommunaldyq şaruaşylyǧy salasynda tūrǧyndardy qanaǧattandyrmaityn tüitkıldı mäselelerdıŋ bar ekenın atap ötıp, jalpy üi şaruaşylyǧy basqarmasynyŋ tüsınıktı ärı tiımdı jüiesın qūru kerektıgın, sonymen qatar, būl jüienıŋ qyzmet körsetuşı kompaniialar men tūrǧyndar arasyndaǧy qarym-qatynastyŋ aşyqtyǧy qaǧidatyna, sondai-aq qarajat şyǧyny men monopolisterdıŋ jauapkerşılıgın baqylauǧa negızdeluı tiıs ekenın aitty.
Nūrsūltan Nazarbaev orta jäne şaǧyn biznestı damytu barysyndaǧy oŋ ürdısterge toqtalyp, turizm salasynyŋ käsıpkerlıktı damytuǧa tyŋ serpın beruı qajet ekendıgın atap öttı.
– Ükımetke Turizmdı damytudyŋ 2023 jylǧa deiıngı memlekettık baǧdarlamasyn äzırleu tapsyryldy. Būl qūjat jyl soŋyna deiın qarastyrylyp, qarjylyq tūrǧydan qajettı zaŋnamalyq baza arqyly bekıtıluge tiıs. Sonymen qatar, Parlamentte memlekettık satyp alu jäne kvazimemlekettık sektor üşın satyp alu mäselelerıne qatysty zaŋ jobasy bar. Osy qūjat atalǧan prosestı jeŋıldetuge, onyŋ tiımdılıgın arttyruǧa, sybailas jemqorlyq qaterın tömendetuge, basym baǧyttardy ıske asyru üşın qarjy böluge jäne biznes ahualyn jaqsartuǧa mümkındık beredı, – dedı Qazaqstan Prezidentı.
Memleket basşysy agroönerkäsıp keşenı salasyndaǧy zaŋnamany, sonyŋ ışınde saqtandyru, agrarlyq qolhattardy engızu, nesielık serıktestıkterdı damytu, sondai-aq veterinariia salasynda baqylau jüiesın oŋtailandyru mäselelerın odan ärı jetıldıru qajettıgıne toqtaldy.
– Qoǧamdyq sanany jaŋǧyrtuǧa arnalǧan «Ruhani jaŋǧyru» baǧdarlamasynyŋ maŋyzdy mındetterınıŋ bırı tarihi-mädeni mūrany saqtap, keŋınen tanytudy qamtamasyz etu bolyp sanalady. Tiıstı zaŋ jobasyn qabyldau üzdık älemdık täjıribege säikes tarihi ärı kielı nysandardy tiımdı damytuǧa, qorǧauǧa septıgın tigızedı, – dedı Nūrsūltan Nazarbaev.
Şymkentke respublikalyq maŋyzy bar qala märtebesı berıluıne jäne Türkıstan oblysynyŋ qūryluyna bailanysty Qazaqstan Prezidentı Parlamenttıŋ qarauyna qaita qūrylǧan äkımşılık-aumaqtyq bırlıkterdıŋ tolyqqandy jūmysyn qamtamasyz etuge baǧyttalǧan zaŋ jobalary engızıletının jäne olardyŋ şūǧyl qaralyp, qabyldanuy kerektıgın aitty.