Keşe elorda äkımdıgınde Prezident Q.Toqaev ötkızgen Ükımettıŋ keŋeitılgen otyrysynyŋ qorytyndylary boiynşa qala aktivınıŋ mäjılısı öttı. Nūr-Sūltan qalasynyŋ äkımı Altai Kölgınovtıŋ töraǧalyǧymen ötken jiynda Memleket basşysy memlekettık organdar aldyna qoiǧan jaŋa mındetter saralanyp, bas şahardy damytudyŋ mejelerı belgılendı. 
QOǦAMDYQ QATYNAS JAŊA SATYǦA KÖTERILEDI
– Qazaqstan Prezidentı Qasym-Jomart Toqaev memlekettıŋ basty mındetı halyqtyŋ äl-auqatyn köteru ekenın aitty. Aǧymdaǧy jyly el tūrǧyndarynyŋ, sonyŋ ışınde äleumettık älsız toptardyŋ tabysyn arttyru boiynşa naqty ıster qolǧa alyndy. 1 mausymnan bastap bırqatar biudjettık sala qyzmetkerlerınıŋ jalaqysy 30 paiyzǧa östı. Mūndai şeşım josparlanǧan merzımnen bır ai būryn qabyldandy. 1 säuırden atauly äleumettık kömektı körsetu ölşemı özgerdı. Būl qadam AÄK aluşylardyŋ sanyn üş esege arttyruǧa mümkındık berdı.
Prezident halyqty nätijelı jūmyspen qamtu ısıŋ oŋtailandyrudy tapsyrdy. Qazırgı kezde bilık pen halyq arasyndaǧy qarym-qatynasqa jaŋa täsılder kerektıgı jiı aityluda. Qaladaǧy qoǧamdyq qatynastardy jaŋa satyǧa köteru üşın qarapaiym qatynasty, halyqpen bailanysty jolǧa qoiuymyz qajet. Aşyqtyq, tūrǧyndarǧa esep berudıŋ jaŋa ädısterın engızu talap etılude. Aldymyzǧa biudjet şyǧyndarynyŋ tiımdılıgın arttyru mäselesı qoiylyp otyr. Prezident būǧan qoǧamdyq keŋester, mäslihattar atsalysuy qajettıgın atap öttı, – degen Altai Kölgınov jiyrma bır jyldyq tarihynda elordamyz äleumettık-ekonomikalyq jaqsy körsetkıştermen osy künge jetkenın, aldaǧy uaqytta da auqymdy jospar qūrylyp, astanamyz – Nūr-Sūltan qalasynyŋ damuy jolyndaǧy igılıktı ıster jalǧasa beretının aitty.
EKINŞI İNDUSTRİALDY PARK QŪRYLADY
Käsıpkerlıktı ekonomikanyŋ qozǧauşy küşıne ainaldyru turaly Qazaqstan Prezidentınıŋ tapsyrmasyn eske salǧan qala basşysy aimaqtarda bizneske qolaily jaǧdailardy tudyruǧa basymdyq berıletının atap öttı. Osy oraida elordadaǧy İndustrialdy park jūmysyna toqtaldy. Nysan boiynşa öte köp jūmys jasalyp, investisiialar tartylǧanyn, qazırgı kezde park aumaǧy 95 paiyzǧa tolǧanyn, jaŋa öndırıs oşaqtaryn aşu üşın ekınşı İndustrialdy parkty qūru mäselesı qaralyp jatqanyn jetkızdı.
– Jaŋa jobalar eksportqa baǧyttalyp, olardyŋ qosymşa qūny joǧary boluy tiıs. Būdan būryn ıske qosylǧan jobalar jūmysyna qatysty mäseleler bar. Olardyŋ köpşılıgı, tıptı, toqtap tūr. İndustrialdy parktegı 49 käsıporynnyŋ 10-y memlekettık tapsyrys boiynşa, tapsyrystyŋ tüsu mölşerıne säikes jūmys ıstep jatyr. 2017-2018 jyldary ıske qosylǧan 12 joba şamamen alǧanda 10 paiyzǧa jūmys ısteude, – degen A. Kölgınov İnvestisiialar jäne käsıpkerlıktı damytu basqarmasyna industrialandyrudyŋ är jobasy boiynşa egjei-tegjeilı saraptamany jasap, olardy jobalyq quattylyǧyna şyǧarudyŋ jäne käsıporyndarǧa jan bıtırudıŋ Jol kartasyn äzırleudı tapsyrdy.
TURİZMNIŊ DAMUY ZOR ÄLEUETKE İE
«Qarapaiym zattar ekonomikasynyŋ» äleuetın barynşa paidalanu kerektıgın aitqan qala basşysy osy künderı qalada tiıstı ekı joba ǧana maqūldanǧanyn, būl öte tömen körsetkış ekenın jetkızdı. Osy mäsele boiynşa alda «Atameken» Ūlttyq käsıpkerlık palatasymen bırlesıp jūmys jürgızıletının aityp, İnvestisiialar jäne käsıpkerlıktı damytu basqarmasyna būl mäselege de qatysty bırqatar mındetter jüktedı.
– Turizm salasynyŋ damuy zor äleuetke ie. Onda nätijelı jūmyspen qamtu men qūrylymdyq ärtaraptandyrudyŋ mındetterı bır mezgılde şeşıledı. Bızge medisinalyq, bılım beru, mädeni, sporttyq jäne ıskerlık turizmdı damytudy ärı qarai jalǧastyru kerek. Ol üşın qala infraqūrylymy daiyn. Tiıstı qonaqüiler, ǧimarattar özge de qūrylystar bar. Halyqaralyq ıs-şaralardy ötkızu boiynşa täjıribenı jinaqtadyq. Älemdık arenada turizm ortalyǧy retınde elordany nasihattau özektı mındet bolyp otyr, – dedı A. Kölgınov.
KÄSIPKERLIK JOBALARDYŊ TİIMDILIGI TEKSERILEDI
Memleket basşysynyŋ otandyq bizneske kedergı keltıru üşın jauapkerşılıktı qataitu, tıptı qylmystyq jauapkerşılıkke tartu turaly tapsyrmasy turaly aitqan qala äkımı Prezident bırqatar memlekettık- jekemenşık ärıptestık jobalaryn jüzege asyrudy synaǧanyn eske saldy.
– Qazırgı künge qala äkımdıgı 12 joba boiynşa 9 kelısımşartqa otyrdy. Toǧyz joba boiynşa 37,5 milliard teŋgege mındettemeler qabyldandy. Bızge barlyq memlekettık-jekemenşık ärıptestık jobalaryn saraptaudan ötkızu kerek. Olardyŋ biudjetke jäne äleumettık-ekonomikalyq tiımdılıgı tekserıluı qajet, – dedı A. Kölgınov.
Elorda jaqyn ornalasqan auyl şaruaşylyǧymen ainalysatyn öŋırler üşın maŋyzdy röl atqaratynyn aitqan qala basşysy ırı naryq aimaqtar fermelerı üşın draiver bolyp otyrǧanyn aityp öttı. Öz kezegınde elorda üşın azyq-tülık qauıpsızdıgın qamtamasyz etu, kölıktık-logistikalyq infraqūrylymdy damytu, azyq-tülıkke infliasiiany tömen deŋgeide ūstau maŋyzdy bolyp otyrǧanyn jetkızıp, auylşaruaşylyǧy järmeŋkelerın ūiymdastyru, merdıgerlersız sauda alaŋdaryn keŋeitu boiynşa tiıstı tapsyrmalardy jüktedı. Būǧan qosa, jerdı nätijelı paidalanu turaly, su resurstary boiynşa söz qozǧap, osy mäselege jauapty orynbasarlaryna tapsyrma berdı.
ASTANA LRT JOBASY NE BOLADY?
Tūraqty ekonomikalyq ortany qalyptastyru turaly aitqan qala basşysy investisiialardy tartu jūmysyn belsendırıp, ırı investisiialyq jobalardy aiaqtau üşın jaǧdailardy tudyrudy tapsyrdy.
– Är investormen jeke jūmys ısteuımız kerek. Maqūldanǧan investisiialyq jobalar boiynşa şeteldık investorlarǧa arnalǧan jer men qajettı infraqūrylymǧa qatysty mäseleler şeşıluı tiıs. «Abu-Dabi Plaza» jobasy boiynşa da infraqūrylymdyq mäseleler şeşımın tabuy tiıs» dedı qala basşysy.
Taǧy bır tüitkıl tudyrǧan Astana LRT jobasyna toqtalǧan A. Kölgınov Memleket basşysy jobanyŋ qymbattylyǧy, jeŋıl relstı jelını salu tiımdılıgı mäselelerın qozǧap, mamandar men säuletşılerdıŋ pıkırlerı esepke alynbaǧanyn aitqanyn eske saldy.
– Osy mäsele boiynşa qazır Ükımetpen bırıgıp jūmys ıstep jatyrmyz. Joba qūnyn oŋtailandyruǧa qatysty belsendı jūmysqa kırıstık. «Astana» bankınde jatyp qalǧan LRT-nyŋ bükıl qarjysy memleketke qaitaryluy tiıs, – dedı būl turaly A. Kölgınov.
TŪRǦYNDARDY ÄLEUMETTIK QOLDAU TOQTAMAIDY
Tūrǧyndardy äleumettık jaǧynan qoldauǧa toqtalǧan qala basşysy elordada Atauly äleumettık kömek jaŋa format boiynşa 5209 otbasyǧa, sonyŋ ışınde 31254 adamǧa tölengenın aitty. Būǧan bölıngen 944,8 mln teŋge ielerın tapty.
Elorda äkımınıŋ aituynşa, osy jyldyŋ basynan 9200-den astam jaŋa, tūraqty jūmys orny qūryldy. «Eŋbek» memlekettık baǧdarlamasy arqyly 11 myŋnan astam adamdy jūmyssyzdyqtan aryltu josparda bar.
Ömırlık qiyn jaǧdailarǧa tap bolǧan azamattardy anyqtau maqsatynda 1 säuırden bastap astananyŋ ärbır tūrǧynyna äleumettık karta äzırlenude. Äsırese äleumettık az qamtylǧan, köpbalaly otbasylardy, jalǧyzbasty analardy jäne mügedek bala tärbielep otyrǧan otbasylarǧa erekşe köŋıl audaruymyz qajet.
– Zertteu qorytyndysy körsetkendei, negızgı äleumettık mäsele tūrǧyn üimen qamtuǧa tırelıp tūr. Baspana kezegıne 46829 adam tırkeldı. Olardyŋ ışınde köpbalaly otbasylardyŋ sany – 3501. «Nūrly jer» memlekettık baǧdarlamasy boiynşa 24 köpbalaly otbasy baspanamen qamtyldy. Biyl kommunaldyq tūrǧyn üi qorynan 1634 päter bölemız. Onyŋ 731-ı arendalyq üi, sonyŋ ışınde 233-ı köpbalaly otbasyna tiesılı, – dedı qala basşysy.
Onyŋ aituynşa, biyl barlyǧy 1500 tūrǧyn üi sertikatyn beru josparlanuda. Onyŋ 1 myŋy köpbalaly, tolyq emes, mügedek balalary bar otbasylarǧa, 500 sertifikat bılım, densaulyq saqtau jäne Polisiia departamentıŋ qyzmetkerlerıne berıledı. «Baqytty otbasy» baǧdarlamasy jüzege asa bastaidy.
– Memleket basşysy mügedektıgı bar azamattardy qoldau jüiesın küşeitudı tapsyrdy. Jasyratyny joq, Elordada mümkındıgı şekteulı azamattardyŋ qoǧamǧa beiımdelıp, äleumettenuı mäselesınde kemşın tūstar älı de jetkılıktı. Is-şaralar josparyna säikes, mümkındıgı şekteulı jandar üşın qoǧamdyq kölıkterde, ǧimarattar men nysandarda jaily jaǧdai jasau jūmystary jürgızılude. İnkliuzivtı bılım beru mäselesıne erekşe köŋıl audaru qajet, – dedı A. Kölgınov.
JAS JŪMYSŞY OTBASYLARǦA BASPANA BERILEDI
Jastar jylynyŋ aiasynda qalada 136 joba jäne 600 ıs-şarany qamtityn qalalyq Jol kartasy jüzege asyryluda. Jastardy äleumettık tūrǧyda qoldauǧa baǧyttalǧan şaralar belsendı jürgızılıp, jyldyŋ aiaǧyna deiın 350 jūmysşy jas otbasyna baspana beru josparlanyp otyr. Būl maqsatqa respublikalyq biudjette qarjy qarastyrylǧan.
– Jastar jylynyŋ igılıgın eŋ aldymen jastar köru kerek. Daiyn asqa tık qasyq demei, öz jūmysyn tabuǧa kömek körsetu qajet. Jastar jyly Volonterlar jylymen jalǧasatyn bolady. Oǧan qazırdıŋ özınde daiyndalyp, qaladaǧy volonterlık qyzmettı damytu şaralaryn qarastyramyz. Būl rette, tek mädeni jäne sporttyq şaralarmen ǧana şektelıp qalmauymyz qajet. Jastardyŋ potensialyn damytu jäne qoǧamdaǧy bar problemalardy şeşu boiynşa egjei-tegjei josparymyz bolu kerek, – dedı būl turaly qala basşysy.
Sondai-aq, A. Kölgınov eŋbek qatynastary, tūrǧyn üi qūrylysy, ekologiia, bılım jäne densaulyq saqtau salalaryn nyǧaitu josparlaryna toqtaldy. Äkımnıŋ baiandamasynan keiın qalalyq qoǧamdyq keŋes töraǧasy Sansyzbai Esılov bastaǧan bırqatar adamdar äkımge öz ūsynystaryn jetkızdı. Qala basşysy olardy mūqiiat tyŋdap, barlyq ūsynystar qabyldanatynyn aitty.
