Äuejaidyŋ tynys-tırşılıgımen tanysqannan keiın Memleket basşysy N.Nazarbaev jaŋadan aşylǧan «Nūrly jol» vokzalyn aralap, keşennıŋ mümkındıkterımen tanysty. Elbasynyŋ aituynşa, atalǧan vokzal TMD elderı arasynda teŋdesı joq nysan bolyp sanalady.
– Men Astananyŋ maqtanyşyna ainalatyn jaŋa nysandardy aralap jürmın. Būl – 3,2 mln adamǧa qyzmet körsetıp jürgen jäne 2025 jyly 8 mln adamdy qamti alatyn äuejai. Biyl jäne bolaşaqta qyzmet körsetu sapasy artyp, müldem basqa bolady. Bükıl Europa men Aziiany aralauǧa mümkındık beretın jaŋa äue marşruttary aşylyp jatyr. Myna vokzal da postkeŋestık keŋıstıkte jalǧyz. Sızder bılesızder, bız Qazaqstannyŋ barlyq öŋırlerın jyldamdyǧy joǧary «Talgo» poiyzdarymen jalǧadyq, – dedı Memleket basşysy.
«QTJ» ŪK» AQ Vokzal şaruaşylyǧyn damytu jäne paidalanu departamentınıŋ direktory Jūban Körpebaevtyŋ aituynşa, vokzaldyŋ jalpy aumaǧy 126 myŋ şarşy metrdı qūraidy. Sondai-aq, ol alty joldyŋ toraby kırıp otyrǧan bekettıŋ täulıgıne 35 myŋ jolauşyny qabyldai alatynyn atap öttı.
– Vokzal jolauşylar aǧynyn, kezegın, qauıpsızdıgın, elektrondy bilet satu prosesın intellektualdyq basqaru jelısımen qamtylǧan. «Vokzal resmi türde bügın aşylǧanymen, ıs jüzınde 1 mausym künı alǧaşqy jolauşylar jolǧa şyǧady. Poiyz marşruttary men uaqyty bekıtıldı. Jolauşylar bilet satyp alarda aldyn ala aqparattandyryldy. Bırınşı jäne ekınşı qabatta 740 kölıkke arnalǧan avtotūraq bar. Sonymen qatar, ol jerde qyzmettık-texnikalyq bölmeler ornalasqan. Üşınşı qabatta – şatyr astynda perron oryn tepken. Törtınşı qabat eŋ negızgı bolyp sanalady. Mūnda basty kıreberıs pen 10 bilet kassasy, anyqtama biurosy, sauda oryndary bar. Besınşı qabatta fud-kort ornalasqan. Altynşy qabatta äkımşılık keŋseler bolady, – dedı ol.
Sondai-aq, ol vokzaldyŋ qauıpsızdıgıne köp köŋıl bölıngenın aitty. Mäselen, ǧimaratta adamdardy tekserısten ötkızetın 16 kıreberıs bar. Onyŋ üstıne aqyldy jüiemen basqarylatyn 510 kamera ornatylǧan. Jūban Körpebaevtyŋ aituynşa, eskı vokzal tranzittık poiyzdardy jäne qala maŋyndaǧy audandarǧa qatynaityn belgılı bır poiyzdardy qabyldaidy. Al bügınnen bastap «Nūrly jol» vokzaly Astanaǧa deiın keletın poiyzdardy qabyldap, şyǧaryp salady.
Serık JOLDASBAI
