Men osy mekemenıŋ tabaldyryǧynan attaǧanyma ekı aidan endı ǧana asty. Mekemenıŋ atauy – Astana qalasy äkımdıgınıŋ «Şarapat» äleumettık qyzmet körsetu ortalyǧy» kommunaldyq memlekettık mekemesı.
Mekemenıŋ köp jyldan bergı, atap aitqanda, 2003 jyldan bastap direktory, bügınde zeinetkerlık jasqa tolyp otyrǧan Kenjebolat Saparūly Bäpışev – özı ırgesın qalasqan abyroily mekemenıŋ «ystyǧyna küiıp, suyǧyna toŋyp jürgen azamat». Eŋbek jolyn ūstazdyqtan bastap, mektep direktorlyǧyn atqaryp körgen jıgıttıŋ bırden qarttar men mügedekter üiınıŋ direktorlyǧyna qadam basuy täuekeldıŋ ısı edı. Mäsele mūnyŋ bır qol jetpeitın mansap ekendıgınde emes, ūstazdyq pen tälımgerlıktıŋ san aluan mektebınen ötken, ömırdıŋ san aluan tauqymetın tartyp, aryp-aşqan, äbden qajyǧan, şarşaǧan, köptı körgen qart adamdardyŋ aldynda ūstazdyq körsetu degenıŋız qiynnyŋ qiyny bolatyn. Osynda tap bügıngı künı ömır sürıp jatqan 334 adamnyŋ 334 türlı problemasy bar.
Kenjebolat Saparūly taǧdyry san türlı tälkekke ūşyraǧan kärıp jandardyŋ bırıne aǧa, bırıne ını bolǧanymen, bärımız üşın ol – äkedei. Öitkenı ol Ūly Otan soǧysynyŋ ardagerlerıne de, solarǧa teŋestırılgenderge de, soǧys kezınde tylda eŋbek etken ardagerlerge de, jastai arbaǧa taŋylǧan bozdaqtarǧa da qamqorşy bola bıldı.
Kenjekeŋ osy jūmysqa kırıspes būryn aqyl sūrai barǧanda anasynyŋ: «Balam, sender menı baǧyp-qaǧyp, bar jaǧdaiymdy jasap otyrsyŋdar. Sen ülken jauapkerşılıktı talap etetın auyr jūmysqa bet alǧan ekensıŋ. Men bır amanat aitaiyn, jaryǧym: «Eger sol kısılerdı menı kütkendei küte alsaŋ, onda sol jūmysqa bar. Eger ıstei almasaŋ, doǧar» degenı bar. Qūdaiǧa şükır, Kenjebolat Saparūly anasynyŋ osy amanatyn mınsız atqaryp keledı. Būǧan onyŋ Ükımet tarapynan, ministrlıkter men qalalyq äkımdık tarapynan alǧan nagradalary, marapat hattary men alǧys kuälıkterı aiǧaq bola alady. Onyŋ bärın tızbektep jatpadyq.
Jalpy sany 400 adamǧa arnalǧan būl mekemede qazır ştat boiynşa 220 adam jūmys ısteidı. Olardyŋ qatarynda sanitarlar da, därıgerler de, äleumettık qyzmet körsetu salasynyŋ qyzmetkerlerı de, psihologtar da, medbikeler de, kütuşıler de bar. Bärınıŋ jūmystary bastarynan asady. Tösek tartyp jatqan I jäne II toptaǧy mügedekterge bes mezgıl as daiyndau, tamaqtandyru, ydys-aiaqtaryn juu, tösek oryndaryn auystyryp tūru, bölmelerın mūntazdai qyp tazalau, özdıgınen jüre almaityndardy arbaǧa otyrǧyzyp seruendetu, üstı-bastaryn tazalap, juyndyryp-kiındıru, aiaq astynan auyryp qalǧandai bolsa, jedel järdem şaqyrtyp, emhanaǧa alyp baryp, alyp kelu, tıptı jaman aitpai jaqsy joq, köz jūma qalsa, mäiıthanaǧa alyp baru – osy joǧarydaǧy atalǧan qyzmet körsetuşılerdıŋ moinynda. Osynyŋ bärı darhan jürektı basşynyŋ asqan kışıpeiıldılıgın, qaiyrymdylyǧyn, keŋdıgın, qarapaiymdylyǧyn körsetse kerek. «Jinalys zalyna, ashanaǧa täuır kiımderıŋmen baryŋdar. Daiaşylarǧa taŋerteŋ – «Qaiyrly taŋ!», as ışken soŋ «däm-tūzdaryŋyzǧa raqmet» deudı ūmytpaŋyzdar» dep eskertıp otyratynyn talai ret estıdım. İä, bır auyz jyly sözdıŋ özı janyŋa jylu beredı.
«Şarapat» ortalyǧy bes bloktan: äkımşılık-basqaru blogı, «B» blogı, «V» blogı, «G» blogı men «D» blokterınen tūrady. Bärınıŋ ashanasy ortaq bolǧanymen, är bloktıŋ, är qabattaǧy tūrǧyndardyŋ öz qonaq bölmelerı, özderınşe as daiyndap ışetın oryndary taǧy bar. Mūnda kırgen adam bır-bırımen jalǧasqan osy blokterdıŋ bärın aralap şyǧa alady. Är blogyŋyz – üş qabatty üi. Olardan basqa mäjılıs zaly, kıtaphana, kiım tıgetın şeberhana, şaştaraz, sport zaly, toǧyzqūmalaq, şahmat, doiby, biliard üstelderı, därıgerlık kabinetter, hoş iıstı ösımdıkter ösıp tūrǧan zal taǧy bar.
Endı osynyŋ bärın üilestırıp otyrǧan äkımşılık qyzmetkerlerın atap ötkennıŋ eş artyqtyǧy bolmas dep oilaimyn. Būl rette direktordyŋ äleumettık jūmys jönındegı orynbasary Ardaq Beisenbaiqyzy Seiıtovany, direktordyŋ äkımşılık jäne şaruaşylyq jönındegı orynbasary Janar Nūrkeşqyzy Esenamanovany, medisina bölımınıŋ meŋgeruşısı Bolatbek Mūsahanovtyŋ tabandy da tyŋǧylyqty jūmysy erekşe atap ötuge laiyq.
Al Astanadaǧy qalalyq, audandyq äkımdıktermen, ärtürlı mädeniet oşaqtarymen, oqu oryndarymen tynymsyz bailanys jasap, köŋıldı seruender, tälımgerlık kezdesuler, oiyn-sauyqtar ūiymdastyruda aldaryna jan salmaityn, jūmysqa bar yqylasymen berılgen äleumettık jūmys jönındegı maman Säule Qazbekqyzy Qaiyrovany, kün demei, tün demei tynym körmeitın sanitarlar Zäureş Erjanovany, Qalamqas Baidauletovany, Säule Sadvakasovany, Äziza Mahmetovany qalai maqtasaŋ da artyq bolmaidy. Äŋgıme maqtauda emes, maqtauǧa laiyqty ıs atqaryp jürgendıkterınde bolyp otyr-au.
Al endı osy üidıŋ dünie jihazdarynan bastap tösek oryndaryna deiın tügendep, bütındep, qamtamasyz etıp otyratyn Aidana Esşanova men onyŋ ornyn jaŋa ǧana basqan Maral Junusovanyŋ eŋbekterı müldem bölek. Baryŋdy jarastyryp, joǧyŋdy tauyp berıp otyratyndar da osylar.
«Şarapat» äleumettık üiınıŋ ömırden köp qaǧaju körıp, ümıtterı üzıluge şaq qalǧan beikünä jandarǧa jasap otyrǧan jaqsylyqtarynyŋ bärın aityp jetkızu mümkın emes. Mäselen, kündızdı qoiyp, tünımen şekara küzetken saqşylardai köz ılmei qyzmet etetın medbikeler Nataşa Şaimerdenova men Nūrgül Naiypovanyŋ eŋbegıne riza bolasyŋ.
Äleumettık qyzmet körsetu ortalyǧy bolǧandyqtan, būdan ekı ai būryn mūnda keludıŋ jeŋıldetılgen jaŋa türı aşyldy. Ol kündızgı jartylai stasionar dep atalady. Mekemege ornalasqan qariia taŋerteŋ kelıp, keşkısın qaityp ketedı. Üş mezgıl tamaǧyn osynda ışıp, tūrǧyndarǧa körsetıletın qyzmet türlerın tügeldei qabyldaidy, uaqyttaryn qyzǧylyqty ötkızedı.
Mūnda, basqany aitpaǧanda, keşegı quǧyn-sürgın qūrbandary da pana tauyp otyr. Aityp otyrsa, olardyŋ bastan keşırgen qasıretın jūmyr basty adamǧa bermesın. Kenjebolat Saparūly basqaratyn ūjym sonyŋ bärıne asqan qamqorlyqpen, jauapkerşılıkpen qaraidy.
Baiaǧyda anasynyŋ aitqan amanaty da osy emes pe edı?! Jany jaraly, jüregı şarşauly qarttardy, kembaǧaldardy menı kütkendei küte bıl, demeu bol demep pe edı? Kenjebolat Saparūly anasynyŋ osy ösietın ūmytpai, boitūmardai saqtap, tolyǧymen aqtap jür.
Mätkerım ÄKIMJANOV,
Qazaqstan Jazuşylar odaǧynyŋ müşesı
