Elordanyŋ Tılderdı damytu jäne arhiv ısı basqarmasy janyndaǧy «Ruhaniiat» mekemesı «Ana tılım – ardaǧym» atty ruhani-taǧylymdy keş ūiymdastyrdy.
Memlekettık tıldıŋ märtebesın arttyryp, qoǧamdyq ömırdıŋ barlyq salalaryndaǧy qoldanys aiasyn keŋeitu, eldık qasietter men otbasylyq qūndylyqtardy, ūlttyq tälım-tärbienı ana tılı arqyly otandastarymyzdyŋ sanasyna sıŋıru maqsatyn közdegen keşte tılımızdıŋ saiasi-äleumettık ortadaǧy qazırgı baǧyty men keleşektegı damu örısı baǧamdaldy. Är şaŋyraqtan bastap qūzyrly memlekettık mekemelerde onyŋ qoldanyluynyŋ tüitkıldı mäselelerı ekşeldı. Bügıngı jaHandanu däuırındegı qazaqi bolmys pen ūlttyq bıregeilıktı saqtaudaǧy ana tılınıŋ maŋyzy baiyptalyp, el azamattarynyŋ osynau kelelı ısterdegı jauapkerşılıgı oi talqysyna salyndy.
Ūlttyq ūiysu men halyqtar dostyǧyn nyǧaitudaǧy qazaq tılınıŋ tūǧyry turaly pıkırler ortaǧa salyndy. Tıl mädenietı, tıl tazalyǧy, tıl üilesımınıŋ tüiındı taqyryptary, tälımdık mäselelerı saralandy. Qazaq tılınıŋ qazırgı zamanaui tehnologiialyq ürdıster jüiesındegı orny turaly söz qozǧaldy.
Ruhani ıs-şara barysynda ūlt qairatkerlerı men ziialylarynyŋ qazaq tılınıŋ jasampazdyǧyna, ömırşeŋdıgıne qatysty aitqan sözderı sahnalyq körınıs arqyly berılıp, aqyndardyŋ ana tılınıŋ qasietı men kiesı haqyndaǧy syrşyl öleŋderı, taǧylymy tereŋ oi-tolǧamdary, qanatty sözderı oqyldy. Tılderdı damytu jäne arhiv ısı basqarmasynyŋ basşysy Tıleuǧali Qyşqaşbaev memlekettık tıldıŋ mereiın asyryp jürgen azamattarǧa Alǧys hat tapsyrdy.
İbragim Eskendır, Möldır Äuelbekova syndy estrada änşılerı halyqqa ruh beretın änderdı şyrqady. «Qorqyt» dästürlı toby ūltymyzdyŋ köne saryndaryn bügıngı künmen ūştastyrdy.
