Qara şaŋyraq M. Äuezov atyndaǧy Qazaq memlekettık akademiialyq drama teatry biylǧy 91 mausymyn Mädina Omarovanyŋ «Aqtastaǧy Ahiko» spektaklı premerasymen aşqan bolatyn. Rejisser Ashat Maemirov sahnalaǧan būl qoiylym men atalmyş teatr repertuaryndaǧy özge de tuyndylardy astanalyqtar da tamaşalai alady. 28-30 qaraşa künderı el Täuelsızdıgınıŋ 25 jyldyǧy aiasynda «äkemteatrdyŋ» elordadaǧy gastrolderı ötedı.
Gastroldık turdy 28 qaraşa künı Jastar teatrynyŋ sahnasynda qoiylatyn D. İsabekovtıŋ «Jüz jyldyq mahabbat» dramasy (rejisserı A. Käkışeva) aşady. Şyǧarma ötken ǧasyrdyŋ otyzynşy jyldardaǧy quǧyn-sürgın qūrbanyna ainalǧan aqyn Maǧjan Jūmabaevtyŋ auyr taǧdyrynan, jary Zyliha ekeuınıŋ arasyndaǧy mahabbat hikaiasy turaly syr şertedı.
30 qaraşada astanalyqtardyŋ nazaryna A. Volodinnıŋ «Qoştasqym kelmeidı» dramasy şyǧarylady. Spektaklde segız otbasynyŋ taǧdyry jönınde baiandalady. Är keiıpkerdıŋ bıtım-bolmysyn aşatyn oqiǧalar jelısı öte tartysty örbidı.
Al 29 qaraşada Beibıtşılık jäne kelısım saraiynda «Aqtastaǧy Ahiko» spektaklı körsetıledı. Şyǧarmanyŋ bas keiıpkerı – taǧdyrdyŋ jazuymen Qazaqstanǧa kelıp, osynda qalyp qoiǧan japon azamaty Ahiko Tesura.
M. Äuezov atyndaǧy Qazaq memlekettık akademiialyq drama teatrynyŋ direktory Erlan Bıläl būl kısı turaly QR Parlamentı Mäjılısınıŋ deputaty Nūrlan Dulatbekovten estidı. Onyŋ hikaiasyn jazuşy Mädina Omarovaǧa aityp, qalamger 15 jasynda jazyqsyz jazalanyp, jasöspırım şaǧyn KarLagta ötkızgen, Qaraǧandy oblysynyŋ Aqtas kentınde tūryp jatqan japondyqpen kezdesedı. Sodan Ahikonyŋ bastan keşken ömırın öz auyzynan estıp, ony dramaǧa ainaldyrady. Bas keiıpkerdıŋ taǧdyry Alaş qairatkerlerınıŋ ömırımen parallel örbıp otyrady. Körermender onda ūrpaq bolaşaǧyn oilap, Arqa jerınde europalyq ülgıdegı qazaq-orys mektebın saldyrǧan Aqaidyŋ Qasenınıŋ, Säken Seifullinnıŋ äkesı Seifollanyŋ beinelerımen qauyşady.
Spektaklde Ahikonyŋ rölın belgılı akter Dulyǧa Aqmolda somdaidy. Būǧan qosa dramada Bolat Äbdılmanov, Bekjan Tūrys, Danagül Temırsūltanova, Azamat Satybaldy, Astanadan Almatyǧa jaqynda auysqan Quandyq Qystyqbaev syndy tanymal ärtıster oinaidy.
Amanǧali QALJANOV
