Aldaǧy 9 aqpanda qazaq poeziiasynyŋ mūzbalaǧy atanǧan Mūqaǧali Maqataevtyŋ tuǧanyna 88 jyl tolady. Közı tırısınde qasiettı qara öleŋmen tuǧan halqyn äldilep ötken aqynnyŋ tuǧan künı qazır ülken merekege ainalǧan. Türlı mädeni oryndar men mektepterde ädebi keşter ūiymdastyrylyp, şaiyrdyŋ jyrlary oqylyp, onyŋ sözıne jazylǧan änder şyrqalady. Bügınde elordadaǧy Ūlttyq muzeide aqyn tūtynǧan bıraz zattar bar ekenın bılıp, solardyŋ tarihyna toqtaludy jön körıp otyrmyz.
Būl jädıgerlerdı bas mūrajaiǧa «Ūlttyq muzeige syi tartu» şarasy aiasynda aqynnyŋ kelını, halyqaralyq M.Maqataev atyndaǧy qordyŋ töraiymy Baqytgül Aidarova tapsyrǧan. Bızge būl mälımettı muzei qyzmetkerı Läila Noǧaibekqyzy aitty.
Endı ol qandai jädıgerler? Soǧan toqtalaiyq. Aldymen közı tırısınde aqynnyŋ özı satyp alyp kigen kostium-şalbardy körıp, bıraz ainalşyqtap tūryp qaldyq.
Aǧamyzdan qalǧan taǧy bır qymbat jädıger – 1954 jyly Mäskeuden şyqqan «Russko-kazahskii slovar» jinaǧy. Būl sözdıktı A.İsqaqov, H.Mahmudov, Ǧ.Mūsabaev degen avtorlar jasaǧan. Aqyn osy jinaqty janynan qaldyrmaǧan deidı. Sondai-aq, talantty tūlǧa şai ışken kese men saby gülmen örnektelgen qasyq ta közımızge jyly ūşyrady. Tüiındei kelgende, Ūlttyq muzeige jolyŋyz tüse qalsa, aqynnan qalǧan jädıgerlerdı baryp köruıŋızge bolady.
