Mausymdyq mäselelerdıŋ bırı – mektep formasy. Künı keşege deiın är mektep ärtürlı forma oilap tauyp, oquşylar türlı şalbarlar men qysqa iubkalar, alabajaq keudeşeler kiıp ketken edı. Bılım jäne ǧylym ministrınıŋ «Orta bılım beru ūiymdary üşın mındettı mektep formasyna qoiylatyn talaptardy bekıtu turaly» №26 būiryǧy şyǧyp, byltyr būl mäselege nükte qoiylǧandai edı. Al endı…
Äleumettık teŋsızdık joiylatyn boldy dep quandyq. Söitıp ötken oqu jylynan bastap elımızdegı barlyq mektepter bıryŋǧai mektep formasyna köştı.
Ministrlıktıŋ būl şeşımıne ata-analar tarapynan qarsylyq bolǧan joq. Bırı «Biyl kigen kiımdı kelesı jyly da kietın bolsaq, sapalysyn alaiyq» dep ūrynsa, endı bırı «Bır balama syimai qalsa, ekınşısı kier» dep dämelendı. Söitıp, ülgısı klassikalyq, qoŋyr kök tüstı kiımdı är ata-ana öz taŋdauymen aldy. Bıraq, biyl būl forma taǧy özgerdı. Tamyz bastalysymen formaǧa bas qatyrǧan ata-analardyŋ qarasy köbeidı. Sebebı, astanalyq keibır mektepter «öz formalaryn» oilap tauyp ülgerıptı.
Redaksiiamyzǧa habarlasqan ata-analardyŋ aituynşa, №74 mektep-gimnaziiasynyŋ basşylyǧy jyldyŋ soŋynda ata-analar komitetterı töraǧalarymen kezdesu ūiymdastyrǧan. Alaida būl jiynnan basqa ata-analardyŋ denı habarsyz. Sol jinalystarda mekteptıŋ öz forma ülgısı taŋdalynypty. Endı biylǧy oqu jylynda oquşylar osy formamen kelulerı kerek. Baratyn mekenjai da, tıgetın tıgınşı de belgılı. «Äu basta mektep formasynyŋ özgeruı, onyŋ qymbattyǧy, bärı äleumettık tūrǧyda az qamtylǧan otbasylarǧa ǧana äserın tigızedı. Ärine, oǧan bıraz ata-analar qosylyp, quanyp jatyr. Bızdıŋ formamyz basqalardan erekşe bolady dep. Jaǧdaiy barlar üşın būl mäsele emes. Al byltyrǧy alǧandarymyzdy biyl kie almasaq, erteŋ taǧy bır jerge köşetın bolsaq bız ne ısteimız?» deidı olar.
Būl mäsele boiynşa, qalalyq Bılım basqarmasyna da habarlastyq. Olar mektep basşylyǧy tarapynan mūndai olqylyqtarǧa jol berılmeuı kerektıgın alǧa tartty. «Biylǧy oqu jylynda da Astanadaǧy barlyq mektep oquşylary bıryŋǧai mektep formasyn, iaǧni, qoŋyr kök tüstı forma kiedı. Eşkım ata-anaǧa «Osyndai forma al» demeidı. Är ata-ana balasyna kiımdı özı taŋdaidy. Eŋ bastysy tüsı men stilı bırdei boluy kerek. Ūldarǧa arnalǧan mektep kiımınıŋ jiyntyǧynda pidjak, jilet, şalbar, merekelık aq köilek, kündelıktı köilek, toqyma keudeşe, vodolazka bar. Erejege sai, eŋ kem degende köilek, jilet pen şalbar boluy tiıs. Qyzdarǧa arnalǧan tolyq jiyntyqta pidjak, jilet, beldemşe, klassikalyq bluzka, toqyma keudeşe, sarafan, vodolazka bar. Mektep formalaryn bır-bırınen ajyratatyn är bılım oşaǧynyŋ öz belgılerı bolady. Olar pidjakqa jäne jiletke tıgıledı. Mektepter būl kiımderdı qūjatta körsetılgen talaptarǧa sai etıp tıgıp beretın mekemenı özderı taŋdaidy» deidı Bılım basqarmasynyŋ baspasöz hatşysy Jazira Asanova.
Eskeretın jaǧdai, būl kiımderdı balalar kietındıkten matanyŋ sapasyna da män beru kerek. Mektep formasynyŋ matasy retınde jartylai jün jäne maqta, kiıske tözımdı, antibakterialdyq, antimikrobtyq jäne antistatikalyq qasietterı bar matalar qoldanylady. Kiımnıŋ 75-85 paiyzy tabiǧi matalardan tūruy kerek. Onyŋ qyrtysyn boldyrmau maqsatynda sintetikalyq qospalardyŋ 15-25 paiyzy bar matalar ūsynalady.
P.S: Är mektep, tüsın özgertpegenımen, türın özgertıp, öz degenderın osylai jasai berse ne bolady? Äu basta, qaltany qaqpaudyŋ, äleumettık teŋsızdıktı joiudyŋ amalymen jasalynǧan bıryŋǧai formanyŋ artyqşylyǧy qaida? Älde mūny da mektep direktorlary öz paidalaryna şeşudı közdep otyr ma? Olai bolmasa, nege kez-kelgen mektepke jaraityn, kez-kelgen jerden satyp ala alatyn formany kigıze bermeidı?
Endı ata-analar byltyrǧy kiımderın jinap qoiyp, biylǧy ülgıge amalsyz tapsyrys beruge köştı…
Bılım basqarmasy qala boiynşa öz formalaryn ūsynyp, bır tauar öndıruşıden ǧana satyp aluǧa şaqyrǧan bılım oşaqtary bolsa, 55-68-53, 55-68-83, 55-68-73 nömırlerıne habarlasu qajettıgın aitady.
Güljan RAHMAN
Gülmira Şaiahmetova, ata-ana:
– Byltyr ǧana osy qoiu kök tüstı formany quana aldyq. Endı biyl būl formamyz köilek bolyp özgerıp jatyr. Jaǧasy bar eken. Bır qalanyŋ ışınde bırneşe ret köşıp jüre beretın qazaqpyz ǧoi. Endı balamyz basqa mektepke auyssa būl kiımımız sözsız jaramaidy. Ata-analar komitetınıŋ jinalysy ötıp, sonda maqūldanǧan joba deidı. Ol jinalysqa qatysqan bır ata-ana qalaişa basqa 30 ata-ananyŋ atynan söilei alady? Bıryŋǧai mektep formasy degenımız osy ma sonda? Ministrlıktıŋ şeşımıne säikes, bärınıŋ sol formada qala bergenı dūrys edı. Men biyl būl formany ala almaimyn.
