Qazaqstan halqy Assambleiasy respublikalyq bıryŋǧai mediasiia künıne orai «Aşyq esık» şarasyn ötkızdı.
Mediasiia – üşınşı, beitarap, ädıl, janjal nätijesıne müddelı emes taraptyŋ qatysuymen ötetın daulardy retteudıŋ balamaly jaŋa türı. Būl şara zaŋda naqtylanǧan mediasiianyŋ maqsattary men mındetterın tüsındıruge jäne dau-janjaldardy sotqa jetkızbei tiımdı şeşuge baǧyttalǧan.
Astana qalasynyŋ äkımdıgı janyndaǧy «Qoǧamdyq kelısım» KMM direktory Nūr-Ahmet Dosmūhamettıŋ pıkırınşe, mediasiia ūǧymy qazaqqa jat emes. «Bızdıŋ ata-babalarymyz būrynnan dau-damaidy özara kelısımmen şeşe bılgen. Al bügıngı mediasiia qyzmetınıŋ maqsaty – qos tarapty bırdei qanaǧattandyratyn, daukestık deŋgeiın tömendetetın özara tiımdı beibıt kelısımge keltıru. Mediasiia barysynda «kınälı» jäne «kınäsız» degen jaq bolmaidy» dedı ol.
Mediasiia künıne orai Astana qalalyq äkımdıkterınde, «Nūr Otan» partiiasy Astana qalalyq filialynda, odan bölek, halyqqa qolaily bolu maqsatynda «Astanalyq bazar» sauda üiınıŋ foiesınde käsıbi mediatorlar aqysyz qyzmet körsetıp, halyqqa mediasiia qyzmetı boiynşa keŋes berdı.
Osy künı Almaty, Saryarqa jäne Esıl audandarynyŋ äkımdıkterınde käsıbi mediatorlardyŋ, Ardagerler keŋesı müşelerınıŋ, PİK töraǧalarynyŋ, azamattyq hal aktılerın tırkeu bölımı mamandarynyŋ qatysuymen osy audandarǧa qarasty tūrǧyndarǧa arnalǧan jiyn ötkızıldı.
Qazaqstanda 2011 jyly 5 tamyzda Mediasiia turaly zaŋ qabyldandy. Sol uaqyttan bastap jyl saiyn respublikalyq bıryŋǧai mediasiia künı ötkızılıp keledı.
Bügınde elımızde qoǧamdyq mediatorlardyŋ sany 3169-ǧa jettı. Üstımızdegı jyldyŋ 5 aiynda 9213 ötınış kelıp tüsıp, onyŋ 3046-sy mediasiialyq keŋespen şeşımın tapqan.
