Men köpten berı Astana qalasy Esıl audandyq ardagerler üiıne baryp, jaqsy demalyp, özımdı jaqsy sezınıp jürgen zeinetkerlerdıŋ bırımın. Dostyq, 13 mekenjaiyndaǧy Ardagerler üiıne kelıp ketken saiyn da bır jasap qalamyn. Mūndaǧy qyzmetkerlerdıŋ barlyǧy esıkten kırgennen jyly qarsy alyp, qyzmet körsetıp jatady.
Menı qarsy alǧan qyzdar äuelı därıgerdıŋ kabinetıne tekseruge jıberedı. Mūndaǧy Serık Oral degen özımmen şamalas därıger qabyldap, jaqsy demaluǧa tılek bıldıredı. Iogaǧa qatysamyn, trenajer zalynda jattyǧamyn. Tıptı, eşqaşan oinamaǧan toǧyzqūmalaq oiynyn da üirenıp jürmın.
Būl ortalyqta ünemı konserttık baǧdarlamalar, bi keşterı ūiymdastyrylyp tūrady. «Saǧynyş sazy», «Bäiterek», «Esıl tolqyndary» dep atalatyn muzykalyq ansamblderdıŋ konsertın tamaşalau men siiaqty zeinetkerlerdıŋ ärqaisynyŋ köŋılınen şyqqanyna kuä boldym. Qarttar künı men Jaŋa jyl merekesıne orai ūiymdastyrǧan ıs-şaralary esımde ūzaq saqtalatyny sözsız.
Jaqynda «Baqytty otbasy» kıtabynyŋ avtory Qanat Estekpen kezdesu öttı. Būǧan Läzzat Düisebaeva hanym habarlap şaqyrǧan bolatyn. Osy kıtaptyŋ negızınde tüsırılgen «Boztorǧai» filmın tügel qarap şyǧyp, kezdesuge baruǧa asyqtym. Kütsem, kütkendei-aq eken. Läzzat hanymǧa erıp, bır tamaşa, jyly jüzdı jıgıt kelıp zalǧa kırgende, jaqsylyqtyŋ nyşany sezılgendei boldy.
Avtorǧa jinalǧandar sūraq qoiyp jatty. Barlyǧyna baiyppen jauap berıp otyrdy. Būl jıgıttıŋ «otbasymda jetı balam bar» degenı tıptı odan saiyn «Ainalaiyn-ai, qandai azamat edıŋ! Jetı balany ömırge äkelıp, oǧan tärbie berıp otyrǧan qazaqtyŋ azamattary bolsa, sendei-aq bolsynşy!» dep ıştei qaitalaumen boldym. Kıtabyn satyp alyp, ekı kün bas almai oqyp şyqtym.
Naǧyz qazaqi tärbie eken. Ülkendı syilau, kışını qūrmetteu osy kıtaptaǧy ärbır keiıpkerdıŋ boiynan tabylyp jatty. Qazırgı jastar oqyp, köŋılıne toqysa degen oiǧa qalyp otyrmyn. Özgenıŋ balasyna qamqor bolmaq tügılı, öz balalaryn jetımsıretıp jürgender qanşama?
Sol kezdesude avtorǧa alǧys hat tabys etıldı. «Saǧynyş sazy» ansamblınıŋ jetekşısı «Adai» küiın oryndap, köptıŋ alǧysyna bölendı. Osy kezdesudı ūiymdastyruşylarǧa köp-köp raqmet!
Küläş ŞÜRENOVA,
ardager ūstaz, QR bılım beru ısınıŋ üzdıgı
