Räsımge qatysuşylarǧa arnalǧan sözınde Elbasy Qazaqstanda Otan qorǧauşy künı men Jeŋıs künın merekeleudıŋ maŋyzdylyǧyn erekşe atap öttı.
– Men bügın Joǧarǧy Bas qolbasşy retınde joǧary äskeri jäne arnauly ataqtar, sondai-aq qyzmettegı jetıstıkterı üşın memlekettık nagradalar tapsyramyn. Osyndai joǧary marapatqa elımızdıŋ beibıt ömırı men tynyştyǧyn saqtaityn äskerımız ben arnauly qyzmetterdıŋ üzdık ökılderı ie bolyp otyr, – dedı Qazaqstan Prezidentı.
Nūrsūltan Nazarbaev älemde beleŋ alyp kele jatqan tūraqsyzdyq jaǧdaiynda memlekettıŋ äskeri-küş salasy erekşe maŋyzǧa ie bolatynyn aitty.
– Bızdıŋ äskerımız ben qūqyq qorǧau qūrylymdarymyz el qauıpsızdıgınıŋ berık qalqany ärı egemendıgımızdıŋ myzǧymas kepılı bolyp sanalady. Memleket barşa qazaqstandyqtardyŋ beibıt ömırı men tynyştyǧyn saqtau jolyndaǧy sızderdıŋ erlıkterıŋız ben qajyrly eŋbekterıŋızdı joǧary baǧalaidy, – dedı Memleket basşysy.
Qazaqstan Prezidentı elımızdıŋ qauıpsızdıgın qamtamasyz etu jäne öskeleŋ ūrpaqty tärbieleu ısınde ärbır äskeri qyzmetşınıŋ zor röl atqaratynyn atap öttı.
– Jauyngerler ärdaiym Otan üşın otqa tüsudı paryz sanaǧan. Būl – jäi söz emes. Bız mūny Ūly Otan soǧysy tarihyndaǧy erlık ısterden jäne ata-babamyzdan qalǧan mūralardan bılemız. Ärqaşan osylai bolǧan jäne bola beredı. Elımız öz armiiasy men qūqyq qorǧau organdaryn baǧalap, qūrmet tūtady, sondai-aq sızderdı adal ärı qaltqysyz qyzmet etedı dep senedı, – dedı Nūrsūltan Nazarbaev.
Soŋynda Memleket basşysy saltanatty şaraǧa qatysuşylardyŋ barlyǧyn Otan qorǧauşy künımen jäne Ūly Jeŋıs merekesımen qūttyqtady.
