Otan soǧysynyŋ mügedekterıne arnalǧan ortalyq klinikalyq gospitaldıŋ ūiymdastyruymen Prezidenttıŋ «Ruhani jaŋǧyru» baǧdarlamasyn ıske asyru aiasynda Astananyŋ 20 jyldyǧyna jäne Ūly Jeŋıstıŋ 73 jyldyǧyna arnalǧan «Astana – beibıtşılık pen ruhani jaŋǧyru ordasy» atty V halyqaralyq suretşıler baiqauy öttı.
Saltanatty jiynǧa soǧys ardagerlerı, QR Parlamentı deputattary, qoǧam jäne memleket qairatkerlerı, Resei, Belarus, Ukraina elderınıŋ Qazaqstandaǧy elşılıgı, bırqatar ministrlıkterdıŋ ökılderı qatysty.
– Bızdıŋ ortalyqta emdeluge Ūly Otan soǧysynyŋ ardagerlerı, jauynger- internasionalister, Chernobyl apaty men Semei iadrolyq poligonynan zardap şekken azamattar elımızdıŋ tükpır-tükpırınen keledı. Densaulyqtaryn qalpyna keltıredı. Sondyqtan baiqau taqyrybyn jan-jaqty, auqymdy boluyn qarastyrdyq, – degen Astana qalasy Otan soǧysynyŋ mügedekterıne arnalǧan ortalyq klinikalyq gospitaldıŋ direktory Ädılhan Abdulin jinalǧandardy Otan qorǧauşylar jäne Jeŋıs künderı merekesımen qūttyqtady.
Baiqauǧa eŋ üzdık 73 ekspozisiialyq jūmys taŋdap alynǧan eken. Jüzden jüirık şyqqandardy Eltaŋba avtory Jandarbek Mälıbekov bastaǧan qazylar alqasy anyqtaǧan. Baiqau qorytyndysy boiynşa Amangeldı Düisembekov pen Tolqyn Tabysbek jäne izraildık Eliau Elina III oryndy ielense, reseilık Nataliia Şevchenko men ukraindyq Vasilii Skakandi II oryndy, Sailau Temırbekov
I oryndy enşıledı. Al bas jüldenı Şynybai Pırımbaev qanjyǧalady. Jeŋımpazdar qarjylai syilyqtarmen jäne arnaiy sertifikatpen marapattaldy. Aita ketu kerek, Şynybai Pırımbaevtyŋ tuyndysynda Astananyŋ temırjol vokzaly men elordaǧa är aimaqtan qonys audaruşylardyŋ beinesı körınıs tapqan.
– Elordada ötken būdan basqa baiqaularǧa osyǧan deiın Astananyŋ bas säuletşısı ärı avtory – Elbasy men qala äkımı beinelengen suretterımdı ūsynǧan bolatynmyn. Osy joly bas qalaǧa köşıp kelıp jatqan eskı poiyz ben ärtürlı köŋıl küidegı adamdardyŋ beinesı ūtymdy şyqqan siiaqty, – deidı bas jülde iegerı tılşılerge bergen sūhbatynda. Saltanatty şara soŋy öner jūldyzdarynyŋ konsertıne ūlasty.
Nūrdäulet KÄKIŞTEGI
