Futboldan Qazaqstan bırınşılıgı märesıne jettı. «Astana» törtınşı ret qatarynan el chempiony ataǧyn jeŋıp aldy. Premer-liganyŋ jeŋımpazy biyl da soŋǧy turda şeşıldı.
Soŋǧy oiynǧa deiın köş basyndaǧy «Astana» men «Qairat» komandalary arasyn bır-aq ūpai bölıp tūrdy. Ekeuıne de jeŋıluge, tıpten teŋ tüsuge de bolmaidy. Sürıngenı kümıstı qanaǧat tūtady. Al ekeuı de jeŋse, «Astana» jeŋıs tūǧyrynyŋ eŋ biık satysyna köterıletını belgılı edı. Sonymen, elordada – «Astana» men «Aqjaiyq», Almatyda «Qairat» pen «Aqtöbe» arasyndaǧy taǧdyrşeştı oiyndar bastalyp kettı.
«Ekı maidanda», iaǧni Europa ligasy men Qazaqstan chempionatynda qatar jürgen «Astana» soŋǧy oiynǧa bar küşın saldy. Myqty oiynşylardyŋ bärı alaŋǧa şyqty. Öitkenı elordalyqtar üşın ūlttyq bırınşılıktı ūtu da mausym aldyndaǧy maqsat bolǧan.
«Aqjaiyq» bırınşı taimda täp-täuır qarsylyq körsettı. «Astana» qanşa şabuyldaǧanymen, qarsylastyŋ qaqpasyn dop daryta almady. Söitıp, bırınşı taim 0:0 esebımen aiaqtaldy.
Ekınşı taim bastalysymen alaŋ ielerı ekpındı küşeittı. Nätijesınde oiynnyŋ 50-minutynda Djunior Kabananga esep aşty. Kongolyq sūrmergen oiynnyŋ soŋynda taǧy bır ret «Aqjaiyq» qaqpasynan saŋylau tapty. Osylaişa, «Astana» 2:0 esebımen jeŋıske jetıp, törtınşı märte qatarynan Qazaqstan chempiony ataǧyn jeŋıp aldy.
Match aiaqtalysymen Qazaqstannyŋ käsıpqoi futbol ligasynyŋ prezidentı Azamat Aithojin «Astana» kapitany Nenad Erichke chempiondyq tondony tabys ettı. Al altyn medaldar keiınırek saltanatty jaǧdaida tapsyrylatyn bolady.
«Aqtöbe» komandasyn 3:2 esebımen ūtqan «Qairat» biyl da kümıs jüldenı qanaǧat tūtty. Qola jülde Şymkenttıŋ «Ordabasy» komandasyna būiyrdy.
Premer-ligadan «Taraz» jäne «Oqjetpes» komandalary şyǧyp qaldy. Al bırınşı ligada bırınşı jäne ekınşı oryn alǧan taldyqorǧandyq «Jetısu» men petropavldyq «Qyzyljar» aldaǧy jyly premer-ligada öner körsetedı. «Aqjaiyq» pen bırınşı ligada üşınşı oryn alǧan «Maqtaaral» premer-ligada oinauǧa qūqyq beretın oiynda kezdesetın bolady. Būl match 9 qaraşa künı «Astana Arena» stadionynda ötedı.
Qarsylastar qaqpasyna 20 gol soqqan «Qairat» şabuylşysy Jerar Gou chempionattyŋ sūrmergenı, al «Astana» şabuylşysy Djunior Kabananga 22 goldyŋ avtory atandy.
Jaqyn arada chempionattyŋ üzdık oiynşylary, bapkerlerı jäne menedjerlerı anyqtalatyn bolady.
Ǧalym Qojabekov
