Elordada köktemgı aǧaş otyrǧyzu jäne «Jasyl Astana» ekologiialyq ailyǧy bastaldy. Elordany damytu jönındegı keŋeste Memleket basşysynyŋ «Bes jyl ışınde Astanany baq qalaǧa ainaldyru, köpjyldyq ösımdıkterdı köbırek otyrǧyzu kerek» degen tapsyrmasyna saikes biyl elordada million jasyl jelek otyrǧyzu josparlanyp otyr. Onyŋ 500 myŋy qalada, 500 myŋǧa juyǧy Astananyŋ jasyl beldeuıne otyrǧyzylady.
Ekologiialyq ailyqtyŋ basty maqsaty – qoǧam nazaryn ekologiialyq mäselelerge audaryp, ainalany taza ūstauǧa, ekologiialyq mädeniettı qalyptastyruǧa üles qosu, sonymen qosa jas ūrpaq arasynda ekologiialyq oilaudy, ekologiialyq mädeniettı qalyptastyru bolyp otyr.
Biyl elordada japyraqty aǧaştardy otyrǧyzuǧa basymdyq berıledı. Keşegı ötken senbılık aiasynda qaladaǧy Abylai han daŋǧyly, Qajymūqan, Petrov, Bölekpaev, A-105, Baltaly, Alaş tas joly jäne basqa köşelerdıŋ boiynda myŋdaǧan aǧaş otyrǧyzylady.
Qalany jappai kögaldandyru ekologiiany jaqsartuǧa, qala tūrǧyndary üşın demalys oryndaryn aşuǧa, elordanyŋ klimattyq jaǧdaiyn jaqsartuǧa mümkındık beredı. Soŋǧy bes jylda Astanada 2,6 millionnan astam jasyl jelek otyrǧyzyldy. Biyl da bas qalada millionǧa juyq jasyl jelek otyrǧyzylady. Būl turaly elorda äkımı Jeŋıs Qasymbek aitty.
– Elordada kögaldy oryndar men jasyl jelektı «araldar» qatary köbeie tüsedı. Qala auqymdy kögaldandyru jūmysynyŋ aldynda tūr. Biyl bır millionǧa juyq jasyl jelek otyrǧyzudy josparlap otyrmyz. Astananyŋ jasyl beldeuı – qalanyŋ negızgı tynysy, ökpesı. Aǧaş otyrǧyzu jūmysy qazırdıŋ özınde bastalyp kettı. Būl jūmysty qalanyŋ barlyq audanynda jürgızemız. Japyraqty aǧaştarǧa basymdyq berıledı. Qalamyzdy kögaldandyru – jaily ömır sürudıŋ bır bölıgı. Elordamyzdy auqymdy türde kögaldandyru jūmysy aldaǧy jyldary da jalǧasady, – dedı qala äkımı.
Bas qalada jyl saiyn jalpyqalalyq senbılıkter ötkızılıp, igılıktı şara kezınde qalany sanitarlyq tazalau, nöserlık aulalar men aryq jüielerın tazartu, köşe boiyn, jaiau jürgınşıler joldaryn tazalau, saiabaqtar men jasyl jelekterdı kütu boiynşa mausymdyq agrotehnikalyq jūmystardy jürgızu, zaŋsyz jerlerde ornalasqan qoqys üiındılerın jäne lastanǧan aumaqtar jūmystary jürgızıletın. Qalanyŋ tamaşa dästürıne ainalǧan būl şara biyl «Jasyl Astana» ekologiialyq ailyǧymen üilesım tauyp, eŋbek ūjymdarynyŋ, qala tūrǧyndarynyŋ küşımen poligonǧa 555 tonnadan astam qaldyq şyǧaryldy. Saiabaqtar men skverlerde jalpy audany 2,5 mln şarşy metrden astam aumaq jinaldy. «Jasyl Astana» ekologiialyq ailyqqa 11 myŋnan astam adam, 200-den astam käsıporyndar men ūiymdar, PİK jäne MİB ūjymdary, şaǧyn jäne orta biznes subektılerı jäne t.b. qatysty.
Aita keteiık, ötken jyly elorda aumaǧynda 600 myŋ tüpten asa aǧaş egılgen edı. Onyŋ 452 myŋy «jasyl beldeude» tamyr tartty.
