Qoǧamdyq kölık qyzmetınıŋ jūmysy bır jönge kelmei-aq qoidy. Äsırese, keibır konduktorlardyŋ mädenietsızdıgıne qairan qalamyn. Qazaqstannyŋ bas qalasynda eŋbek etıp jürgenderın esten şyǧaratyndary nesı?!
Konduktorlardyŋ arnaiy oqytudan ötetınınen habardarmyz. Degenmen, solardyŋ barlyǧy bırdei öz mındetterın talapqa sai oryndamaidy.
Jolauşyǧa bilet berudıŋ ornyna qalta telefonymen söilesıp tūryp alatyndaryn qaitersız. Özderı jan-jaǧyndaǧylardan qymsynbaidy da. Jeke ömırıne qatysty mäselenı köpşılıktıŋ közınşe talqylap tūra beredı. Dauystaryn säl bäseŋdetuge de örelerı jetpeidı. Eskertu jasap, jönge salǧysy kelgenderge jauaptary daiyn tūrady: «Şaruaŋ bolmasyn. Kımmen qalai söilesu kerektıgın özım bılem…» dep örekpidı. Ondailarmen şapyldasudan eşteŋe ūtpaitynyn bügınde ülkender de tüsınıp aldy. Jūmǧan auyzdaryn aşpaidy.
Jaqynda barar jerıme jete almai, aidyŋ-künnıŋ amanynda Astanada adastym da qaldym. Kımnıŋ kesırı deisız be? Ärine, menıŋ osylaişa sergeldeŋge tüsuıme taǧy da konduktorlar kınälı. Qalalyq onkologiia dispanserıne bet alǧanmyn. Abylai han daŋǧylynyŋ boiyndaǧy bır aialdamaǧa toqtaǧanda konduktor qyz: «Travmatologiia jäne ortopediia ortalyǧynan tüsuıŋız kerek edı. Endı qazır şyǧyŋyz da, alǧa qarai jürıp, oŋǧa būrylyŋyz. Sol jolmen tıke jüre beresız» degen soŋ, alǧa qarai jüre berdım. Jürıp kelem, jürıp kelem. Bıraq dıttegen jerıme jeter emespın. Tüsınıksız bırdeŋeler. Söitıp, äjeptäuır jürgennen keiın ötıp bara jatqan beitanys bıreuden sūrasam, mülde basqa baǧytqa ketıp barady ekenmın. Jazǧan qūlda şarşau bar ma? Kelgen ızımmen kerı qaittym. Joǧaltqan uaqytym men jūqarǧan jüikem üşın kımdı jazalarymdy bılmei dalmyn. Baǧanaǧy aialdamaǧa qaityp kelsem, egde tartqan bır qariia otyr eken. Aşuǧa bulyǧyp, bolǧan jaitty tügel baiandai jöneldım. Ol da sol baiaǧy konduktordyŋ kesırınen qala kezıp jürgenın jasyrmady. «Özderı qalany dūrys bılmeitın bolsa, jūrtqa qalai jön sılteidı? Sondailardy qalai jūmysqa alady eken…» dep sarnap qoia berdı.
Rasynda da, Astanaǧa syrttan keluşıler köp. Künı erteŋ «EKSPO-2017» körmesın ötkızgelı otyrmyz. Sol kezde qonaqtardyŋ aldynda abyroiymyzdan airylyp qalmas üşın būl mäselege nemkettı qaramai, ony bırlesıp şeşken jön dep oilaimyn.
Qanapiia MOMYNOV, zeinetker
