Soŋǧy jyldary elorda medisinasy şeteldık jäne respublikalyq deŋgeidegı myqty medisina ǧalymdary ötkızetın şeberlık sabaqtary jäne seminarlar arqyly damuda. Olar köbıne hirurgiia, ortopediia, travmatologiia, pediatriia, bas-jaq süiek hirurgiiasy, urologiia, LOR salasyna baǧyttalady. Elordada byltyr sondai 17 şeberlık sabaǧy men seminar ötkızılıp, Qoǧamdyq densaulyq saqtau basqarmasyna qarasty barlyǧy 200 medisina qyzmetkerı oqytyldy.
Byltyr jyl basynda, aqpan aiynda ötken alǧaşqy şeberlık sabaǧy «Uranostafiloplastikadan keiıngı qatty jäne jūmsaq taŋdaidyŋ qaldyq aqaularyn joiudyŋ zamanaui ädısterı» dep atalyp, oǧan S.Asfendiiarov atyndaǧy Qazaq ūlttyq medisinalyq universitetı jaq-bet jäne plastikalyq hirurgiia kafedrasynyŋ professory, medisina ǧylymdarynyŋ doktory Serık Nūrmanov şaqyryldy. Odan basqa da şeberlık sabaqtaryna Resei, Belgiia, İzrail, Türkiia elderınıŋ eŋ bedeldı jetekşı ǧalymdary men professorlary kelıp qatysty. Olardyŋ ışınde älemnıŋ eŋ jetekşı ortopedı, İzraildıŋ «Technion» universitetınıŋ professory Mark Eidelman «12-17 jastaǧy jasöspırımderde jambas buyndary aiaq-qoldarynyŋ deformasiiasyn tüzetu» taqyrybyndaǧy şeberlık sabaǧyn ötkızdı. Türkiialyq urolog, professor Äli Tekin «Balalar urologiiasyndaǧy endovideohirurgiia» taqyrybyndaǧy sabaqqa qatysty.
Osy şeberlık sabaqtarynda respublikamyz ben şeteldıŋ bılıktı därıgerlermen bırge kürdelı otalar jasaudy üirenıp, täjıribe jinaqtap jürgen mamannyŋ bırı – Rinat Baigireev. Ol – №2 köpbeiındı qalalyq balalar auruhanasynda hirurgiia blogynyŋ basşysy, 26 jyldyq täjıribesı bar elordanyŋ bas balalar hirurgı.
– Byltyr Balalar jylynda ota jasau körsetkışı boiynşa rekord ornattyq dese bolady. Sonyŋ ışınde atalǧan 17 şeberlık sabaǧynda otanyŋ 20 türı alǧaş ret jasaldy. Endı būl otalar bızdıŋ eldıŋ balalary üşın qoljetımdı. Solardyŋ 3 türı boiynşa bız keiın şeteldık mamandarsyz özımızdıŋ üirengenımız boiynşa bırınşı ret ota jasap, ony sättı aiaqtadyq. Qazırgı älemdık hirurgiiadaǧy trend – az invazivtı, iaǧni dene bölıgın tılıp nemese kespei, iaǧni denenı köp jaraqattamai ota jasau. Bala otadan keiın auyrsynbai, tez oŋalyp ketuı kerek. Osyǧan orai, bız byltyr qajettı zamanaui jabdyqtar aldyq. Osy tūrǧyda şeteldık mamandarmen atalǧan şeberlık sabaqtarynda täjıribe almasyp, köp närse üirendık. Şeberlık sabaqtaryndaǧy ota jasau sätın onlain formatta TMD elderınıŋ därıgerlerı de kördı, – deidı hirurg.
Jalpy osy tūrǧydan alǧanda, atalǧan auruhana – elorda boiynşa ǧana emes, respublika deŋgeiınde jalǧyz emdeu orny. Sebebı auruhanadaǧy tösek oryndardyŋ 80 paiyzy hirurgiialyq baǧyttaǧy nauqastarǧa arnalǧan. Mekeme elordadaǧy 0-18 jas aralyǧyndaǧy 400 myŋnan asa nauqasqa qyzmet körsetedı, onyŋ üstıne ärbır törtınşı nauqas – özge öŋırlerden kelgender. Soǧan qarai därıgerlerge tüsetın jūmys jüktemesı de auqymdy.
– Jylyna bızdıŋ auruhanada ortaşa eseppen 13 myŋ ota jasalady. Būl – respublika boiynşa eŋ joǧary körsetkış. Auruhana därıgerlerı nauqastarǧa 10 türlı salada şūǧyl jäne josparly ota jasaidy. Kardiohirurgiia men onkologiiadan basqa salanyŋ bärın qamtimyz. Būl şeberlık sabaqtary bızdıŋ medisinamyzdyŋ jaŋa baǧytta damuyna ülken serpın berdı. Ota jasau auqymy keŋeidı. Därıgerlerımızdıŋ senımı men yntasy artty, – deidı R.Baigireev.
Bır aita keterlıgı, atalǧan şeberlık sabaqtarynda üirenetın otalar jasau erekşelıgı – ol köbıne zamanaui tehnologiialyq jabdyqtarǧa täueldı, iaǧni qanşa jerden maman myqty, bılgır bolyp tūrsa da, soǧan sai tehnologiia bolmasa, ota jasalmaidy. Sondyqtan qazırgı taŋda elordalyq hirurgter jasai alatyn otalar boiynşa jaŋa tehnologiialar alu qajettılıgı de tuyndady.
