El Täuelsızdıgınıŋ 25 jyldyǧyna orai biylǧy nauryz aiynda «25 paidaly ıs» respublikalyq aksiiasy bastau aldy. QR Prezidentı janyndaǧy Äielder ısterı jäne otbasylyq-demografiialyq saiasat jönındegı ūlttyq komissiia ūiytqy bolǧan aksiia aiasynda otbasylyq qūndylyqtar men salamatty ömır saltyn nasihattau, öskeleŋ ūrpaq tärbiesıne erekşe köŋıl bölu, türlı maqsattaǧy qaiyrymdylyq şaralaryn ötkızu közdeldı.
Būl aksiiadan Astanadaǧy S.Seifullin atyndaǧy Qazaq agrotehnikalyq universitetı de tys qalyp otyrǧan joq. Aǧymdaǧy apta basynda 11 myŋǧa juyq studenttı oqytyp jatqan oqu ornynda tälım-tärbielık mänı zor kezdesu ūiymdastyryldy. Jastar ıskerlıgın tanytyp, el arasynda abyroiǧa kenelgen, täuelsızdıgımızdıŋ tuy biıkte jelbıreuıne üles qosqan äielder qauymymen jüzdestı.
«S.Seifullin atyndaǧy Qazaq agrotehnikalyq universitetı» AQ basqarma töraǧasy Aqylbek Kürışbaev jürgızgen kezdesuge keşegı Aqmolanyŋ, bügıngı Astananyŋ örkendeuıne eŋbek sıŋırgen aiymdar qatysty. Solardyŋ bırı – qoǧam jäne memleket qairatkerı Svetlana Jalmaǧambetova.
«Elımız azattyq alǧan 25 jyldyq kezeŋde men üş jerde jūmys ısteppın. Täuelsızdıktıŋ eleŋ-alaŋynda Aqmola oblysy äkımınıŋ orynbasary qyzmetın atqardym. Toqsanynşy jyldardaǧy el basyna tüsken qiyndyqtar älı esımde. Ekınşı jaǧynan, ūlttyq sananyŋ oianuynyŋ kuägerımın. Sol kezde Selinograd qalasyn Aqmola atauyna auystyru, şaharda qazaq teatry men meşıttı aşu mäselelerı köterıldı. Ärine, qarsylyqtar da bolmai qoimady. Äsırese, Täuelsızdık deklarasiiasy qabyldanǧanda köptegen pıkırtalastar oryn aldy. Bır sözben aitqanda, täuelsızdık bızge oŋai kelgen joq. Halyq auyr äleumettık jaǧdaidy da bastan ötkerdı. Sonyŋ bärınen abyroimen şyǧa bıldık» dedı Svetlana Jaqiiaqyzy. Märtebelı qonaq Astana Arqa tösıne köşken jyldardy, sondaǧy eleulı uaqiǧalardy da eske aldy.
Tıl janaşyry retınde köpşılıkke tanymal, bügınderı de osy joldan taimai Ş.Şaiahmetov atyndaǧy Tılderdı damytudyŋ respublikalyq üilestıru-ädıstemelık ortalyǧy direktorynyŋ keŋesşısı bolyp otyrǧan Orazkül Asanǧazyqyzy Saryarqa audany äkımınıŋ orynbasary, Astana qalasy Tılderdı damytu basqarmasynyŋ basşysy qyzmetterın atqardy. V şaqyrylymdaǧy QR Parlamentı Mäjılısınıŋ deputaty boldy.
«Aqmola oblysy äkımınıŋ orynbasary qyzmetın atqarǧan Svetlana Jaqiiaqyzy jäne Oŋtüstık Qazaqstan oblysy äkımınıŋ orynbasary bolǧan men 1994 jyldyŋ şılde aiynda AQŞ-ta oquda boldyq. Astana auysatyny jönındegı habar bızge sol jaqqa jettı. Bız kelgenge deiın Aqmolada 14 paiyz qazaq qana tūrǧan eken. Qalada orys tılı üstemdık qūrdy. Elbasynyŋ köregen saiasatynyŋ arqasynda bügın, Täuelsızdıgımızdıŋ 25 jyldyǧynda Astana qalasy tūrǧyndarynyŋ 75 paiyzy – qazaqpyz. Mektep oquşylarynyŋ 85 paiyzy – qazaq. Qazır elordada balabaqşa jetpei jatyr dep renjıp jatady. Men, kerısınşe, oǧan quanamyn. Būl elge el qosylyp otyrǧandyǧynyŋ, bala tuu körsetkışı öskendıgınıŋ belgısı» dedı O.Asanǧazyqyzy.
Onyŋ Saryarqa audany äkımınıŋ orynbasary bolyp taǧaiyndalǧandaǧy alǧaşqy ısı – Säken Seifullinnıŋ tuǧan künın tiıstı därejede atap ötu boldy. Qaladaǧy köşelerdıŋ qazaqylanuyna da Orazkül Asanǧazynyŋ ülken ülesı baryn el bıledı. «Karl Marks köşesın Kenesary atyna auystyrdyq. Sol uaqytta būǧan qarsy bolǧandar orystıldı gazetke «Kto takoi Kenesary?» degen maqala da jariialady. Kenesarynyŋ kım ekenın tanytaiyq dep Almatydan ǧalymdardy, jazuşylardy şaqyryp, Kenesary köşesınıŋ merekesın ötkızdık. Bastapqyda 27 köşe özgertıldı. Solardyŋ bärınıŋ merekesın ūiymdastyrdyq. Bız kelgende 1 ǧana qazaq mektebı bolatyn. Qazır 10 ǧana orys mektebı qaldy, 80 mekteptıŋ barlyǧynda qazaq synyptary bar» dedı tıl janaşyry.
S.Seifullin atyndaǧy Qazaq agrotehnikalyq universitetınıŋ maqtanyşy, osy oqu ornynyŋ ekonomika fakultetın tämamdaǧan Ortalyq sailau komissiiasynyŋ müşesı qyzmetıne Esıl audany äkımı qyzmetınen auysqan Säbila Mūstafina kezınde Astana qalasy äkımınıŋ orynbasary boldy. Qala tarihyna onyŋ aty tūŋǧyş äiel orynbasar retınde jazyldy. Säbila Saparqyzy men Ortalyq sailau komissiiasynyŋ taǧy bır müşesı, QR Prezidentı janyndaǧy Äielder ısterı jäne otbasylyq-demografiialyq saiasat jönındegı ūlttyq komissiia töraiymynyŋ orynbasary Läzzat Süleimenova, IV-V şaqyrylymdaǧy QR Parlamentı Mäjılısınıŋ deputaty Svetlana Ferho ǧibratty äŋgımelerdı qozǧady. Soŋynda studentter qonaqtarǧa sūraqtardy qoiyp, önerlerın körsettı.
Amanǧali QALJANOV
