Elordanyŋ jartyjyldyqtaǧy körsetkışterı osylai deuge negız bolady. Qala tūrǧyndarynyŋ sany aldaǧy onjyldyqtan keiın-aq 2 million adamǧa jetuı mümkın. Būl turaly keşe Astananyŋ jartyjyldyqtaǧy äleumettık-ekonomikalyq qorytyndysyna arnalǧan jiynda mälım boldy.
Resmi sanaq boiynşa bügıngı künı qala halqy – 1 million 200 myŋ adam. Al Elbasy Nūrsūltan Nazarbaev qala basşylyǧyna Astanany 2 million adam erkın ömır süretındei qalaǧa ainaldyrudy tapsyrǧan bolatyn. Aldyn ala resmi baǧamdau boiynşa būl körsetkışke jetu merzımı 2030 jyl dep belgılengen. Alaida qala äkımı Äset İsekeşev tūrǧyndardy tırkeudegı jedel baǧamdau boiynşa 2030 jylǧa jetpei-aq elordalyqtardyŋ sany 2 millionǧa toluy mümkın ekenın aityp otyr.
Halyq sany artqan saiyn atqaryluǧa tiıs jūmys auqymy da ūlǧaiatyny belgılı. Soǧan orai, qalany damytuǧa baǧyttalǧan 20 qadamnan tūratyn baǧdarlama daiyndalǧan. Ol qala ömırıne qatysty barlyq salany qamtidy. Äitse de, qala äkımı keşegı jiynda baǧdarlamanyŋ ekı basty baǧytyna erekşe toqtaldy. Bırınşısı – qala tūrǧyndary üşın qauıpsızdık pen jailylyq qalyptastyru. Ekınşısı – jol jäne kölık qatynasyn retteu.
Atap körsetılgendei, kölıktık mobildılık – qala basşylyǧynyŋ aldynda tūrǧan maŋyzdy mäselelerdıŋ bırı. Oǧan qoǧamdyq kölıkterdıŋ qauıpsızdıgı men jailylyǧy, jaiau jäne velojürgınşılerge arnalǧan joldardyŋ qauıpsızdıgı, baǧdarşamdar jüiesı jäne barlyq qalalardyŋ problemasy bolyp tabylatyn keptelıstı azaitu sekıldı maqsat-mındetter kıredı. Äset İsekeşevtıŋ aituynşa, būl mäselenı oŋtaily şeşu üşın älemnıŋ ırı megapolisterı – Mäskeu, Dubai, Singapur qalalarynyŋ üzdık täjıribelerı nazarǧa alynyp otyr.
Jol, kölık qozǧalysy turaly aitqanda, qala basşysy Täuelsızdık saraiynan jaŋa «Nūrly jol» vokzalyna deiın jaŋa «Myŋjyldyq» alleiasy qūrylysynyŋ bastalǧanyn atap öttı. Osy aimaqta aldaǧy 5 jyl kölemınde jaŋa qalaşyq tūrǧyzylady dep josparlanǧan. Odan bölek, qalanyŋ basty kölık aǧyny ötetın Mäŋgılık El, Tūran, Qabanbai batyr daŋǧyldarynan ülken jäne kışı ainalma joldar salu qolǧa alynǧan. Būl jobalardyŋ bärı 2020 jyly tolyq aiaqtaluy tiıs.
Qala tūrǧyndarynyŋ sany artuy qūrylys nysandarynyŋ da köbeiuın qajet etetını tüsınıktı. Būl oraida tūrǧyn üiler men jalpy qūrylys nysandaryn saluda Astana Qazaqstan boiynşa alda kele jatqanyn alǧa tartqan elorda äkımı bas qalanyŋ ülesı 23 paiyzdy qūraǧanyn mälımdedı.
«EKSPO obektılerın, köptegen TK men kommersiialyq nysandardy tapsyruǧa qatysty ötken jyl aitarlyqtai kürdelı bolǧanyna qaramastan, adamdar üşın jaily qala qūruda elordanyŋ ekonomikalyq saiasaty jappai käsıpkerlık pen jekemenşık investisiiany qoldauǧa baǧyttaldy. Ösım aitarlyqtai joǧary bolsa da, barlyq ekonomikalyq indikatorlar oŋ nätije körsettı» dedı elorda äkımı.
Jyl basynan Astanada «Nūrly jer» tūrǧyn üi qūrylysy baǧdarlamasyn ıske asyru şeŋberınde Astana äkımdıgınıŋ tapsyrysymen salynǧan 3 köp qabatty üi tapsyrylyp, myŋnan astam adam baspanaly bolǧan. Jyl soŋyna deiın taǧy da üş tūrǧyn üi keşenı paidalanuǧa berılmek. Sonymen bırge, «Nūrly jer» tūrǧyn üi qūrylysy baǧdarlamasy şeŋberınde soŋǧy üş aida Astana qalasy äkımdıgımen 720 adam jaŋa päterge köşken, onyŋ ışınde 410 adam – kezektegıler.
Elordada jazdyŋ jauyndy künderı ortalyq köşelerdıŋ boiy tereŋ su astynda qalyp, kölıkterge de, jaiaularǧa da aitarlyqtai qiyndyq tuyp jürgenı belgılı. Qala äkımdıgı biylǧy jyldan bastap osy mäselenı şeşuge erekşe nazar audaryp otyr. Osy jyly qolǧa alynǧan ırı jobalardyŋ qatarynda jaŋa LRT transport jüiesınıŋ, nöser kärızdık qūrylysynyŋ, TEO-2, TEO-3 jäne basqa da obektılerdıŋ qūrylysy bar. Jyl soŋyna deiın oŋ dinamika beretın 470,5 milliard teŋgege tatityn jobalardy engızu josparlanyp otyr.
