Astana qalasy Dene şynyqtyru jäne sport basqarmasynyŋ ūiymdastyruymen Qazaqstan ūlttyq qūramasynyŋ futbolşylary estu qabıletı zaqymdalǧan äuesqoi sportşylarmen joldastyq kezdesu ötkızdı.
Is-şara barysynda Qazaqstan ūlttyq qūramasynyŋ kapitany Ashat Taǧybergen bastaǧan bırqatar futbolşy qatysyp, mümkındıgı şekteulı azamattarǧa şeberlık sabaǧyn ötkızdı. Elordalyq sportşylarǧa Malaiziiada ötetın älem chempionatynda sättılık tıledı.
J.Üşkempırov atyndaǧy jekpe-jek saraiynda ötken joldastyq kezdesude Qazaqstan ūlttyq qūramasynyŋ futbolşysy Abzal Beisebekov elordalyq äuesqoi sportşylarǧa qorǧauşy pozisiiasynda oinaudyŋ qyr-syryn körsettı. Mümkındıgı şekteulılerdıŋ mümkındıgın keŋeitken ūlttyq qūramanyŋ jıgıtterı oiyn soŋynda sportşylarǧa arnaiy özderınıŋ qoltaŋbalary qoiylǧan bırneşe dopty jäne formany syiǧa tartty.
– Sportpen şūǧyldanu adamnyŋ köŋıl küiın köterıp qana qoimaidy, ünemı tyŋ, sergek jüruıne, eŋbek önımdılıgın arttyruǧa yqpal etedı. Būl sportşylar – qalalyq jarystardyŋ bırneşe dürkın jeŋımpazdary, sondai-aq 2022 jylǧy jastar arasynda ötken QR chempionatynyŋ jeŋımpazdary. Bügıngı oiynnyŋ maqsaty mūndaǧy estu qabıletı zaqymdalǧan sportşylar elımızdıŋ qūrama komandasyndaǧy futbolşylarmen täjıribe almasyp, biyl jeltoqsan aiynda Malaiziiada ötetın mümkındıgı şekteulı adamdar arasyndaǧy älem chempionaty aldyndaǧy daiyndyqty pysyqtau boldy. Aldaǧy uaqytta osyndai joldastyq kezdesudı basqa sport türlerı boiynşa da jalǧastyramyz, – deidı Astana qalasy Dene şynyqtyru jäne sport basqarmasynyŋ baspasöz hatşysy Mädina Aitqalieva.
Al estu qabıletı tömen sportşylardyŋ bırı Meiram Abraev «Malaiziiaǧa joldama alǧanymyz üşın quanyştymyn. Ūlttyq qūramanyŋ futbolşylarymen kezdesu, olarmen bır alaŋda oinau armanym bolatyn. Bügın, mıne, sol armanym oryndaldy. Qazaqstannyŋ namysyn qorǧaitynymyz üşın maqtanamyn» dep quanyşymen bölıstı.
