«QAZAQSTAN» ūlttyq arnasy elımızdıŋ ūlyq merekesı – Täuelsızdık künı qarsaŋynda qalyŋ körermenge taǧylymǧa toly syi ūsyndy. 1916 jylǧy Torǧaidaǧy ūlt-azattyq köterılısı qaharmandarynyŋ bırı, qūralaidy közge atqan mergen, halqymyzdyŋ azattyǧy üşın basyn bäigege tıkken batyr, bır ǧasyrǧa juyq jat jerde bassüiegı saqtalyp, byltyr elge äkelınıp, tuǧan jerıne jerlengen asyl er Keikı Kökembaiūly jaiynda «Keikı mergen» atty 16 bölımnen tūratyn tarihi dramanyŋ tanystyrylymy boldy.
Aituly şaranyŋ tızgının ūstaǧan «Qazaqstan» RTRK» AQ basqarma töraǧasy Erlan Qarin ūlttyq arnanyŋ otanşyldyq ruh baǧytynda bırtalai jobalardy jüzege asyryp jatqandyǧyn aita kelıp: «Bızde tarihi taqyryptar öte köp. Sondyqtan jyl basynda qandai tarihi drama tüsıretınımızdı köp oilandyq. Aqyry, byltyr bassüiegı elge äkelıngen erjürek Keikı atamyzdy tüsıruge toqtaldyq. Onyŋ üstıne ötken jyly jaryqqa şyqqan «Tar zaman» men «Keikı mergen» telehikaiasynyŋ oqiǧa jelısı men keiıpkerlerı ortaq. Barlyǧy da bır uaqytta bolǧan jaǧdailar. Osy hikaiany tüsıruge qoldau körsetken Aqparat jäne kommunikasiia ministrlıgıne alǧysymdy bıldıremın» dedı.
Körkemtuyndy ötken ǧasyrdyŋ basyndaǧy «aq qaşyp, qyzyl quǧan» alasapyran kezeŋdegı batyrdyŋ jan küizelısın suretteidı. Tarihi dramada Keikımen bırge Amangeldı batyr, Äbdıǧapar han, Älıbi Jangeldin, Mırjaqyp Dulatov jäne Ahmet Bırımjanov sekıldı tūlǧalardyŋ obrazdaryn köresız.
Filmnıŋ ǧylymi keŋesşısı bolǧan tarihşy-ǧalym Berık Äbdıǧali öz sözınde hikaiada batyrdyŋ ǧana emes, sol zamanda ömır sürgen tūlǧalardyŋ ömırı men tarihi oqiǧalar arqyly azattyq oidy körsetu bolǧandyǧyn baiandady. Jasynan el ışındegı mergendı közı körgen qariialardan estıgen äŋgımeler men tarihi derekterdı jinaqtap, «Keikı batyr» degen kıtap jazǧan ölketanuşy Şöptıbai Baidıldin tüsırılım tobyna keŋesşı retınde köp mälımetter bergen. Tanystyrylymda Şöptıbai aǧamyz da batyr ömırınen qysqaşa oi örbıttı. Al Qostanaidan ädeiı at arytyp kelgen, Keikınıŋ tuǧan aǧasy Qosjannyŋ ūrpaǧy Seiıtqali Qosjanov osy igılıktı ıstıŋ basy-qasynda jürgen azamattarǧa äuletı atynan rizaşylyǧyn jetkızdı.
Tarihi drama Türkıstan, Jambyl jäne Almaty oblystarynda tört ai ışınde tüsırılgen.
Tanystyrylymda jinalǧan qauymǧa dramanyŋ soŋǧy 16-bölımı ūsynyldy. Mūnda Keikı batyr men jary Aqjan jäne serıkterımen qyzyldardyŋ jazalauşy jasaǧynyŋ qolynan azaptap öltırılgen sätı beinelengen.
Tūjyryp aitqanda, ūlttyq arnanyŋ azattyq aŋsaǧan batyr turaly tüsırılgen 16 bölımnen tūratyn filmı bügınnen bastap körermenge jol tartyp, merekelık demalysta kün saiyn 4 seriiadan körsetıledı.
