Asqaq astana maǧan «Astana aqşamy» arqyly qūşaq aşty. Bas qalaǧa bauyr basa almai, beiımdele almai jürgen bastapqy jyldary osy basylymǧa qyzmetke tūryp, elordada özımdı erkın sezıne bastadym. Sondyqtan men üşın astana men «Aqşam» egız ūǧymdai.
Jurnalistık jolymnyŋ basy – «Astana aqşamy» gazetındegı qyzmetım 2014 jyldyŋ basynda bastaldy. Bas qalanyŋ bas basylymynyŋ tabaldyryǧyn korrektor bolyp attadym. Sol tūsta jaŋa jyldyŋ jaqsy jaŋalyǧyndai qabyldanǧan būl qadamym keiın ömırımdegı erekşe betbūrys bolǧanyn ūǧyndym.
Redaksiiadaǧy ornym – qalamy jüirık jurnalisterdıŋ sujaŋa maqalalaryn suytpai gazet etıp qalyptaityn sekretariatta. Osy kabinette terımşı, korrektorlar, bet qattauşy dizainerler qatar otyrdyq. Kabinettes bolmasaq ta, ünemı qasymyzdan şyqpaityn jetekşımız – jauapty hatşy bar. Ol – barlyq kabinettıŋ arasyn jalǧap tūrǧan däneker, jüielı jūmystyŋ üilestıruşısı. Jauapty hatşy nömırge josparlanǧan maqalalardy qolymyzǧa tapsyrady. Sodan bız, korrektorlar, materialdyŋ qatesın qarap otyryp, onyŋ qalai jazylǧanyn, taqyryptyŋ qalai qoiylǧanyn, redaktorlar qalai tüzegenın – bärın süzıp şyǧamyz. Sonyŋ arqasynda maqalany tiianaqty, qatesız qūrudan bırşama habardar bolyp qaldym.
Būrynnan jazu-syzuǧa beiımım bolǧandyqtan, jurnalist bolǧym keletın nietımdı jūmysqa kırerde bırden aŋǧartqanmyn. Keiın jurnalister kabinetıne auysyp, maqala jaza bastaǧanda korrektor deitın baspaldaqtan ötkenımnıŋ köp kömegı tigenın tüsındım. Al būl kabinette täjıribelı jurnalisterden jedel ärı jüielı jazudyŋ qyr-syryna bır kısıdei qanyqtym. Söitıp tılşılık tırlıkke aralasyp, jazǧandarym basşylar tarapynan maqtalsa, kädımgıdei mereiım tasyp, mäz bolyp qalatynmyn. Tauyp qoiǧan taqyrybym tura kelıp, atalyp jatsa, onyŋ özı – bölek quanyş. Mūnda eşkımnıŋ eŋbegı eleusız qalmaityn. Talaptanǧandardy qaşanda qoldap, qolpaştap otyratyn. Jazuym tüzelıp, şyŋdala bastaǧanda aǧa tılşı, keiın şoluşy etıp qoidy.
Būdan keiın taǧy kabinet auystyryp, jauapty hatşy qyzmetıne kırıstım. Mūnyŋ qanşalyqty jauapty jūmys ekenın, negızınen, sekretariat pen jurnalister kabinetınıŋ yntymaqtastyǧyna, bırlesken ılgerındı ısıne baǧyttalǧanyn joǧaryda atap öttım. Būl jūmysqa jegılgenım gazettegı täjıribemdı äjeptäuır şyŋdady. Basy-aiaǧy bır-ekı jyldyŋ ışınde osynşa qoldau körgenım – jas jurnalist men üşın ülken märtebe.
Osylaişa «Astana aqşamy» qalamymdy ūştaǧan, töske salyp tüzegen ūstahana boldy. Üiretkenı köp ülken aǧalardyŋ aldyn kördım. Bäiterek tübındegı redaksiiamyz ūiymşyl ūjymym, qamqor, tıleuqor ärıptesterımnıŋ arqasynda ystyq ūiama ainaldy. Elordalyq basylymda bes jyldan asa uaqyt jūmys ıstep, el gazetı «Egemen Qazaqstanǧa» auysarda aqedıl tılegın arnaǧan ärıptester qatarynda Amanǧali Qaljan aǧam «Orynbek ekeumız taǧdyrlaspyz» dep aityp edı. Qazır oilap qarasam, «Aqşamda» ıstegender, rasynda, taǧdyrlaspyz deuge bolatyn siiaqty. Öitkenı «Aqşam» köbımızge mektep boldy ärı elordaǧa ornyǧyp, sıŋısıp ketuımızge septıgın tigızdı. Mūnyŋ bır dälelı – Beken Qairatūly aǧamnyŋ «Auzymdy aqqa tigızgen Aqşam» degen jyly sözın keiın bırneşe jurnalistıŋ qaitalap aityp jürgenın kördım.
Elorda ömırındegı eleulı uaqiǧalardy qaǧys jıbermeitın, astananyŋ ainasyndai, şejıresındei būl gazette jūmys ısteu nesıbeme būiyrǧanyna quanyştymyn. Basty ordanyŋ baǧanaly bır ordasyndai basylymnyŋ qaşanda baǧy basym, baǧyty aiqyn boluyna tılektespın!
Orynbek ÖTEMŪRAT,
jurnalist
