Bala kütuşınıŋ bäsı artyp tūr
Elordada memlekettık mekemeler bala üş jasqa tolǧanda ǧana baqşaǧa qabyldaidy. Būryndary üşke deiıngı närestelerge «iasli-sad» bolatyn. Al sonşama jyl boiyna qyzmetın tastap, qarap otyra almaityn äielder bala kütuşısın ızdeuge mäjbür. Būl ürdıs aqşasy tasyp, ne adam jūmsap asqandyqtyŋ emes, qajettılıktıŋ belgısı bolyp bara jatyr. Osylaişa, bala kütuşınıŋ bäsı artyp, oǧan qoiar talaby da özgerdı.
Äzırge oǧan auyldaǧy aǧaiynnyŋ jūmyssyz jürgen qyzy kelıspese, tanys-bılısterden sūrastyryp, odan da qaiyr bolmasa bala kütuşısın ūsynatyn agenttıkterge jügınedı. Osy qyzmet tūrǧysynda elordada qanşa adam bala kütuşılıkpen ainalysady, sūranys qandai, olardyŋ eŋbek qatynastary qalai retteledı degendei arnaiy statistika jürgızılıp, eŋbek zaŋdylyǧynda da märtebesı qarastyrylmaǧan. Degenmen, qalamyzda üi qyzmetşılerımen qosa bala kütuşısın de jūmysqa tūrǧyzatyn agenttıkter jetıp artylady. Ärqaisysynyŋ aşylǧandaryna 20-15 jyldyŋ belesı bolyp qalǧan. Denı käsıpterın döŋgeletıp, sūranysqa sai tūraqty biznes közıne ainalypty.
Agenttıkter sızdıŋ qalauyŋyzǧa qarai, alǧaşynda bes «super-niania» ūsynady. Olardyŋ jalaqysy 120-150 myŋ aralyǧynda belgılengen. Sol aqşaŋyzdyŋ 50 paiyzyn agenttıkke töleuge mındettısız. Üş aidyŋ ışınde taŋdaǧan adamyŋyz köŋılıŋızden şyǧa qoimasa, onda taǧy basqasyn talap ete alasyz. Eger aptanyŋ bes künınde taŋǧy 9-dan keşkı 6-ǧa deiın jūmys künı belgıseŋız, 200 myŋǧa deiın jalaqy sūraityndar bar. Būl, ärine, qaltalylardyŋ qatal talabyna sai keletınderdıŋ täuekeldık bäsı. Bylaiǧy jūrt bala kütuşısın 100 myŋnyŋ ışınde de, 60 myŋnyŋ ainalasynda da ızdeidı. Oǧan da tabylyp jatady. Balany belgılı bır mezgılde saǧattap qarauǧa da kelısuge bolady. Būl qyzmet saǧatyna 500 teŋgeden bastalady.
Degenmen, jaqsy qyzmetşı tabu qiyn dep jas analar bezekteidı. Bıletınder jaqsy «nianiany» da tärbieleu kerek, är otbasynyŋ qalyptasqan ädetterıne qarai ikemdeu kerektıgın aitady. Rasynda da eşqandai täjıribesı joq jas qyzdan köp närse kütu qiyn, sondai-aq ata-babasy «jalşy» ūstap körmegen bügıngılerdıŋ de üiındegı «bötenmen» jūmysy ısteu daǧdysy kemşın soǧyp jatady. Mūndaida asqan bılımı bolmasa da, öz ısıne pysyq, şaruasyna myǧym elgezek qyzdar – taptyrmaityn kandidatura. Jūmys beruşı men qyzmetşınıŋ arasynda senım, özara qūrmettıŋ nätijesınde balanyŋ ainalasynda qalypty jaǧdai bolyp jatsa, onda bala tärbiesınıŋ bolaşaq ömırınıŋ negızı myqty deuge bolady.
Bala kütuşısın qyzmetke alǧanda atqaratyn mındetın tüsındıru kerek. Negızınde oǧan, balany suǧa şomyldyryp, tamaǧyn daiyndap, taza auada seruendetuı tiıs. Balanyŋ kiımın juyp-tazalap, onyŋ öi-örısın damytatyn oiyndardy oinatyp, oiynşyqtaryn jinap, bölmesın taza ūstau da – bala kütuşısınıŋ mındetı. Onyŋ jalaqysy osy mäselelerdı şeşuı tiıs. Eskerte ketu kerek, sabyrly, meiırımdı, täjıribelı bala kütuşısın qoldy-aiaqqa tūrǧyzbai, bır bala ösıp baqşaǧa bergende kelesı närestenı baǧuǧa basqa otbasy şaqyryp jatady. Mūndailardyŋ agenttıktegılerge de künı tüspeidı.
Balasyna kütuşı ızdegenderdıŋ keibırı pedagogikalyq nemese medisinalyq bılımı men sauaty, bırneşe tılde taza söileitınderdı de attai qalap jatady.
Alaida bala kütuşılerınıŋ basym köpşılıgı būl talaptarǧa sai kelmeitını anyq. Olardy qysqa kurstarǧa oqytyp, bala tärbieleu negızderın üiretıp jatqan eşkım joq. Bız bır agenttıkpen habarlasqanymyzda bır aptadai baǧyt berıp qana jönıne jıberedı eken. Būl jetkılıktı me?
Möldır SYZDYQOVA, «Qasiet» psihologiia ortalyǧynyŋ mamany:
– Bala kütuşısın ızdegende, balany mezgılımen tamaqtandyryp, asty qūrǧaq, üstı taza bolsa boldy dep oilaityn analar qatelesedı. Säbiıŋızdıŋ ömırındegı maŋyzdy orny bar adamnyŋ jeke qasietıne män beru kerek. Bala nenı tüsınuşı edı degenmen, ainalasyndaǧy adamdardyŋ jan jyluymen qūnarlanyp, solardyŋ aialy alaqanynyn sezınuı qajet. Bala kütuşısı säbige anasynan da artyq uaqytyn böledı, sonyŋ yqpalynda ösedı. Keide ösıp kele jatqan säbi tärbieşısınıŋ söileu mänerıne salyp, ädetterın qaitalaidy. Būl da ızsız ketpeidı. Böten adamdy üige kırgızıp tūryp, balaŋyzdyŋ psiho-emosionaldy jaǧynan da zardaby bolmaitynyna köz jetkızıŋız. Balaŋyzdyŋ janynda meiırımdı, oŋ-solyn tanyǧan, jaqsy men jamandy bıletın adamnyŋ bolǧany dūrys. Sosyn bala kütuşısın jūmysqa alarda köp oilanyŋyz, ony qaita-qaita auystyrsaŋyz da, balanyŋ böten adamǧa üirenısu oŋai emes.
Ainūr, täjıribelı bala tärbieşısı:
«Men köp jyldar köpbalaly ananyŋ balalaryn baǧuǧa kömektestım. Jalaqymdy mezgılınde tölep tūrdy. Osy otbasynda üirenıskenım sonşalyqty bır tuǧandai bolyp kettım. Eger baǧatyn balanyŋ äke-şeşesı parasatty adamdar bolsa, sızge de qiianat jasamaidy. Al eger tek aqşa sanap qalǧan jandar bolsa, jeke basyŋyzdan da kemşılık tauyp otyrady. Arasynda menıŋ mındetıme kırmeitın üi şarualaryn da jükteidı. Menıŋ tüsıngenım, öz jūmysyŋdy bılıp, artyq närsenı jasamau kerek. Ūnamasa, kete berıŋız. Naryq ülken, bala kütuşısın qajet etetınder az emes. Taǧy da bala kütuşısınıŋ märtebesı boluy tiıs, sonda otbasy müşelerı de qūrmetpen qaraidy, eresekter syilap tūrǧan soŋ bala üşın de bedeldı. Kerısınşe bolǧanda tärbienıŋ de mänı ketedı».
Baiyptap qarasaq, būl tek qana jas analardyŋ mäselesı emes. Bügınde ürdıske ainalyp bara jatqan äielderdıŋ jūmysbastylyǧynyŋ, säbiı üşke tolǧanǧa deiın üiınde qarap otyra almaityn sebepterı köp. Onyŋ bastysy – qarajattyŋ azdyǧy. Memleket tarapynan kömek bala bırge tolǧanǧa deiın berıledı. Odan keiın ana qosymşa qarajat ızdep jūmysqa tūruǧa mäjbür. Eger osy kömek ekı jasqa deiın berılıp, ekıden bastap büldırşınderdı balabaqşaǧa qabyldai bastasa, onda köptegen analar közderınıŋ qaraşyǧyndai säbilerın kım körıngenge tapsyrmas edı.